5
JOB
1 Me wau an miri baar, hejo, miri pirni.
Un lau mire sungepaskre rukengre, kashta un patria.
Un chau miro gudlo gwin,
un pijau miri mool un miro thud.
LENGRE MALA
Chan, mala, un pijenn!
Un wenn mate an tumaro kamlepen!
I starti gili
JOI
2 Me sowom, miro dji his djangelo.
Shun, miro pirno dell ap o wudar:
JOB
Kre mange pre, hejo, miri pirni, miri tauba, miri gudli!
Mire balla hi sapeno.
JOI
3 Riwom miro ripen win,
hoske te riwap les kanna pale an?
Thowom mire pire,
hoske te krap len kanna pale tchikles?
4 Miro pirno tchiwas peskro wast an o wudareskri wochni,
un halauter, hoi an mande hi, kamas pash leste.
5 Me stom pre, te krap miro pirneske o wudar pre,
un mire wasta his pherdo sungepaskro djet.
O djet nashas mire gushte tele, har len ap i pandepaskri tchiwom.
6 Me krom o wudar miro pirneske pre,
koi hi lo buder gar koi – djas peske dureder.
Miro dji kamas tardo te atchell, har djas job peske.
Me rodom les, un hatsom les gar. Me kharom les, un shunom kek rakepen lestar.
7 Koi hatsan man kol mursha, kai denn garda an o foro un kai kote trujel nashenn.
Jon dan man dawa un dukan man.
Kal mursha tserdan i plaashka mandar tele.
8 Tumer tcha dran Jerusalem, mangau tumen o tselo djijestar:
Te hatsenn tumer miro pirnes, penenn leske, kai nasselo hom pal leste, jaake bud kamau les.
I TCHA
9 Hoske hi tiro pirno feteder har wawar mursha?
Pen kowa menge, tu shukester mashkral i djuwjende!
Hoske hi tiro pirno feteder har wawar mursha,
te mangeh tu mendar jaake soreles kau koowa?
JOI
10 Miro pirno hi sasto un sorelo,
kokres jek mank serjende hi har job.
11 Leskro shero hi shukar har dran latcheder sonakai.
Leskre balla hi tchiddo har bakrengro baal,
un hi kalo har i korako.
12 Leskre jaka hi har taube pash i panja,
– taube, kai hi jaake bijalo har thud
kai sungepaskre burra tardo hi.
Leskre wushtea hi har lilja, sapeno latcho djeteha.
14 Leskre gushte hi har dran sonakai,
Ap lende hi gustria kutch barrentsa.
Job hi har i kutch figura dran elefantikro dand, shukar kerdo kutch blauete barrentsa.
15 Leske herja hi har dran parno marmor,
soreles tardo ap pire dran sonakai.
Baro hi lo har o Libanon,
sorelo har i zedertikre ruka.
16 Leskro rakepen hi gudlo,
un halauter ap leste hi kamlo.
Kowa hi miro pirno;
awa, kowa hi miro maal,
tumer tcha dran o foro Jerusalem!