13
O Abija hi o baro rai pral o them Juda
1 An o 18. (deesh-te-ochtato) bersh, har o Jerobeam o baro rai pral Israel his, was o Abija o baro rai pral Juda. 2 Triin bersha his lo baro rai an o foro Jerusalem. Leskri dai his i Mikaja, kolakro dad his o Urijel dran o foro Gibea. An ko tsiro his kurepen mashkral o Abija un o Jerobeam. 3 Un o Abija las 400.000 wi-rodede lurden peha. O Jerobeam las peske 800.000 wi-rodede lurden khetne, te kurell lo pes leha.
4 Un o Abija stas ap i berga Zemarajim an i bergetikro them Efrajim un das gole ap o Jerobeam un i tsele Israelitarja: 5 “Djinenn tumer gar, kai kras o baro Dewel, kai o Israeleskro Dewel hi, o Davideha win, te well hako tsiro jek leskre tchawendar o rai pral Israel? Koi sowel hoi das lo pes, nai well an kek tsiro phagedoa. 6 O Jerobeam, koleskro dad o Nebat his, ko budepaskro o Salomestar, job hadas pes pral peskro rajeste, o Davideskro tchaweste. 7 Un leske ap i rig wan tchi-molde, tchilatche mursha, un jon wan sorleder har o Rehabeam, o Salomeskro tchawo; an ko tsiro his o Rehabeam terno, un leskro dji his gar sorelo. Jaake nai rikras lo pes gar soreles glan lende.
8 Un kanna patsenn tumer, te han sorleder har ko them, pral koleste o baro Dewel o Davideskre tchawen tchiwas, te wenn le bare raja. Bud han, ko dikau, un pash tumende hi tumare sonakangre terne grumja, hoi o Jerobeam tumenge das, te wenn le tumare debla. 9 Tumer tradan i rashajen o baro Deblestar – kolla hi o Aroneskre tchawe, – ninna i Levitarjen dran tumende krik, un kran tumenge newe rashaja, har krenn i menshe an wawar themma. Hakeno, kai was, un les his hi terni mursh grumni un efta bakre pash peste, kowa nai was i rashai tumare figurenge, kai kek dewel hi.
10 Mer djinah, o baro Dewel hi maro Dewel; les mukam mer gar; mare rashaja, kai leske budrenn, wenn o rashajestar o Aronestar, un i Levitarja wenn lenge ap i rig. 11 Haki taissarla un haki rat chatchrenn le viechen o baro Debleske, un koi pashel latcho sungepaskro koowa, un tchiwenn leske mare ap i chapaskri dran djudjo sonakai. Un haki rati chatchenn le i momlia an ap koi sonakaskri momelengri. Jaake rikrah men ap o baro Debleskre laba. Maro Dewel hi lo, koles tumer mukan. 12 Dikenn, mentsa hi o Dewel un djal glan mende. Ninna leskre rashaja hi kate, te phurdenn le an i phurdepangre un denn men o sikepen, te djas mer an o kurepen tumentsa. Tumer Israelitarja, ma kurenn tumen o baro Debleha, kai o Dewel tumare phurendar hi! Tumenge djal kowa gar mishto win!”
13 Un o Jerobeam bitchras peskre lurdendar an i khatepen pal i lurdende dran Juda, te nai perenn le lenge an o dumo. Jaake his le glan kolende dran Juda tardo un ninna pal lende. 14 Un har i lurde dran Juda pen trujel rissran, dikan le, kol Israelitarja his glan lende un ninna pal lende. Kote dan le ap o baro Debleste gole, un i rashaja phurdan an i phurdepangre. 15 Un i mursha dran Juda dan i bari kurepaskri gole. Un har jon gole dan, das o Dewel o Jerobeames un i tsele lurden dran Israel, te hunte tserdan le pen pale glan o Abija un leskre lurdende dran Juda. 16 Un i Israelitarja nashan penge glan i lurdende dran Juda, un o Dewel das len an lengro wast. 17 Jaake was, kai o Abija un leskre lurde kol wawaren soreles dan. Lendar atchan 500.000 (pantch-sheel-serja) wi-rodede lurde mules tchiddo. 18 Jaake wan i mursha dran Israel phagedo, un i mursha dran o them Juda wan i sorleder doleske kai rikran jon pen ap o baro Debleste, koles lengre phure an-mangan.
19 Un o Abija las o Jerobeames palla, un las leske forja krik: Betel un kol gaba koi trujel, Jeshana un kol gaba koi trujel, un Efron un kol gaba koi trujel. 20 Jaake rah, har o Abija djiwas, nai las o Jerobeam peskri rajeskri soor buder gar pale. Un o baro Dewel das les, un jaake meras lo.
21 Un o Abija was i sorelo rai. Un job las peske 14 (deesh-te-star) romja, un leske wan 22 (biish-te-dui) mursh tchawe boldo un 16 (deesh-te-shob) tcha.
22 Kowa, hoi budeder pral o Abija penepaske hi – kowa, hoi job kras un rakras – kowa hi tchinlo an o liil, hoi o Debleskro rakepaskro, o Iddo, tchinas.
23 Un o Abija meras un was paskedo an o Davideskro foro. Un leskro tchawo, o Asa was baro rai pal leste. An koleskro tsiro his kek kurepen an o them deesh bersha.