9
I Israelitarja mangenn pen tele glan o Debleste
1 Un ap o 24. (biish-te-starto) diwes an kau tchon wan i Israelitarja khetne, un jon chan tchi un riwan pen an gone un tchiwan tchik ap pengre sherja. 2 Un hakeno, kai i Israelendar hi, mukas kolen, kai gar peskre menshendar hi. Un jon wan glan o Debleste un mangan pen tele, un penan hawi doosh jon un pengre phure ap pende anan. 3 Un jon his hakeno ap peskri platsa tardo, har was glan drawedo dran ko liil, kai sikrell o drom o baro Deblestar, kai lengro Dewel hi. I starto kotar o diwestara was glan drawedo un o starto kotar o diwestar penan le pengri doosh, un witsran pen tele glan o baro Debleste, koles jon an-mangan.
4 Un ap i pralstuni platsa, hoi i Levitarenge his, stas o Jeshua pre, un o Bani, un o Kadmijel, un o Shebanja, un o Bunni, un o Sherebja, un o Bani, un o Kenani. Un jon dan bares gole ap pengro baro Debleste, te well lo ap lengri rig. 5 Un i Levitarja, o Jeshua, un o Kadmijel, un o Bani, un o Hashabneja, un o Sherebja, un o Hodija, un o Shebanja, un o Petachja penan: Stenn pre! Sharenn o baro Debles! Job hi tumaro Dewel. Sharenn les kanna un hako tsireske!
Sharepaskri gili
Baro Dewel, hakeno te sharell tiro railo lab!
Kek wawar lab hi jaake baro un railo har tiro lab.
6 Tu, baro Dewel hal kokres o Dewel!
Tu kral o bolepen un leskre tsele bolepangre momlia,
un i phub un lauter, hoi ap late hi,
ninna o baro pani un lauter, hoi an leste hi.
Un tu kral, te djiwell kowa lauter.
Un i tsele bolepangre an o bolepen witsrenn pen tele glan tute.
7 Tu hal o baro Dewel, o Dewel, kai o Abrames win rodas,
un anal les win dran o foro Ur dran o them Kaldea,
un dal les o lab Abraham.
8 Un har dikal, te rikrell lo pes ap tute peskro tselo djijeha, kral tu leha win un dal tu tiro lab,
te dess leskre tchawende un kolengre tchawende, kai pal lende wenn, ko them, kai djiwenn i Kanaanitarja, un i Hetarja, un i Amorarja, un i Perisarja, un i Jebusarja, un i Girgasharja.
Un tu rikral tiro lab. Tu hal tardo an o tchatchepen.
9 Un tu dikal o pharo djipen mare phurendar an o them Egiptia,
un shunal lengri gole, har his le pash o Baro Lolo Pani.
10 Un tu kral baro sorelo koowa, hoi kek wawar nai krell,
ap o baro rajeste Farao un i pralstunende un i tsele menshende leskro themestar,
har dikal, te rikran le mare phuren tele.
Un jaake kral tiro lab bares, jaake har kowa kau diwes hi.
11 Tu dal o baro pani, jaake te djas lo ap dui rigja krik,
un i drom koi his, kai nai djan tire menshe mashkral ko baro pani ap i wawar rig.
Kolla, kai tire menshe palla lan, tassan un djan tele har barra an o telstuno pani.
12 Un tu sikral len o drom.
Ap o diwes djas i wolka glan lende,
un i rati i jag,
te well len i momeli ap o drom, koles jon hunte djan.
13 Un ap i berga Sinai wal tu tele,
un dran o bolepen rakral tu lentsa.
Un tu penal lenge tchatchepaskre laba, hoi mishto hi,
un sikral len tchatche dromma,
un dal len latche laba, hoi penan lenge, hoi te krenn le.
14 Un tu sikral len, har te rikrenn le o diwes, hoi tuke hi. Kowa hi o Debleskro diwes.
Un an wawar laba, hoi penas lenge o Mose, koles tiro wast his,
sikral tu len, hoi tu lendar kameh
un har nai djan le tire dromma.
15 Un maro dran o bolepen dal tu len, har len bok his.
Un mukal lenge dran o baro bar pani win nashell, har len trush his.
Un tu penal lenge, te djan le koi un lenn o them dren.
Ko them koleske tu tiro wast hadal, un dal tut sowel, te dess len ko them.
16 Un mare phure hadan pen
un djan pal pengro shero,
kran pengre djia har bar,
un shunan gar ap tire laba.
17 Un jon kaman gar te krell, hoi tu lenge penal,
un bistran ko tselo baro koowa, hoi tu lenge kral, hoi kek wawar nai krella.
Jon kran pengre djia pandlo har bar.
Un rodan jekes win, te well lo lengro rai,
un anell len pale an o them Egiptia, an pengro pandepen.
Tu hal i Dewel, kai i doosh krik lell,
un hal kamlo un kreh tiro dji pre i menshenge.
Tu weh gar sik chojedo un tiro latchepen hi baro.
Un tu djal gar lendar.
18 Ninna palle djal tu lendar gar,
har kran jon penge i sonakaskro terno gurumb un penan:
“Kawa hi tumaro Dewel, kai anas tumen win dran o them Egiptia.”
