114
Har i Israelitarja dran Egiptia djan, kras o Dewel baro koowa
1 Har o Israel dran o them Egiptia win djas,
har o Jakobeskre menshe kol menshen mukan, kolengro rakepen jon gar haiwan,
2 koi was o them Juda kowa them, kai le o baro Debles an-mangan.
Un o Israel was kowa them, pral koleste job o baro rai hi.
3 Har wan le pash o baro pani, nashas o pani peske.
Har wan le pash o pani Jordan, djas o pani pale.
4 I berge stana har bakre, un i tikne berge har terne bakre.
5 “Tu baro pani, hoi his tuha, te nashal tuke,
un tuha, tu pani Jordan, te djal pale?
6 Un tumer berge, hoi his tumentsa, te stan har i bakre?
Hoi his tumentsa, tumer tikne berge, te stan har terne bakre?”
7 O baro Dewel his koi. Doleske was kowa jaake.
Hakeno ap i phub hunte trissell glan o baro Debleste, ko Debleste o Jakobestar.
8 Job hi kowa, kai kras pani dran i baro bar,
un mukas dran barra tikne panja te nashell.