2
O baro rai mukell o Nehemias an o foro Jerusalem te djal
1 Un an ko tsiro, har his o Artaxerxes an o biishto bersh o baro rai, an o tchon Nisan, homs glan leste tardo. Pash o chapen lom me i mool un dom lat o baro rajeste. Mange his ropaske. Glan kowa dikas lo kek tsireske, kai miro dji rowas. 2 Jaake putchas lo mandar: “Hoske dikau duk an tiro mui? Hal tu nasselo? Na-a, kowa hi kowa gar. Kowa hi tiro dji, hoi rowell.”
I bari daar tapras man. 3 Un me penom ap o rajeste: “Baro rai, te djiwess hako tsireske! Har nai well mange gar ropaske? Ko foro, kai mire phure paskedo hi, hi paash kerdo. Un leskre bare wudja hi pre chatchedo.”
4 Un o baro rai putchas: “Hoi kameh tu?”
Kote rakrom o Debleha an o bolepen, 5 un penom palle ap o baro rajeste: “Te hi mishto an tire jaka, miro rai, un te dikeh latches ap mande, palle bitche man an o them Juda, an ko foro, kai mire phure paskedo hi, te tchiwau ko foro pale pre.”
6 Kote putchas o baro rai mandar, un leskri romni, i rajetsa, his pash leste beshdo: “Har rah atcheh krik? Un kaana weh pale?”
Un har o baro rajeske mishto his, te bitchrell lo man, penom leske jek tsiro.
7 Un me penom ap leste: “Miro rai, te hi tuke mishto, palle de man lila mantsa i rajenge pral ko them pal o pani Eufrat, jaake te hunte mukenn le man wergel te djal, bis te wom an o them Juda. 8 Un muk ninna i liil te tchinell ap o Asaf, ko pralstuno pral o rajeskre wesha, te dell lo man kasht, te nai krap wudja o sorelo khereske, hoi pash o Debleskro kheer tardo hi, un ninna kasht, te tchiwap i massuri trul o foro pale pre, un kasht ko khereske, an koleste me palle djiwau.”
Un o baro rai das kowa lauter. Miro Debleskro latcho wast his mantsa.
9 Un o baro rai bitchras ninna pralstune lurden un murshen ap graja mantsa. Un me wom pash kol themeskre rajende, kai ap i wawar rig ko lengsto panjestar Eufrat his, un dom len o baro rajeskre lila. 10 Un har shunan kowa o Sanballat, ko Horonari, un leskro budepaskro, ko Ammonari o Tobija, wan le an bari choli, te was jek, kai kamas i Israelenge latchepen te krell.
O Nehemia dikell pal, kai o foreskri massuri dren phagedo hi
11 Un me wom an o foro Jerusalem. Un pal triin diwessa 12 krom man rati pre, lom dui, triin murshen mantsa, un penom kek mensheske, hoi miro Dewel mange an o dji tchiwas, te krap me o foreske Jerusalem. Un his kek grai pash mande, har ko jek ap koleste me klissom.
13 Jaake djom rati dran o Telstuno Wudar win, un dureder glan wergel ko pani, hoi kharell Sapeskro Pani, un kotar dureder bis pash o Viechengro Fuleskro Wudar. Un me dikom mange mishto an, kai o foreskre massurja dren phagedo hi un kol wudja pre-chatchedo wan. 14 Un me klissom dureder pash o Djido Panjeskro Wudar un pash o rajeskro pani. Un har wom miro viecheha kote gar budeder dureder, 15 klissom i kotar dureder an o telstuno panjeskro them, un dikom mange mishto ko massuri kote an. Palle rissrom man un wom pale pash o Telstuno Wudar, kai glan i tsiro dren djom.
16 Un i tchatchepangre mursha an o foro haiwan tchi kolestar, kai me homs un hoi me krom. Tchi penom i biboldenge, witar gar i rashajenge, i pralstunenge, i tchatchepangre murshenge un kek wawarenge, kai pash koi budi hoi man glan his, pashel hunte wenn.
17 Kanna penom ap lende: “Tumer dikenn kai bibacht, an kalate mer ham: o tselo foro Jerusalem hi paash dino koi tchiddo. Un leskre wudja hi tele chatchedo. Awenn, te tchiwas mer i massurja trul o foro Jerusalem pale pre, jaake te nai praassenn le men gar buder.”
18 Un me penom lenge ninna, har latches miro Dewel ap miri rig was, un hoi o baro rai Artaxerxes ap mande penas. Kote penan le: “Awenn, kras men ap i budi, te tchiwas lauter pale pre!”
Un jon kran jek o wawareske i wasta soreles, te krenn le koi latchi budi.
19 Kote his ninna mursha, kai praassan men un san pral mende, har shunan le kowa. Jon his o Sanballat, ko Horonari, un leskro budepaskro, o Tobija, ko Ammonari, un o Geshem, ko Arabari. Kolla penan: “Hoi hi kowa, hoi kote krenn? Kamenn tumer o baro rajestar tele te perell?”
20 Kote penom me ap lende: “O Dewel an o bolepen, job krell, te djal menge kawa mishto. Un mer, leskre budepangre, kram men ap i budi, te tchiwas o foro pale pre. Tumen hi kek tchatchepen ap ko foro, witar kek penepaske. Un tumare laba hi gar mank kolende, kai wenn gar bistedo.”