4
I budi ap o Debleskro kheer nai djal gar dureder
1 I wawar menshe an o them, kolla, kai kaman gar i bibolden dran i khera Juda un Benjamin, jon shunan, te krenn kolla, kai wan pale pale dran o them Babilonia, i newo kheer o baro Debleske, kai o Israeleskro Dewel hi. 2 Koi djan le pash o Serubbabel un pash i familjengre pralstunende un penan: “Mer kamah tumentsa o Debleske i kheer te krell. Mer mangah ninna tumaro Debles an, un maram leske viechen, jaake rah har o baro rai pral o them Assur, o Asarhaddon, men halauter kate an kau them mukas te anell.”
3 Kote penan lenge o Serubbabel un o Jeshua un i familjengre pralstune: “Kowa hi gar mishto, te krenn tumer un mer khetne o Debleskro kheer. Mer kokres kamah o kheer te krell o baro Debleske, kai o Israeleskro Dewel hi. Kowa penas menge jaake o baro rai pral o them Persia, o Kirus.”
4 Kote kran kol wawar menshe, kai djiwan ninna an o them, i biboldenge o djipen phares. Un jon kaman len daar te krell, te budrenn le buder gar dureder ap o Debleskro kheer. 5 Un jon dan kolende lowe, kai budran o baro rajeske, te rikrenn jon kowa pre, hoi i bibolde penge glan lan. Kowa kran le jaake rah, har o Kirus o baro rai pral o them Persia his, un gomme an ko tsiro, kai o Darius o baro rai pral o them Persia his.
6 Un har o Ahasveros baro rai was, an leskro ersto bersh, tchinan le i fullo liil pral i menshende dran o them Juda un Jerusalem.
7 Un an ko tsiro, har o Artaxerxes o baro rai his, tchinan o Bishlam, o Mitredat, o Tabeel un lengre mala i tchilatcho liil o rajeske pral o them Persia. Ko liil his tchinlo an o aramtikro tchinepen un an o aramtikro rakepen. 8 Ninna o pralstuno Rehum un o Shimshai, kai haiwas lila te tchinell, kolla dui tchinan i fullo liil pral Jerusalem, un bitchran les pash o baro rajeste Artaxerxes. An ko liil his tardo: 9 Mer, o pralstuno Rehum un o tchinepaskro, o Shimshai, un kolla wawar halauter, i tchatchepangre mursha, i bare lurde, i tchinepangre, un i wawar pralstune, un i mursha dran Erech, dran Babilon, un dran Susa, kolla hi i Elamarja, 10 mer tchinah kau liil khetne i menshentsa dran kol wawar themma, kolen o baro un sorelo Asenappara an kau them mukas te anell, te djiwenn le an o foro Samaria un an i wawar forja ap i wawar rig o panjestar Eufrat. 11 Un kal laba his tardo an ko liil:
Ap o baro rajeste Artaxerxes, i murshendar ap i wawar rig o panjestar Eufrat. Mer ham tire budepangre, 12 un kamah tuke te penell, kai i bibolde, kolla kai dran tiro them kai pral pash mende wan, kolla hi kanna an o foro Jerusalem un kamenn ko foro pale pre te tchiwell, ko foro, kolestar i menshe jaake diwjo un tchilatcho hi. Jon tchiwenn bar ap bar, te wenn i massurja ko forestar kerdo. I telstune barra hi pale newes tchiddo.
13 Mer halauter hunte penas o baro rajeske: Kau foro te well newes kerdo, un i massurja hi pale tardo, denn i menshe buder kek themeskre lowe, witar kek foreskre lowe, un wawar koowa witar gar. Kek lowe wenn kolendar pash maro rajeste. 14 Mer halauter rikrah pash o baro rajeste un chah o loon dran leskro kheer, un mer kamah gar te dikell, har well ladj ap o baro rajeste anlo. Doleske bitchrah leske kau liil. 15 Muk pal te dikell an i familjakre lila tire phurendar, palle hatseh un dikeh, kai kau foro pes pre hadas, un pral wawar rajende un themma doosh anas. Ninna an i phure tsirja hadan pen i menshe an kau foro pre. Doleske was kau foro ninna khetne maredo, un kek bar atchas ap o wawar. 16 Un kanna penah mer o baro rajeske, kai job buder tchi an peskro wast nai rikrella, hoi ap i wawar rig o panjestar Eufrat tchiddo hi, te well kau foro pale newes kerdo, un i massurja pale pre-tchiddo wenn.
17 Koi bitchras lenge o rai pral o them Babilonia kau liil un mukas lenge te penell:
Tuke Rehum, ko pralstuneske un tuke Shimshai, ko tchinepaskro, un tumenge wawarenge halauterenge an o foro Samaria un kol wawarenge halauterenge ap i wawar rig o panjestar Eufrat: Bacht tumentsa!
18 Un kanna kamau tumenge te penell: Ko liil, kai tumer mange tchinan, was mange lab pal lab glan drawedo. 19 Un har me les penom, was pal diklo, un halauter hi tchatchepen, hoi tumer mange tchinan, kai hadas pes ko foro pale te pale an o phuro tsiro un anas tchingepen i tsele rajenge, un peras tele lengre rajentsa. 20 Ninna his sorele bare raja an o foro Jerusalem, kai his i raja pral halauter, hoi ap i wawar rig o panjestar Eufrat djiwella, jaake kai was lenge hunte themeskre lowe dino, ninna foreskre lowe un wawar koowa. 21 Doleske kamau, te penenn tumer kol menshenge soreles, te nai budrenn le gar dureder, te nai well ko foro gar pale pre-tchiddo, jaake rah bis te me penau i wawar lab! 22 Denn jak, te krenn kowa sik, te well kek doosh pral maro them, un te nashrap kek lowe.
23 Un ko liil o baro rajestar Artaxerxes was drawedo glan o Rehum un ko tchinepaskro, o Shimshai, un glan kol tsele wawar murshende, kai pash lende his. Koi djan le sik an o foro Jerusalem pash i bibolde, un rikran len sorjah pengri budjatar pale, jaake te nai budran le buder gar dureder. 24 Kote atchas i budi ap o Debleskro kheer an o foro Jerusalem tardo. Un kowa atchas jaake bis o rai Darius an o duito bersh o baro rai his pral o them Persiab.