8
JOI
1 Kamoms te wals mange har i phraal, i tchawo miri datar!
Hatsoms tut kaimonea win,
nai tchumroms tut,
un kek nai wals chojedo ap mande.
2 Me loms tut pash o wast,
un anoms tut khere pash mande,
an miri dakri isema, kai boldo wom.
Me doms tut miri feteder mool,
un miri phabjengri mool.
3 Leskro serwo wast hi tel miro shero tchiddo,
un leskro tchatcho wast taprell man trujel.
4 Tumer tcha dran o foro Jerusalem,
me mangau tumen o djijestar:
Mukenn men kokres, jaake rah har khetne ham,
bis te stah pre.
I shobti gili
I TCHA
5 Koon hi koja, kai well pre dran o mulo tato them,
mussi an mussi peskri pirneha?
JOI
Tel o phabjengro ruk djangrom tut,
kote, kai tiri dai tuha wawartchandes was,
un tu boldo wal.
6 Tchin miro lab ap tiro dji!
Muk man har i gustri ap tiro wast te well!
Te kamenn pen dui, hi lengro kamlepen soreles har o merepen,
un rikrell len pandles har o mulengro them.
Len hi i dji jek o wawareske, hoi chatchell soreles har i jag o baro Deblestar.
7 Ninna bud panja nai krenn o kamlepen gar win,
un i sorele panja nai hidjrenn o kamlepen gar krik.
Te kamals jek o kamlepen te ginell, un dals peskro tselo brawlepen koleske,
sans i menshe les win.
LAKRE PHRALA
8 Men hi i tikni pheen,
koi hi jaake terno, te nai romedinerell li gar,
Hoi te kras mari phenjah ap ko diwes,
kai well jek te romedinerell lo lat?
9 Te hi li har i massuri, krah lat shukar kutch rupeha.
Te hi li har i wudar, pandah ko wudar sorele tchinle kashtentsa.
JOI
10 Me hom i massuri,
un mire tchutchja hi har turme.
Doleske dikell lo ap mande har ap jekate, kai anell leske bacht.
JOB
11 O Salomes hi i kotar phub ap i berga Baal-Hermonb,
Kote hi drakengre ruka tardo.
Koi kotar them das lo kol hachende an i wasta.
Hakeno lendar hunte plaissrals i drakenge, hoi bikrals lo, i sero kotja rup.
12 Salomo, tut nai well kol sero kotja rup,
un dui-sheel nai wenn i hachen!
Man hi miro kotar them mire drakentsa!
JOB
13 Tu, kai hal beshdo an i baar,
de man gole pash tute!
Mire mala hi koi un kamenn tut te shunell.
JOI
14 Naash, miro pirno!
Ab sik har i wesheskri busni
un har i terno tserfoc ap i berge,
kai i burra tardo hi, hoi sungenna latcho.