18
O baro rai parkrell pes pash o Debleste
2 Un job penas:
Baro Dewel, miro tselo djijestar kamau tut.
Tu kreh man soreles.
3 Baro Dewel, tu hal mange har i baro sorelo bar, kai nai khatrau man,
har i sorelo kheer, kai nai krell kek mange tchilatchepen.
Miro Dewel, tu hal kowa,
pash koleste nai wau un man khatrau.
Tire wasta rikreh tu pral mande.
Tu hal ko sorelo ap miri rig,
un hal mange har i sorelo kheer pral ap i berga.
4 Me sharau o baro Debles!
Te dau ap leste gole,
lell lo man win dran i wasta kolendar, hoi mange tchilatchepen kamenna.
5 O merepen pandas man an peskre shelle,
un merepaskri daar djas pral mande har sorele panja.
6 I mulengro them pandas peskre shelle trul mande,
un o merepaskre shelle tserdan man tele.
7 An miri daar kharom ap o baro Debleste.
Awa, bari gole dom ap miro Debleste.
An peskro railo kheer shunas lo man,
un miri gole was glan leskre kanda.
8 Koi trissas i phub,
pral un tele djan i berge o Debleskri bari choljatar.
9 Jagakro ducho djas dran leskro nak pre,
baro tatepen was dran leskro mui win,
ninna jag das karje lestar win.
10 Un job tserdas o bolepen ap i rig,
un was tele.
Kali rat his tel leskre herja.
11 Un job beshas ap i cheruba
un hadas pes har i tchirklo;
awa, job mukas pes te hidjrell ap i mussja o duchestar.
12 Kali rat his leskro ripen,
An kalo pani un pesse wolke his lo khatedo.
13 Dran o railepen glan leste djan leskre wolke dureder,
brishineskre barra un barra, hoi chatchran, peran dran lende.
14 Un o baro Dewel mukas o bolepen bari gole te dell,
awa, o Dewel pral halauter mukas pes te shunell bari goljah.
15 Un job das jag karje dran o bolepen kate te kote,
un tradas i wolke krik.
16 Kote was o telstunepen tel i panja diklo,
un i telstuni phub was pre-tchakedo,
har tu, baro Dewel, tchingral
un trad dal an tiri choli.
17 Dran o bolepen tapras man tiro wast,
un tserdas man dran o baro pani win.
18 Tu lal man win dran o wast kol sorelendar,
kai kaman miro merepen,
awa, dran ko wast kolendar, kai his jaake chojedo ap mande
un bud sorleder har me.
19 Ap o diwes, kai i bibacht pral mande was, peran le pral mande.
Koi was o baro Dewel ap miri rig.
20 Job las man win dran lengre wasta un anas man an i buchlo them.
Job kamell man, doleske kras lo kowa.
21 O baro Dewel djinas, te homs an o tchatchepen tardo.
Doleske kras lo mange latchepen.
Kek doosh his ap mande.
Doleske his lo mange latcho.
22 Me rikrom man ap i dromma o baro Deblestar,
un mukom gar miro Debles.
23 Awa, leskro tselo tchatchepen hi glan mire jaka,
un rikrau ap lauter, hoi job kamell, te krap.
24 Jaake te hatsell lo tchi ap mande, kai nai tchingrell lo mantsa,
un dau jak, te well kek doosh ap mande.
25 Miro tchatchepen his glan leskre jaka.
Un kek doosh his ap mande.
Doleske kras o baro Dewel mange latchepen.
26 Tu rikreh ap koleste,
kai ap tute rikrell,
un kreh, hoi mishto hi koleske,
kai krella, hoi tu lestar kameh.
27 Tu hal latcho ap koleste,
kai hi latcho ap i wawarende
un hal gosweder har kowa,
kai ap bange dromma djal.
28 Tu weh ap i rig i tchorwelenge,
un kol pre-phurden kreh tu tiknes.
29 Miro baro Dewel, tu kreh miri momeli soreles,
un kreh miri rat jaake har wals diwes.
30 Awa, khetne tuha nai djau me an o kurepen.
Khetne miro Debleha nai stau me pral bare pre-tchidde barra.
31 I tsele dromma, kai o Dewel man anella, hi latcho.
Leskre laba hi latcho un tchatcho.
Job rikrell peskro wast pral hakeneste,
kai well pash leste.
32 Jek kokres hi o Dewel.
Kowa hi o baro Dewel.
Jek kokres hi har i baro sorelo bar menge,
kai nai khatrah men.
Kowa hi maro Dewel.
33 Job hi kowa, kai dell man soor
un krell i latcho drom glan mande.
34 Job krell mire herja jaake sik,
har te wans le i herja i wesheskri grumjatar,
te wap soreles tardo ap i pralstune berge.
35 Job sikrell man, har mire wasta hunte kurenn pen,
un har miri mussi rikrell o sasterno bogo.
36 Baro Dewel, tu rikreh tiro wast pral mande, te dukrell man kek.
Tiri tchatchi mussi dell man soor,
un tu dikeh latches ap mande un kreh man bares.
37 Tu kral, te nai stakrau soreles pre,
un kral mange o drom dur pre.
38 Me lom kolen palla, kai ap mande pre djan,
un taprom len, un mukom gar tele,
bis te his le mulo dino.
39 Me dukrom len jaake, te nai stan le gar buder pre,
un stakrom len tel mire herja.
40 Tu dal man i soor, te nai kurom man lentsa
un witsral kolen ap i phub glan mande,
kai hadan pen ap mande.
41 Tu kral, te hunte nashan le mandar.
Jaake nai marom kolen,
kai mange tchilatchepen kaman.
42 Fothe dan le gole, his kek koi, kai nai lals len dran miro wast win.
Ap o baro Debleste dan le gole,
un job rakras gar pale ap lende.
43 Un me dom len khetne,
dom len tiknes har tchik,
hoi i baro duchob krik phurdell.
Har tchik tchorom len win ap o drom.
44 Tu lal man win dran o tchingepen mire menshentsa,
un kral man o rai pral i menshende dran wawar themma,
Menshe, kolen me gar prindjrom, budrenn mange.
45 I wi-themarja rakrenn shukar ap mande,
un shunenn ap mande un krenn sik, hoi penau.
46 Len hi buder kek soor an pende.
Darjah wenn le dran pengre sorele rajengre khera win.
47 O baro Dewel djiwella!
Les sharau: har i baro sorelo bar hi lo mange.
Miro Debles hadau: job das ap mande jak,
48 un kras man sorleder har kolla, kai kuran pen mantsa,
un witsras i menshen dran wawar themma tel mande.
49 Tu lal man win dran i wasta kolendar, kai kaman miro merepen.
Tu hadal man pral kolende, kai hadan pen ap mande,
un mukal man gar an i tchilatche wasta.
50 Doleske sharau tut mank kolende,
kai hi gar tire menshendar, baro Dewel,
un giwau gilja tuke.
51 Tu kreh baro koowa o Davideske,
koles tu wi-rodal, te well lo o baro rai.
Un hal jaake latches ap leste un kolende, kai lestar wenn.
Tiro kamlepen lenge atchell hako tsireske.