29
O Debleskro railepen un soor well diklo
Tumer bolepangre, sharenn o baro Debles!
Sharenn leskro railepen un leskri soor!
2 Krenn leskro lab baro!
Awenn un witsrenn tumen tele glan o baro Debleste,
te well lo an peskre shukar un kutch ripja!
3 O baro Debleskro rakepen well shunlo pral i panja.
Te dell o sorelo Dewel gole,
hi kowa har koi bari gole, hoi dell o bolepen, te dell baro brishina.
O baro Dewel hi o rai pral i tsele bare panja.
4 Leskro rakepen hi pherdi soor,
un sikrell hawo baro rai job hi.
5 O baro Debleskro rakepen phagella sorele ruka,
ninna kol zedertikre ruka ap i berga Libanon.
6 Job mukell len te stell har i terne grumja,
I berga Libanon mukell lo te stell har i terni grumni stell,
un i berga Sirjon har i terno diwjo gurumb.
7 Te rakrell o baro Dewel, dell jag karje dran o bolepen.
8 Te rakrell o baro Dewel, trissellc o mulo tato them.
O baro Dewel mukell te trissell o mulo tato them, hoi kharella Kadesh.
9 Te rakrell o baro Dewel, anenn i wesheskre grumja pengre terne ap i phub.
Ninna nashrenn i ruka pengre patria an i wesha.
An o Debleskro kheer dell hakeno gole: “Har baro hi o Dewel!”
10 O baro Dewel hi beshdo pral i panja.
O baro Dewel hi o baro rai hako tsireske.
11 O baro Dewel dell peskre menshende soor,
ninna bacht un latcho koowa.