37
I bacht i tchilatchendar atchell gar
Ma choje tut pral i tchilatchende!
Te djal kolenge mishto, kai krenn tchilatcho koowa, ma silwe ap lende!
2 Jon hi har khass, hoi merell, te dell kek brishin,
un har o senlepen, hoi atchell gar.
3 Dik ap o baro Debleste, te krell lo tuke latchepen!
Un kre, hoi mishto hi!
Atch an o them,
un djib kolestar, hoi tire wastentsa budral!
4 Rode tiri bacht pash o baro Debleste,
palle dell job tut lauter, hoi tiro dji kamella.
5 De tiro djipen an o wast o baro Deblestar,
un pats ap leste!
Palle krell job lauter mishto.
6 Un job mukell tiro tchatchepen pre te djal har o kham,
un mukell tiro tchatchepen diklo te well har o kham mashkral o diwes.
7 Atch pokones un dik ap o baro Debleste,
te well lo ap tiri rig!
Ab gar chojedo pral koleste,
kai leske mishto djala, ninna te hi les tchilatchepen an o shero.
8 Muk tele i choljatar!
Ma choje tut pral o tchilatchepen, hoi i wawar krenna!
Kowa nai anell tut jaake dur, te kreh tu ninna o tchilatchepen.
9 I tsiro wella, kai hi buder kek tchilatche ap kai phub.
Kolla, kai ap o baro Debleste dikenna, te well leskro tsiro,
kolenge hi palle o them.
10 An i tikno tsiro hi o tchilatcho buder gar koi.
Un kote, kai job djiwas, hatseh les buder gar.
11 I tchorwele lenn ko them.
Kote hi len budeder bacht har doha.
12 O tchilatcho kamell midjak koowa te krell ap koleste, kai an o tchatchepen tardo hi,
un sikrell leske i danda.
13 O baro Dewel sal pral leste,
job dikell leskro diwes te well.
14 I tchilatche lenn pengro charo, un hadenn pengro bogo,
te marenn le i tchorwelen un kolen, kai nai kurenn pen gar,
ninna lauteren, kai djan ap o tchatcho drom.
15 Jon denn pen pengro chareha kokres an pengro dji tchurje,
un lengre boge wenna phagedo.
16 Ko tikno brawlepen, hoi koleskro hi, kai an o tchatchepen tardo hi,
hi feteder har ko baro brawlepen bud tchilatchendar.
17 Kolengri soor well phagedo.
O baro Dewel rikrell kolen, kai an o tchatchepen tardo hi.
18 O baro Dewel prindjrell i diwessa kolendar, kai ap leste shunenna pengro tselo djijeha,
un lengro them atchell lenge hako tsireske.
19 An i tchilatcho tsiro mukell lo len gar,
un an i boklo tsiro dell job len doha te chal.
20 I tchilatche merenna,
un kolla, kai o baro Debles gar kamenna,
hi har kol shukar diwje blume, hoi sik tele merenn,
un djan penge har i jagakro ducho, hoi pre djal.
21 O tchilatcho patsell peske lowe, un plaissrell gar pale.
Kowa, kai an o tchatchepen tardo hi, krell peskro dji pre un della.
22 Kol menshe, ap kolende o baro Dewel peskri bacht tchiwas, lenn ko them.
Kolla, ap kolende o baro Dewel i bibacht tchiwas, kolendar atchell kek.
23 O baro Deblestar well, te djal i mursh o tchatcho drom.
Pral koleste hi lo bachtelo.
24 Ninna te perell lo, atchell lo gar tchiddo,
o baro Dewel rikrell les ap peskro wast.
25 Me homs terno un wom phuro.
An ko tselo tsiro dikom me kekes kokres muklo, kai an o tchatchepen tardo hi;
un kekes leskre tchawendar dikom, kai hunte mangas peske maro.
26 O tselo tsiro krell job peskro dji pre un patsella,
un ap leskre tchawende well o Debleskri bacht diklo.
27 Muk o tchilatchepen pal tute, un kre o latchepen!
Palle nai atcheh hako tsireske khere an o them.
28 O baro Dewel kamell o tchatchepen
un mukell peskre menshen gar kokres.
Hako tsiro dell job jak ap lende.
Kolla, kai kamenn o Deblestar tchi te djinell, merenna,
ninna lengre tchawe un kolengre tchawe.
29 Kolla, kai an o tchatchepen tardo hi, lenn o them,
un djiwenn kote hako tsireske.
30 Goswepen well dran o mui i latcho menshestar,
un leskri tchip rakrell o tchatchepen.
31 O Debleskre laba hi an leskro dji.
Un job perell gar o tchatcho dromestar tele.
32 O tchilatcho lell koles an o jak, kai an o tchatchepen tardo hi,
te hatsell lo i drom, te nai dell lo les mulo.
33 O baro Dewel mukell les gar an o tchilatcheskro wast.
Te anenn le les glan i tchatchepangre,
nai anenn jon kek doosh ap leste pre.
34 Dik ap o baro Debleste, te well lo ap tiri rig!
Un atch ap leskro drom!
Palle hadell lo tut un dell tut ko them.
Un tu dikeh, har wenn i tchilatche maredo.
35 Me dikom i tchilatches,
kai hadas pes pral i wawarende,
un kras pes buchlo har i baro sorelo ruk.
36 Un har wom i wawar kopo koi,
his lo buder gar koi.
Un me rodom les,
un hatsom les gar.
37 Kre jaake har kowa, kai shunell ap o Debleste peskro tselo djijeha!
Un djib jaake har kowa, kai well kek doosh ap leste hatslo.
Sawo mensheske djal mishto an ko tsiro, hoi wella.
38 Kolla, kai o Deblestar tele peran, wenna lauter mulo dino.
Un i tchilatchendar pengre tchawentsa un tchawengre tchawentsa atchell kek pral.
39 O baro Dewel well ap i rig kolendar, kai ap leste rikrenna.
An i pharo tsiro dell lo len soor.
40 Un o baro Dewel hi pash lende tardo,
un lell len win,
awa, dran o wast i tchilatchendar lell lo len win.
Jon nashenn pash leste,
un job dell garda ap lende.