Debleskri Gili 54

Jek, kai well palla lino, dell gole ap o Debleste

1-2 I gili o rajeske pral i gipangre, te bashrell ap i dorjengri bashepaskri. O David tchinas koi gili, har kol mursha dran Sif pash o Saul wan un penan: “O David rikrell pes pash mende khatemen.”

3 Miro Dewel, sike koon tu hal un ab ap miri rig!

Sike tiri soor un kre, te lap miro tchatchepen!

4 Miro Dewel, shun miro mangepen!

Shun o rakepen, hoi dran miro mui wella!

5 Menshen, kai me gar prindjrau,

kolla hadenn pen ap mande,

depangre kamenn man te marell.

O Dewel hi len gar glan i jaka.

6 Tu, miro Dewel, weh ap miri rig.

Tu, miro rai, hal kowa, kai man rikrella.

7 Tu deh kolen ko tchilatchepen pale, hoi jon kaman ap mande te anell.

Sike mande, te hal mantsa,

un le len krik kai phubjatar!

8 Palle anau me tuke latcho koowa i bachtelo djijeha,

un sharau tut, baro Dewel,

tu hal jaake latcho.

9 Tu lal man win dran o tselo koowa,

hoi mange o djipen phares kras.

Kanna nai dikau tele ap kolende,

kai kaman man te marell.