147
Hoi o Dewel lauter peskre menshenge kras
1 Halleluja! Sharenn o baro Debles!
Latcho hi, te giwas gilja maro Debleske!
Shukar un mishto hi, te bashras leske.
2 O baro Dewel tchiwella Jerusalem pale pre,
un lauteren, kai krik tradedo wan, anell job pale khetne.
3 Kolen, kai lengro dji phagedo hi, krell lo pale sasto,
un kolenge, kai dukedo hi, tchiwell lo i pandepen pre.
4 Job ginella i bolepangre momlia tele
un kharell lengre laba.
5 Baro hi o Dewel, maro rai,
un les hi bari soor.
Kowa lauter, hoi job an peskro goswepen krella, haiwah nai gar.
6 O baro Dewel hadell kolen pre, kai tele rikedo hi,
un i tchilatchen witsrell lo tele ap i phub.
7 Giwenn i gili o baro Debleske! Parkrenn tumen pash leste!
Bashrenn maro Debleske ap i harfa!
8 Job tchiwell wolke ap o bolepen,
dell brishin ap i phub,
mukell o senlepen bares te well ap i berge.
9 I viechende dell lo pengro chapen,
ninna i terne korake, hoi pal chapen gole denna.
10 I grajengri soor hi leske gar shukar,
witar gar i murshengri soor.
11 O baro Debleske hi kolla shukar, kai leha djiwenna
un ap leste dikenna, te well lo lenge latches.
12 Tumer menshe an o foro Jerusalem, sharenn o baro Debles!
Tumer dran o foro Zion, hadenn tumaro Debles!
13 Kol bare foreskre wudja krell lo soreles,
un ap tumare tchawende tchiwas lo peskri bacht.
14 Kek kurepen well an tumaro them,
un o latcheder djob dell lo tumen te chal.
15 Job penell, hoi te djal ap i phub.
Un sik djal kowa, hoi penas lo.
16 Jaake mukell lo gib te perell, parno har bakrengro bal,
un witsrell djajedo panib har jagakri tchikc.
17 Bare brishineskre barra witsrell lo ap i phub;
un bitchrell baro shilapen. Koon nai atchell an kawa shilapen?
18 Job penell i lab, un o gib well pani;
job bitchrell i ducho, hoi phurdell pral i phub,
un o pani, hoi djajedo his, nashella palle.
19 O Jakobeskre menshen mukell lo peskro lab te shunell;
un ap i Israelitarja penell lo, hoi lo lendar kamell,
un dell len peskre tchatchepaskre laba.
20 Kowa kras lo kek wawar menshenge.
Leskre tchatchepaskre laba prindjrenn jon gar.
Sharedo well o baro Dewel!