35
Miro Dewel, de man miro tchatchepen!
Baro Dewel, le miro koowa an tiro wast
un tchinge kolentsa, kai mantsa tchingrenna!
Kure tut kolentsa, kai kurenn pen mantsa!
2 Le tiro shilto an o wast,
rib tiro sasterno ripen ap tute!
Un ab ap miri rig!
3 Le tiro charo un tiro tower,
un tchip tut kolenge an o drom, kai man palla lenna!
Pen mange: “Me hom ap tiri rig.”
4 Mu well ladj un praassepen ap kolende, kai kamenn miro merepen!
Mu wenn le pale-tchiddo un ladjenn pen,
kolla, kai rodenn miri bibacht!
5 Mu tradell len o baro Debleskro bolepaskro krik,
jaake te wenn le har phuss, hoi i ducho krik phurdell!
6 Lengro drom te well kalo un sapeno,
te dikenn le tchi un perenn le!
Un o baro Debleskro bolepaskro te lell len palla!
7 Jon tchiwan mange i netsa win, te perap dren,
ninna te krom me lenge tchi.
Tchitcheske hadan le mange i cheb win,
te perap dren.
8 Muk i bibacht pral lende te well jaake sik har i dap!
Mu perenn le an koi netsa, hoi jon tchiwan mange.
Mu perenn le an koi cheb, hoi jon hadan mange win!
9 Miro dji mu giwell un bashrell,
te las man o baro Dewel dran lengre wasta win.
10 Lauter, hoi an mande hi, penell:
Baro Dewel, koon hi jaake har tu?
Tu leh o tchorweles win dran i wasta kolendar, kai sorleder hi har job.
Tu leh koles, kai bibachtelo un tchorwelo hi, win dran i wasta kolendar, kai tchoran leskro koowa.
11 Chochene wenna, un anenn doosh ap mande.
Jon putchenn mandar, hoi me gar djinau.
12 Me homs ap lende latches.
Jon denn man tchilatchepen pale,
un krenn, te wap kokres.
13 Har jek lendar nasselo his, riwom ropaskre ripjaa ap mande,
chom tchi un bokom leske,
un pale te pale mangom o Debles leske,
14 har te wals lo miro maal un phraal.
Mange was ropaske jaake har te wals lo miri dai.
15 Hi wawartchandes lentsa. Har me perom, stan le i bachtjatar,
un tchiwan pen khetne, te djan le ap mande pre.
Depangre wan, kai prindjrom gar,
un dan man dawa un mukan gar tele.
16 Khetne kol tchilatchentsa praassan le man
un sikran mange pengre danda.
17 Rai, har rah kameh tu kowa te dikell un kreh tchi?
Le miro djipen dran i wasta kolendar win,
kai peran pral mande har diwje vieche.
18 Palle kamau man pash tute te parkrell kote, kai bud menshe khetne wenna an o Debleskro kheer.
Awa, glan i tsele menshende sharau tut.
19 Ma muk, te sanenn kolla pral mande,
kai kamenn mange tchilatchepen,
ninna te krom me len tchi.
Ma muk len i jakentsa te dell pal mande!
20 Jon rakrenna, hoi dukepen anella.
Un anenn chochepen pre ap kolende,
kai djiwenn kek tchingepah an kau them.
21 Pengre muja krenn le dur pre un denn gole ap mande:
“Ha! Ha! Koleske dam les!”
22 Baro Dewel, tu dikal kowa.
Rike tut gar pale, rake!
Miro rai, ma ab kanna dur mandar krik!
23 Hade tut! Ste pre,
un de man miro tchatchepen!
Le miro koowa an tiro wast,
mo Dewel un mo rai!
24 Baro Dewel, tu hal an o tchatchepen tardo.
De man miro tchatchepen!
Miro Dewel, muk len gar pral mande te sal!
25 Muk len gar an pengre djia te penell:
“Dik! Men hi, hoi kamam. Kanna chah mer les djides!”
26 Kre, te ladjenn le pen, un nai hadenn pengro shero gar pral,
kolla lauter, kai hi bachtelo pral miri bibacht!
Mu well praassepen un ladj ap lende,
kai hadenn pen pral mande.
27 Kre, te stenn un sanenn i bachtjatar kolla,
kai kamenn, te lap miro tchatchepen.
Mu penenn le pale te pale:
“Har baro hi o baro Dewel,
kai hi jaake latcho ap peskro budepaskro!”
28 Me kamau te rakrap pral tiro tchatchepen,
un sharau tut hako diwes.