24
O deesh-te-enjato lab
1 Ma silwe ap tchilatche menshende,
ma rode lengro maal te well!
2 Lengre djia lenn penge sawo koowa pherdo marepen glan,
un hoi le rakrenn, anell bibacht.
O biishto lab
3 Tut hunte well goswepen, te tchiwess i kheer pre,
un tu hunte haiwess mishto, hoi te kress, te atchell ko kheer soreles tardo.
4 Koon bud djinell, kowa haiwell, har te krell lo peskre tsele iseme pherdo kutch shukar koowa.
O biish-te-jekto lab
5 I gosewo mursh hi har i sorelo,
un jek, kai bud djinell, an koleste hi pherdi soor.
6 Te kamell lo i kurepen te krell, hunte haiwell lo mishto, har te djal glan.
Un kote, kai bud mursha pengro goswepen khetne tchiwenn un pral rakrenn, hoi mishto wals, djal lengro kurepen mishto.
O biish-te-duito lab
7 I dinelo haiwell gar gosewe laba.
Kote, kai i tchatchepangre khetne wenna, nai krell lo peskro mui gar pre.
O biish-te-triinto lab
8 Kowa, kai peske glan lell te krell lo tchilatcho koowa, koles denn le ‘tchilatcho bedo’ gole.
9 Kowa, kai mukell pes tchi te penell, lell peske sawo koowa glan, hoi anell les o Debleskro dromestar tele.
Un i menshe dikenn chojedes ap koleste, koles i pre-phurdo dji hi.
O biish-te-starto lab
10 Kowa hi gar sorelo, kai an phare tsirja gar soreles tardo hi.
O biish-te-pantchto lab
11 Dja un le kolen dran o merepen win,
kai wenn pandles ap koi platsa tserdedo, kai wenn le maredo.
Rike kolen pale, kai koi djan.
12 Te peneh tu: Mer djinam kowa gar! Palle djiness: Kowa, kai an i djia dikell, haiwell les.
Un kowa, kai ap tiro djipen jak dell, kowa djinell les.
Un job dell o menshes kowa pale, hoi lo kras.
O biish-te-shobto lab
13 Cha gwin, miro tchawo!
latcho hi lo,
un gudlo an tiro mui.
14 Jaake hi o goswepen latcho tiro djipaske.
Te hatsal les, palle hi tut i latcho djipen glan tute,
un kowa wella, hoi o djijestar kamal.
O biish-te-eftato lab
15 Ma lure har i tchilatcho ap o kheer kolestar, kai an o tchatchepen tardo hi!
Ma de koi platsa khetne, kai tchiwell lo pes sopaske!
16 Kowa, kai an o tchatchepen tardo hi, nai perell efta kope,
hako kopo stell lo pale pre.
I tchilatche perenn an i bibacht.
O biish-te-ochtato lab
17 Te perell kowa, kai tuke tchilatchepen kamell, ma ab bachtelo!
Tiro dji te sal gar pral leskri bibacht!
18 O baro Dewel nai dikals kowa i choljah,
un palle rissrals lo peskri choli kolestar tele!
O biish-te-enjato lab
19 Ma ab chojedo ap kolende, kai midjak koowa krenn!
Ma silwe ap i tchilatchende!
20 Kolenge, kai tchilatcho hi, well kek latcho tsiro.
Lengro djipen hi har i momeli, hoi djal win.
O triin-deshto lab
21 Miro tchawo, djib glan o baro Debleskre jaka un kre, hoi o baro rai tutar kamella!
Ma dja kolentsa, kai wawaren ap lende pre anenn!
22 Sik well i bibacht pral sawende.
Nai djineh tu, hawi bibacht o baro Deblestar un o baro rajestar nai well?
Wawar gosewe laba
23 Ninna kolla hi laba, hoi i gosewe penan:
Kowa hi gar mishto, te dikenn i tchatchepangre mursha jekes feteder an har o wawares.
24 Kowa, kai ap koleste penell, kai doosh ap peste las ‘tut hi kek doosh’,
koles praassenn i menshe un rakrenn i bibacht win pral leste.
25 Kol tchatchepangre mursha, kai djan pal o tchatchepen, kolenge djal mishto.
Un bari bacht well ap lende.
26 Te deh tu i latcho lab pale, hi kowa har te dess i tchum.
27 Dja win ap tiri phub un kre tiri budi! Pal kowa le i romni, te well tut i familja!
28 Ma an chochepen pre ap i wawareste!
Pen o tchatchepen!
29 Ma pen: “Jaake har job mange kras, krau me leske ninna.
Hakeneste dau pale, har job mange kras.”
30 Me djom glan wergel ko kotar phub sawestar, kai kamell gar te budrell,
un dikom i drakengro them jekestar, koles tchi an o shero hi.
31 Un subjengre burra his koi tardo un lauter djungelo senlepen,
un i massuri trul ko kotar them his tele peredo.
32 Un me dikom kowa, un mukom les an miro dji te djal;
un kowa sikras mange:
33 Te kameh o sopen un pandeh i jaka un tchiweh i wasta an i gali un kreh tchi,
34 palle well o tchorwlepen lengste herjentsa pral tute.
Un tut wenn phare tsirja.