80
O Israel hi har i drakengro ruk
2 Shun ap mende, tu, kai deh jak ap i Israelende.
Har i bakrengro jak dell ap peskre bakre,
deh tu jak ap o Josefeskre tchawende.
Tu, kai hal beshdo pral i cherubima, ab, un sike tut
3 glan tire menshende dran o kheer Efrajim, Benjamin un Manasse!
Sike tiri bari soor un ab ap mari rig!
4 Baro Dewel, hade men pale pre!
Dik latches ap mende,
jaake djal menge pale mishto.
5 Tu, baro Dewel un rai pral o bolepen un i phub,
har rah kameh tu mentsa chojedo te well,
kanna, kai tire menshe tut an-mangenn?
6 I swa hi maro chapen,
dran i khoro pherde swa deh tu men te pijell.
7 Kolla, kai trul mende djiwenna, tchingrenn pen pral maro them.
Kolla, kai kamenn men krik te tradell, praassenn men.
8 Tu, Dewel un rai pral o bolepen un i phub,
hade men pale pre!
Dik latches ap mende,
jaake djal menge pale mishto.
9 Dran o them Egiptia anal tu i drakengro ruk;
tradal wawar menshen dran lengre themma,
un tchiwal les an i phub.
10 Tu kral leske bud platsa,
leskre drabab nai djan dur an i phub,
un job was buchlo an o tselo them.
11 Peskre kashtentsa tchakras lo i berge.
Leskre lengste kashta tchakran i bare zedertikre ruka.
12 Leskre mussja djan bis pash o baro pani ap koi jek rig,
un bis pash ko sorelo lengsto pani ap koi wawar rig.
13 Hoske phagal tu kol barra tele, hoi trul leste pre-tchiddo wan?
Kanna nai lell hakeno peske drake lestar tele, kai kote djal.
14 I diwje bale chan les pre,
un diwje vieche mukenn tchi pral.
15 Ab pale pash mende, tu, o Dewel pral o bolepen un i phub!
Dik dran o bolepen ap mende, un de pale jak ap tiro drakengro ruk!
16 Rike tiro wast pral leste, hoi tu an i phub tchiwal,
pral ko terno drakengro ruk, hoi tu bares un soreles kral.
17 Dik, har hi lo tele dino un pre-chatchedo!
Tchinge jaake ap kolende, kai kowa kran, te phagenn le khetne.
18 Rike tiro wast pral koleste, kai hi beshdo ap tiri tchatchi rig,
pral ko mursheste, koles tu soreles kral.
19 Jaake kamah mer gar tiri rigjatar te djal.
Muk men te djiwell!
Un mer dah tiro lab an-gole.
20 Tu, baro Dewel un rai pral o bolepen un i phub,
hade men pale pre!
Dik latches ap mende,
jaake djal menge pale mishto!