8
O biboldengro djipen well pale shukar
1 Ap ko diwes das o baro rai, o Ahasveros, i ranjate Ester ko kheer, hoi his o Hamanes, kai i bibolden kamas te marell. Un i Ester penas o baro rajeske, kai o Mordekai lakro kako hi. Un o baro rai mukas les glan peste te well. 2 Un las peskri gustri, hoi job o Hamanestar krik las, un das lat o Mordekai. Un i Ester tchiwas o Mordekajes pral o Hamaneskro tselo kheer.
3 Un i Ester rakras i wawar kopo o baro rajeha, un witsras pes glan leskre herja tele, un rowas ap leste un mangas lestar, te well ko tchilatchepen gar pral i biboldende, hoi kamas o Haman i menshendar Agag, pral lende te anell.
4 Un o baro rai las peskro sonakaskro raan un sikras leha ap i Ester. Kote stas i Ester pre un was glan leste, 5 un penas: “Miro baro rai, te hi mishto un tchatcho glan tire jaka, un te hal mange latches un dikeh kamles ap mande, palle le kol lila pale, hoi tchinas o Haman, koleskro dad o Hammedata hi dran o kheer Agag, an kolende tchinlo hi, te wenn i bibolde maredo an hako them, kai tu baro rai hal. 6 Har nai dikap me sawi bari bibacht, hoi mire menshenge well? Un har nai wap me kote pashel tardo, te denn le mire tsele menshen mulo, un krau tchi?”
7 Kote penas o baro rai Ahasveros ap i rani Ester un ap o Mordekai, ko biboldo: “Djinenn, o Hamaneskro kheer dom i Esterate, te well lo lakro. Un les mukom ap ko kasht pre te bladell doleske, kai kamas lo i bibolden te marell. 8 Kanna tchinenn tumer i wawar liil, hoi te well i biboldenge, jaake har mishto hi an tumare jaka! Tchinenn ko liil an miro lab un tchiwenn miri gustjah miro sikepen koi pre! I liil, hoi an o lab o baro rajestar tchinlo was un ap koleste leskro sikepen hi, nai well gar pale lino.”
9 Jaake wan kol murshen kharedo, kai o baro rajeskre lila tchinenn. Kowa his an o triinto tchon, – kowa hi o tchon Siwan – ap o biish-te-triinto diwes. Un i lila wan jaake tchinlo, har o Mordekai penas: ap i biboldende, un ap i pralstunende ko themestar, ap i themeskre rajende un i pralstunende pral i tsele themma mank o pani Indus un o pani Nil. Kolla his 127 (jek-sheel-te-biish-te-efta) themma. Un tchinlo was jaake har an hako them tchinlo was, un an o rakepen kol menshendar, kai kote djiwan, un ninna ap i bibolde jaake har jon tchinenn un rakrenn. 10 Un i lila wan tchinlo an o baro rajeskro lab, un leskro sikepen was pre-tchiddo. Un klissepangre ap sik graja anan len kote, kai le bitchedo wan.
11 Un an kol lila his tchinlo: O baro rajeske hi mishto, te wenn i bibolde khetne an hako foro, kai djiwenn le, te kurenn le pengro djipaske, un marenn kolen, kai ap lende djan, ninna lengre tchawen un djuwjen, jaake te atchell lendar kek djido. Un lauter, hoi kolenge his, nai lenn le penge, te well lengro. 12 Un kowa nai krenn le an i tsele themma, kai o Ahasveros baro rai hi, ap o deesh-te-triinto diwes an o deesh-te-duito tchon, – kowa hi o tchon Adar.
13 Un an kol tsele themma hunte wan kal tchinle laba prindjedo kerdo, jaake te djinan i menshe kote, te krenn pen i bibolde soreles ko diweske, te djan le ap kolende, kai kamenn len te marell.
14 Un kol bitchepangre i lilentsa klissan sik win ap o rajeskre graja, jaake har o baro rai penas. Un ko tchinlo lab was ninna an o baro rajeskro kheer an o foro Susa ap i kasht dino, te well lo prindjedo.
15 Un o Mordekai djas win o baro rajestar, rido an rajeskre koola. Kolla his blaueto un parno. Un ap leskro shero his shereskro sonakai. Leskri baja his dran laintikro than un lolo bakrengro bal. Un i menshe an o foro Susa stan un dan gole i bachtjatar.
16 I biboldenge his o djipen pale shukar. Bacht un sapen was ap lende. Un jon wan hadedo un an-diklo. 17 Un an hako them un an hako foro, kai o baro rajeskro lab was, his bacht un sapen pash i biboldende. Un jon kran baro chapen un wan bachteles khetne. Un bud menshe i wawar menshendar lan daar i biboldendar un wan bibolde.