23
O shobto lab
1 Te well, te beshess pash i rajeste ap i chapaskri, palle biste gar, koon glan tute beshdo hi.
2 Ma pere pral o chapen, har bari ninna tiri bok hi.
3 Muk tiro dji gar pal leskro latcho chapen te nashell!
Kowa nai well i chocheno chapen.
O eftato lab
4 Ab jaake gosewo, te maress tut gar tele, brawelo te well.
5 Te dikeh tire jakentsa pre, hi o brawlepen gar buder koi,
jaake sik hi lo krik har i tchirklo, hoi hadell peskre mussja un hadell pes an o bolepen.
O ochtato lab
6 Ma cha ko maro, hoi i tchinlo tute dell.
Muk tiro dji gar pal leskro latcho chapen te nashell!
7 Les hi dui djia. Ap tute penell lo: “Cha un pi”,
an leskro dji kamell lo tute tchi te dell.
8 Kowa, kai tu tele dandral un chal, koles hunte tchadess tu pale win.
Un tire latche laba his tchitcheske.
O enjato lab
9 Ma rake an i kanda i dinelestar!
Ap tiro goswepen dikell job tele.
O deshto lab
10 Ma tchip kol phure barra krik, hoi sikrenn, har baro tiro them hi.
Ma le i phub kol tchawendar krik, kolen kek dad buder hi.
11 O baro Dewel well lenge soreles ap i rig,
un lell lengro koowa an o wast,
un krell o tchatchepen pral tute win.
O deesh-te-jekto lab
12 De jak ap kowa, hoi tiro sikepaskro tuke penell,
un shun ap kowa, hoi mishto un tchatcho hi.
O deesh-te-duito lab
13 Ma rike tut pale, te dess tiro tchawes i phagi.
Te deh les o kashteha, merell lo kolestar gar.
14 Tu deh les o kashteha,
un rikreh les jaake pale, ap o merepaskro drom te well.
O deesh-te-triinto lab
15 Miro tchawo, te hi tiro dji tchatches gosewo, palle hi miro dji ninna bachtelo.
16 Te rakreh, hoi mishto hi, sal miro dji.
O deesh-te-starto lab
17 Ma silwe ap kolende, kai o Debleskro drom mukan.
Hako diwes de jak, te djiwess o baro Debleha.
18 Palle hi tut i latcho djipen glan tute,
un kowa wella, hoi tu o djijestar kamal.
O deesh-te-pantchto lab
19 Shun, miro tchawo un ab gosewo,
un dja o djijestar o tchatcho drom!
20 Ma ab mank kolende, kai pen mates pijenn,
witar gar mank kolende, kai budeder mass an pende dren chan har mishto hi.
21 Ko pipaskro un ko chapaskro wenn tchorwelo,
un kolenge, kai kamenn gar te budrell, well ko tsiro, kai hi len tchi te riwell har koola hoi paash hi.
O deesh-te-shobto lab
22 Shun ap tiro dadeste un tiri date! Jon dan tut o djipen.
Ma dik tele ap lende, te wan le phuro.
23 Muk tuke o tchatchepen un o goswepen bud moldo te well!
Muk tuke hako tsiro tchomone te penell, te haiwess lauter mishto.
24 Bachtelo hi i dad, te hi leskro tchawo an o tchatchepen tardo un les i gosewo dji hi.
25 Doleske kre tiro dades un tiri dai bachteles!
Kre, te giwenn le i bachtjatar pral tute.
O deesh-te-eftato lab
26 Miro tchawo, kre tiro dji mange pre,
un dja ap mire dromma!
27 Ma dja pash i lubjate, witar gar pash o wawareskri romjate.
Kolla hi har i brunna, hoi dur tele djal, kai weh gar buder win.
28 Jon hi har tchorepangre, kai lurenn khatemen pash o drom,
un anenn bud murshen jaake dur, te chochenn le pengre romjen.
O deesh-te-ochtato lab
29 Koneske hi ropaske?
Koneske djal djungelo?
Koon krell tchingepen?
Koon hi bibachtelo?
Kones hi duk kek nasslepah?
Kones hi mate jaka?
30 Kowa hi kolla, kai dur an i rati gomme pash i mool beshdo hi,
un sorelo wawar pipen khetne tchorenn un pijenn.
31 Ma dik i mool an,
te hi li jaake shukar loles an o khoro,
un djal tele har djet.
32 O wawar diwes djal tuke jaake, har te dandrals tut i tchilatcho sap.
33 Tire jaka dikenn kowa, hoi gar koi hi.
Un tiro dji penell tuke dinelo koowa.
34 Un tu hal har jek, kai hi tchiddo an i shiffo, hoi djal pral un tele ap o baro pani,
un har sawo, kai hi kote beshdo pral pre ap o pesso kasht.
35 Palle peneh: “Mange hi, har dans le man, ninna te haiwom kek duk,
har te marans le man khetne, ninna te dukell mange tchi.
Te hom wi-sodo, palle djau pale koi.”