9
O Hiobeskro duito rakepen
1 O Hiob penas koi pre:
2 Tchatchepah, djinau te hi jaake.
Har nai well i mensho an o tchatchepen glan o Debleste?
3 Te kamell lo pes leha te tchingrell,
nai putchals lestar o Dewel jek sero koowa.
Un o mensho nai penals gar jek pale.
4 O Dewel hi gosewo an peskro dji
un les hi bari soor.
Kekeske, kai las pes glan te tchingrell lo leha,
djas kowa mishto.
5 O Dewel tchiwell i berge jek rigjatar ap i wawar,
glan te haiwenn le kowa.
An peskri choli witsrell lo len trujel.
6 Job taprell ap i phub un koja trissell,
Ninna i barra, hoi hidjrenn lat, trissenn.
7 Rakrell lo soreles ap o kham,
djal o kham gar pre.
Un i bolepangre momelentsa krell lo,
te wenn le gar diklo.
8 Job kokres kras o bolepen buchles pral i phub,
un djal pral o baro pani.
9 Job kras kol bolepangre momlia,
hoi kharenna: Baro Wurdin, Orion, Efta Momelengre,
ninna kol bolepangre ap koi rig, kai o kham pralstunes tardo hi.
10 Job krell sawo baro un sorelo koowa,
te nai haiwah les gar,
sawo bud baro koowa, hoi kek wawar nai krell,
te nai djinah gar, har bud kowa hi.
11 Job djal glan mande dureder,
un me dikom les gar.
Job djal glan mande dureder,
un me haiwom gar, te his lo koi.
12 Te lell lo jekes sorjah krik,
koon kamell les pre te rikrell?
Kek nai penell ap leste: Hoi kreh tu?
13 O Dewel rikrell peskri choli gar pale,
un was sorleder har kolla,
kai wan o baro panjeskro sapeske Rahab ap i rig.
14 Har nai hatsoms me laba,
te nai penap tchomone ap leste?
15 Ninna te wals man tchatches,
nai rakroms tchi ap leste, hoi job mandar putchas.
Me nai mangoms kokres latchepen lestar,
kai miro tchatchepaskro rai hi.
16 Ninna te mukals lo man leha te rakrell,
patsau me gar, te shunals lo ap miro rakepen.
17 Job bitchrell i sorelo phurdepen,
te taprell lo pal mande,
un dell man bud dukepen,
ninna te krom tchi.
18 Job mukell man gar jek kopo ducho te lell,
na-a, job krell man pherdo ropen un duk.
19 Te djoms ap leste sorjah,
job hi o sorleder!
Te kamoms les glan i tchatchepangre te anell,
penals lo: Kones kameh te bitchrell, te anell lo man koi?
20 Ninna te waus an o tchatchepen,
miro rakepen anals i phagi pral mande.
Ninna te wals kek doosh ap mande,
dals lo man i doosh.
21-22 Kek tchilatchepen krom me.
Miro djipen hi mange buder tchi moldo.
Kamau buder gar te djiwell.
Lauter hi mange jek.
Doleske penau me: O Dewel dell koles mulo, kai latcho un tchatcho hi,
un ninna koles, kai tchilatcho hi.
23 Te well i bari bibacht,
un marell menshen ap jek kopo,
palle sal lo pral kowa,
ninna te hi kek doosh ap lende.
24 Job das i phub an o wast i tchilatchendar.
Un kolla, kai o tchatchepen win krenn,
kolen kras lo korelo, te dikenn le tchi.
Te his job kowa gar, koon wawar his kowa?
25 Miro djipen nashell sikeder krik har i naashepaskro.
Hako diwes djal trujel un anas mange kek bacht.
26 Miro djipen nashell jaake sik dureder
har i sik beroa
un har i baro tchirklo, hoi mukell pes tele te perell ap i tikno viecho, te taprell lo les.
27 Te penau mange:
Kamau te bistrap miri tseli duk,
un kamau te krap i wawar mui,
un pale te sanap,
28 palle taprau pale daar i tsele dukendar.
Un djinau, glan o Debleskre jaka hi man doosh.
29 Job kamell i doosh ap mande te dikell.
Hoske marap man palle tchitcheske tele?
30 Ninna te thowoms man gibeha tele,
un mire wasta sapuneha,
31 witsrals lo man an i tchikli cheb,
te wans mire ripja djungeles glan mande.
32 O Dewel hi kek mensho har me hom,
te nai penoms leske i lab pale,
te nai djams khetne pash jekeste,
koon nai krals o tchatchepen mashkral mende win.
33 Kamoms te dals i tchatchepaskro mursh mashkral mende,
koon o pralstuno pral mende dujende hi,
34 te lell kowa o kasht krik, koleha o Dewel man dell,
un man buder gar daar wals!
35 Palle nai rakroms
un man wals kek daar lestar.
Jaake har kanna pash mande hi,
nai krau kowa gar.