7
I TCHA
1 Risse tut trujel, risse tut trujel, Sulamit!
Risse tut pash mende, te nai dikas tut!
JOI
Hoi kamenn tumer ap i Sulamit te dikell,
har khelell li mank i wawarende?
JOB
2 Har shukar hi tire pire an tire kircha,
tu tchai i pralstunestar!
Tire herja hi shukar har i werkli trul tiri meen,
kerdo jekestar, kai haiwas, hoi lo kras.
3 Tiro gali hi har i tcharo, kai hako tsiro mool dren hi.
un har i berga sonakaskro djob.
Un lilja hi koi trujel tardo.
4 Tiro betch hi har terne wesheskre busja.
5 Tiri meen hi har i turmo dran elefantikre danda.
Tire jaka hi har kol tikne panja an o foro Heshbon pash o wudar Bat-Rabbim.
Tiro nak hi har ko turmo ap o Libanon, hoi dikell ap o foro Damaskus.
6 Har i berga Karmel rikreh tiro shero pral.
Un tire balla hi har feteder phara.
Tiro baro rai hi pandlo an lengro shukapen.
7 Har shukar hal tu, har kamlo!
Tu hal kaja, kai miri bacht hi.
8 Baro har i palma hal tu.
un tire tchutchja hi har drake.
9 Me kamau pre te djal ap koi palma un taprau pal lakre patria.
Tire tchutchja mu wenn mange har drake ap i drakengro ruk!
Un tiro ducho sungell har phabja.
JOI
10 Tire tchumma hi mange har i latchi mool,
hoi nashell pral miro mui un mire danda.b
11 Me hom miro pirneskri pirni,
un pal mande nashell leskro dji.
12 Ab, miro pirno,
te djas mer win glan o foro,
un atchah pral i rati mank i diwje blumec.
13 Taissarlake nashah menge kote,
kai i drakengre ruka tardo hi,
te dikas, har wenn le senelo un hidjrenn blume,
un har i phabjengre ruka tikne phabja hidjrenn.
Kote dau tut miro kamlepen.
14 I kamlepaskre phabja sungenna mishto.
Un pash maro wudar hi lauter latcho koowa,
newo un phuro koowa,
kai me, miro pirno, tuke pre garom.