17
O Josafat hi i baro latcho rai pral o them Juda
1 Un leskro tchawo, o Josafat, was o baro rai pal leste. Job sikras pes soreles pral o Israel. 2 Job tchiwas lurden an i tsele sorele forja an o them Juda, un tchiwas pralstune murshen dren an o them Juda, ninna an o them Efrajim, an kol forja, kai leskro dad, o Asa, dren las.
3 Un o Josafat djas ap o Debleskro drom har glan leste leskro phuro dad, o David. Un nashas gar i mule deblenge palla, hoi kharenn ‘Baal’. Doleske his o baro Dewel pash leste. 4 O Josafat rodas o Debles peskre phurendar, un djiwas pal o Debleskre laba, – un gar jaake har i bare raja pral Israel djiwan. 5 Doleske kras o baro Dewel, te was o Josafat i sorelo baro rai. Un dran o tselo them Juda wan i menshe, un dan les kutch koowa. Jaake was les baro brawlepen, un job his bares an-diklo. 6 Un leskro dji was sorelo un sorleder, har djas lo ap o baro Debleskro drom, un jaake mukas lo an o tselo them Juda kol mulne platsea, kai i mule debla an-mangedo wan, paash te krell, ninna i figuren, hoi sikran i debletsa Ashera.
7 Har o Josafat an o triinto bersh o baro rai his, bitchras lo pralstune murshen, o Ben-Hajil, o Obadja, o Secharja, o Netanel un o Mikaja, pash i menshende an i forja an o them Juda, te sikrenn le lende o Debleskro drom. 8 Un lentsa djan o Shemaja, o Netanja, o Sebadja, o Asahel, o Semiramot, o Jonatan, o Adonija, o Tobija un o Tob-Adonija. Kolla his Levitarja. Un ninna i rashaja, o Elishama un o Joram, djan lentsa. 9 Un jon penan i menshenge an o tselo them Juda, har te djan le ap o Debleskro drom. Len his o baro Debleskro liil, kai dren tchinlo hi, har te djiwenn le, pash pende. Un djan trujel an i tsele forja an o them Juda, un sikran i menshende o Debleskro drom.
10 Ap i tsele themma, hoi trul o them Juda tchiddo his, mukas o baro Dewel i traash te well, jaake te djas kek an o kurepen o rajeha Josafat. 11 Ninna mank i Filistarja his sawe, kai anan leske kutch koowa, un ko rup, hoi job lendar mangas. Un ninna i Arabarja anan leske 7.700 (efta-serja-efta-sheel) mursh bakre un 7.700 mursh busja.
12 Un o Josafat was baro un bareder. Un kras an o them Juda sorele lurdengre khera, ninna forja kai djobengre khera dren his. 13 Un ninna an i wawar forja an o them Juda his bud chapen. Un sorele kurepangre his les an o foro Jerusalem. 14 Kolla his jaake khetne lino, har wan le dran pengre familje:
I pralstune dran o them Juda:
o glanstuno his o Adna, tel leste his 300.000 lurde;
15 ko duito his o Johanan, tel leste his 280.000 lurde;
16 ko triinto his o Amasja, koleskro dad o Sichri his; job kamas dran peste kokres an i budi o baro Debleske te well, un tel leste his 200.000 lurde.
17 I pralstune dran o them Benjamin his:
o Eljada, kowa his i sorelo kurepaskro, un tel leste his 200.000 lurde; kolen his boge un shilte;
18 o Josabad un tel leste his 180.000 kurepangre.
19 Kolla halauter his o baro rajeske an Jerusalem koi. Koi pashel his kol mursha, kolen o baro rai tchiwas an i wawar forja an o them Juda.