103
I gili pral o Debleskro baro latchepen
Miro tselo djijestar sharau o baro Debles.
Lauter, hoi an mande hi, sharell leskro Debleskro lab!
2 Miro tselo djijestar sharau o baro Debles,
un bistrau gar o latchepen, hoi job mange kras.
3 Job hi kowa, kai miri tseli doosh mandar krik lella,
kowa, kai miro tselo nasslepen krik lella un man sastes krella,
4 kowa, kai man dran o merepen win lella,
kowa, kai peskro latchepen un kamlepen pral mande win tchorella,
5 kowa, kai man tchales krella peskro latchepah,
un man pale terno krella,
un sorelo har i adlari.
6 O baro Dewel tchiwell o tchatchepen pre,
un dell kolende pengro tchatchepen, kai wenn tele rikedo.
7 Job mukas o Moses te djinell, hoi job krella,
un kras glan i Israelende baro koowa, kai kek wawar nai krella.
8 O baro Dewel hi i latcho Dewel, kai krell peskro dji pre peskre menshenge.
Job well gar sik chojedo.
Un leskro latchepen herell gar pre.
9 Job tchingrell gar hako tsireske,
un atchell gar hako tsireske chojedo.
10 Job dell men gar i phagi pal kowa, hoi kram,
un dell men maro tchilatchepen gar pale.
11 Jaake dur har o bolepen pral i phub hi,
jaake baro hi leskro latchepen kolenge, kai djiwenn leha.
12 Koi rig, kai o kham pre djal, hi dur krik kolatar, kai lo tele djal.
Jaake dur har kai jek rig hi koi wawaratar,
jaake dur tchiwas job mari doosh mendar krik.
13 Jaake har i dad peskro dji pre krell peskre tchawenge,
jaake krell o baro Dewel peskro dji pre kolenge, kai djiwenn leha.
14 Job djinell, kai menshe ham;
te ham dran tchik kerdo, bistrell lo gar.
15 I mensho hi har khass,
har senlepen, hoi pre-djas.
16 Palle phurdell i ducho pral wergel, un krik hi lo,
un koi platsa, kai lo his, prindjrell les buder gar.
17 O latchepen o baro Deblestar hi gar jaake.
Kowa atchella hako tsireske.
An kek tsiro lell lo les krik kolendar, kai djiwenn leha.
Ninna lengre tchawenge un kolengre tchawenge rikrell job peskro lab,
18 kolenge, kai bistrenn gar, hoi job lengre phurentsa win kras,
un rikrenn pen ap leskre laba.
19 O baro Dewel tchiwas peskri raili beshepaskri an o bolepen.
Un job hi o rai pral halauter.
20 Sharenn o baro Debles, tumer bolepangre,
kai han leskre sorele kurepangre,
un krenn, hoi job penell,
un shunenn ap leskre laba!
21 Sharenn o baro Debles, tumer leskre bolepangre lurde,
kai budrenn leske un krenn, hoi job kamell!
22 Sharenn o baro Debles, tumer lauter, kai wan lestar kerdo!
Sharenn les, kai tumer ninna djiwenna an leskro them!
Ninna tu, miro dji, share o baro Debles!