33
I gili, hoi sharell kowa lauter, hoi o Dewel krell
1 Tumer, kai an o tchatchepen tardo han,
denn gole i bachtjatar pral kowa, hoi o baro Dewel krell.
Hi mishto, te sharenn les,
tumer, kai tumaro tselo djijeha ap leste shunenn!
2 Parkrenn tumen pash o baro Debleste,
un bashrenn leske ap dorjengre bashepangre!
Giwenn leske gilja,
un bashrenn leske ap i bashepaskri i deesh dorjentsa!
3 Giwenn leske i newi gili!
Krenn shukar bashepen un denn gole i bachtjatar!
4 O baro Debleskro lab hi tchatcho.
Un kowa, hoi krell lo, hi sorelo.
5 Job kamell i tchatche dromma un i tchatche laba.
Un i tseli phub hi pherdo latchepen o baro Deblestar.
6 Dran o lab o baro Deblestar
was o bolepen kerdo.
Dran o ducho, hoi dran leskro mui djas,
wan i tsele bolepangre momlia kerdo.
7 Job rikrell i bare panja khetne har an i gono,
un tchiwell i bare panja khetne har an i kheer.
8 I tseli phub hunte darell o baro Deblestar,
hakeno, kai ap i phub djiwella, hunte penell leske: “Tu hal o Dewel.”
9 Job te rakrell, palle well, hoi job penas,
jaake har lo kowa penas, jaake hi kowa koi tardo.
10 O baro Dewel mukell kowa gar te well,
hoi kol menshe an i wawar themma kamenn te krell.
Lenge tchiwell lo barra an o drom.
11 Kowa, hoi o baro Dewel kamell te krell,
atchell soreles tardo,
un kowa, hoi les an peskro dji hi, te krell lo,
atchell jaake rah har menshe koi hi.
12 Bachtele hi kol menshe,
kolengro Dewel o baro Dewel hi,
kol menshe, kai job peske wi-rodas,
te wenn le leskre menshe.
13 O baro Dewel dikell tele dran o bolepen,
un dikell i tsele menshen.
14 Job hi beshdo ap peskri rajeskri beshepaskri
un dikell ap lauterende, kai ap i phub djiwenna.
15 Job tchiwell lenge an o dji, hoi te krenn le,
un dell jak ap lauter, hoi jon krenna.
16 I baro rai bud lurdentsa well gar dran peskri soor o sorleder an o kurepen.
Un i tchatcho mursh, koles bud soor hi, well gar dran peskri soor win lino dran o kurepen.
17 Hi witar gar i graja, kai nai lenn win dran o kurepen,
ninna te hi len bari soor.
18 Kowa hi o baro Dewel, kai dell garda ap kolende, kai djiwenn leha,
kolla, kai dikenn ap leste, te well lo lenge latcho,
19 un lell lengro djipen dran o merepen win.
Ninna te well bari bok pral o them, merenn le gar.
20 Mer rikrah men ap o baro Debleste maro tselo djijeha.
Job well ap mari rig,
un rikrell peskro wast pral mende.
21 An leste hi maro dji bachtelo,
un mer rikrah men ap leste, kai hi kokres o Dewel.
22 Dik, har mer dikah ap tute, baro Dewel,
jaake muk tiro latchepen pral mende te well!