75
O Dewel hi o tchatchepaskro rai
2 Mer sharah tut, maro Dewel.
Mer parkrah men pash tute, te hal pash mende,
un rakrah halauterestar, hoi tu kral an tiri bari soor.
3 “Te was miro tsiro”, penell o Dewel, “rakrau o tchatchepen win pral hakeneste.
4 Ninna te trissell i phub un lauter, kai djiwell koi pre,
me rikrau lat, te atchell li soreles tardo.”
5 Me penom ap kolende, hoi pen bares krenn:
‘Ma phurdenn tumen jaake pre!’
Un ap i tchilatchende penom: ‘Ma hadenn tumen!
6 Atchenn! Ma hadenn tumen!
Mukenn tele tumaro tchilatcho rakepah!’
7 Tchatcho barepen well gar kotar, kai o kham pre-djala,
un gar kotar, kai o kham tele djala,
witar gar dran o mulo tato them.
8 Na-a, o Dewel hi o tchatchepaskro rai,
kai ko jekeske i soor krik lell,
un o wawares bares krell.
9 O baro Debles hi o khoro an o wast
pherdo soreli mool, hoi job dren tchoras.
Un i tsele tchilatche ap kai phub hunte pijenn lat,
bis te buder kek mool an o khoro hi.
10 Me kamau o Deblestar te rakrell hako tsiro.
Un leske, ko Jakobeskro Debleske, giwau un bashrau.
11 Maro Dewel, tu phageh i soor i tchilatchendar,
un deh i soor kolen, kai an o tchatchepen tardo hi.