Jaake bud dukran le tut, maro Dewel.
19 Tu mukal len gar kokres,
kote an o mulo them.
Jaake baro his tiro kamlepen lenge.
Koi bari wolka atchas ap o diwes, te sikrell li o drom, koles jon hunte djan.
Un i jag atchas an i rat, te well len i momeli ap o drom, koles jon djan.
20 An tiro latchepen penal lenge, hoi te krenn le.
Un tiro maro dran o bolepenc dal len chapaske,
ninna pani, har len trush his.
21 Star-desha bersha dal len lauter, hoi len hunte his o djipaske.
Lengre koola djan gar paash, lengre pire wan gar pesso.
22 Un dal rajengre themma un wawar menshen an lengre wasta;
jek them pal o wawar dal tu len.
Jaake lan le o them Heshbon dren, kai o Sihon o baro rai his,
ninna o them Bashan, kai o Og o baro rai his.
23 Un lengre tchawen mukal tu budeder te well har i momlia an o bolepen,
un anal len an ko them, kolestar tu ap lengre phurende penal,
te djan le koi un lenn ko them dren.
24 Un i tchawe wan an ko them un lan les dren.
Un tu kral len sorleder har i Kanaanitarja, kolla, kai an ko them djiwan,
un dal lengre bare rajen un ninna i menshen an lengro wast,
un jon nai kran lentsa, hoi jon kaman.
25 Jon lan sorele forja dren,
un i latcho them,
khera, hoi pherdo latcho koowa his,
pani, hoi dran wi-dine bare barra was,
drakengre ruka, djeteskre ruka, un bud wawar ruka, hoi latcho chapen hidjran.
Un jon chan un wan tchalo un thullo.
Un jon mukan les penge latches te djal.
Jaake baro his tiro latchepen ap lende.
26 Un pale shunan le gar buder ap tute,
un hadan pen pral tute,
un kaman buder gar tiro drom te djal.
Un jon dan tire rakepangren mulo, kolla kai len trad dan, te anenn le len pale pale pash tute.
27 Doleske dal tu len an o wast kolendar, kai lenge i pharo djipen kran.
Un har len bari daar his, dan le gole ap tute.
Un tu shunal len dran o bolepen, un kral tiro dji lenge pre,
un bitchral lenge murshen, kai len win lan dran i tchilatche wasta.
28 Un har lenge pale mishto djas, kran le pale, hoi tchilatcho his glan tute.
Un tu dal len an o wast kolendar, kai lenge tchilatchepen kaman.
Un kolla wan i raja pral lende.
Un jon dan pale gole ap tute, te wess ap lengri rig.
Un tu shunal dran o bolepen,
un an tiro baro latchepen lal len win dran lengre wasta.
te aness len pale pale ap tiro drom.
Jon his pre-phurdo un shunan gar ap tire laba,
un djiwan gar pal tire tchatchepaskre laba,
kolendar tu penal: Koon len rikrell, djiwell.
Un jon sikran tuke pengro dumo,
un pandan pengre djia,
un shunan gar ap tute.
30 Un tut his jaake bud latchepen lenge kol tsele bersha.
Un dal len trad kol labentsa, hoi tire rakepangre lenge penan,
kai an lende tiro ducho hi.
Jon shunan gar koi pre.
Kote dal len tu an o wast kol menshendar dran wawar themma.
31 An tiro baro latchepen dal len gar mulo,
un mukal len gar.
I latcho Dewel hal,
un tut hi i baro dji.
32 Maro Dewel, har baro hal tu,
jaake sorelo, te daras mer tutar.
Tu pandal tiro dji ap mende,
un rikreh tiro lab, hoi dal tut sowel.
Kanna mangah tut, ma biste koi tseli bibacht, hoi pral mende was,
pral mare bare rajende un mare pralstunende,
pral i rashajende un o Debleskre rakepangre,
pral mare phurende un men lauterende,
an ko tselo tsiro, har wan i bare raja dran o them Assur pral mende bis ap kau diwes.
33 Tu hal an o tchatchepen tardo, har anal kowa lauter pral mende.
Kowa, hoi tu kral, his mishto,
ninna te djiwam mer jaake, har te wals men kek Dewel.
34 Mare bare raja un pralstune, mare rashaja un phure,
kolla djan gar ap tiro drom,
un shunan gar tire laba, hoi sikrenn, har te djiwenn le.
35 Un an ko tsiro, har his mare phure i raja an ko them, hoi tu len dal,
mangan le tut gar an.
An tiro latchepen dal tu len i buchlo un brawelo them.
Un jon mukan gar pengro tchilatcho drom.
36 Dik, men hi kau diwes raja pral mende;
an ko them, hoi tu mare phuren dal, te chan le ko tselo latcho koowa,
an kau them hi men wawar raja pral mende.
37 Un ko bud koowa, hoi i phub win anell,
lenn kol bare raja,
kolla kai tu pral mende tchiwal,
har anam doosh ap mende.
Un jon krenn mentsa un mare viechentsa har jon kamenn.
Un maro djipen hi jaake pharo.