6
Tchilatche menshe kamenn o Nehemeske barra an o drom te tchiwell
1 O Sanballat un o Tobija un o Geshem, ko Arabari, un kol tsele wawar, kai menge tchilatchepen kaman, kolla shunan, kai his i massuri kerdo, un kek kotar pral atchas, kai barra wi-phagedo his. An ko tsiro his kokres i wudja gomme gar dren. 2 Kote bitchras o Sanballat un o Geshem murshen pash mande, un mukan mange te penell: “Ab pash mende an o gab Kefirim an o telstuno them pash o foro Ono!”
Len his glan, te krenn le mange tchilatchepen. 3 Un me bitchrom lenge bitchepangre pale, un mukom lenge te penell: “Me krau kate i bari budi, un me nai wau gar tele. Te mukoms kate lauter tchiddo un woms tele pash tumende, nai wals jaake, te djals koi budi gar dureder.”
4 Star kope bitchran le murshen pash mande kol labentsa. Un star kope penom lenge kal emlige laba pale. 5 Kote bitchras o Sanballat o pantchto kopo peskro bitchepaskres pash mande un das les i liil peha, hoi gar pandlo his. 6 An koleste his tchinlo:
Mank i tsele menshende djal o rakepen trujel, un o Geshem penell les ninna: Tut hi glan, te hadess tut khetne i biboldentsa pral mende! Doleske tchiweh tu i massuri pale pre. Un pal kowa, hoi rakedo well, kameh tu lengro baro rai te well, 7 un mukal Debleskre rakepangre pash tute gole te dell, kai glan tute win kharenn an o foro Jerusalem, te hal tu o baro rai pral o them Juda. Djiness, kowa well ninna o baro rajeske penlo. Jaake ab pash mande, te rakras mer khetne pral lauter, hoi hunte kras!
8 Kote mukom leske te penell: “Tchi kolestar, hoi tu kai rakreh, hi tchatcho. Dran tiro dji well kawa lauter!”
9 Jon lauter kaman menge daar te krell, te budras gar dureder, te well i massuri gar kerdo. Doleske krom mire wasta sorleder.
10 Un me wom an o kheer, kai o Shemaja djiwas, koleskro dad o Delaja his, un koleskro dad o Mehetabel his. O Shemaja nai djas gar dran peskro kheer win, un penas mange: “Me un tu hunte was khetne an o Debleskro kheer un hunte pandas men dren an i palstuni isema. Jon wenna, te denn le tut temerl. Rati wenn le, te denn le tut temerl.”
11 Me penom: “I mursh, har me hom, nashell gar krik. Patseh, te djoms an o Debleskro kheer, te atchap djido? Me djau gar dren!”
12 Me haiwom, koles bitchras gar o Dewel! His o Tobija un o Sanballat, kai dan les lowe, te penell job sau koowa mange, 13 te darap man un krap kowa un anap jaake doosh ap mande. Palle wals len doha, hoi le pal mande nai rakrans, un nai praassans man koleha!
14 Miro Dewel, biste kowa lenge gar, hoi o Tobija un o Sanballat kran, un ninna hoi i Noadja an o Debleskro lab pral mande win rakras, un kol tsele wawar, kai kran, har te rakrans le Debleskre laba win, un kaman mange daar te krell.
I tseli budi ap i massuri hi kerdo
15 Un ap o biish-te-pantchto diwes an o tchon Elul his lauter ap i massuri kerdo. Paash-sheel-te-dui diwessa djas koi tseli budi. 16 Har shunan kowa kolla lauter, kai menge tchilatchepen kaman, trashan i menshe an i tsele themma, hoi trul mende hi. Un lengro pre-phurdepen djas krik. Un jon haiwan, te his maro Dewel pal koi budi tardo.
17 An kol diwessa tchinan bud pralstune dran Juda lila ap o Tobija, un lila lestar djan ap lende. 18 An o them Juda his bud, kai pen sowel dan, te rikrenn le pash leste. O dad leskri romjatar his o Shechanja, koleskro dad o Arach his. Un leskro tchawo, o Johanan, romedineras i tchat fun o Meshullam, koleskro dad o Berechja his. 19 Un jon rakran glan mande pral ko tselo latchepen, hoi job lauter kras. Un penan leske, hoi me penom. Un o Tobija bitchras mange lila, kolentsa job kamas mange daar te krell.