4
O Dewel dell bacht an miro dji, ninna te well djungeles pral mande rakedo
2 Shun man, te dau ap tute gole!
Miro Dewel, kai deh man tchatcho!
An miri daar kral tu miro dji soreles.
Ab latches ap mande un shun har me tut mangau!
3 Murshale, har rah tserdenn tumer miro lab an i tchik!
Tumer rodenn pal kowa, hoi tchi moldo hi,
un kamenn o chochepen.
4 Dikenn un haiwenn:
O baro Dewel rodas kolen win, kai kamenn les o tselo djijestar.
O baro Dewel shunell man, te dau ap leste gole.
5 Te well i choli an tumende pre, palle anenn kek doosh ap tumende!
Rakrenn an tumare djia, te han an tumaro tchiben tchiddo,
un rakrenn kek lab!
6 Denn kowa o Debleste, hoi mishto un tchatcho hi!
Un patsenn, te krell o baro Dewel lauter mishto!
7 Bud penenna, koon mukell men latchepen dikell?
Tu, baro Dewel, muk tiro latchepen har i momeli pral mende pre te djal!
8 Tu kral miro dji bachtleder har o dji kolendar, kolen bud djob un mool hi.
9 Me tchiwau man tele un sowau kek darjah.
Tu kokres, baro Dewel, deh jak ap mande,
te nai krell mange kek i tchilatcho koowa.