12
I Egiptarja wenn an o them Juda
1 Har his o Rehabeam soreles ap peskri rajeskri beshepaskri beshdo, un i sorelo baro rai his, mukas lo o baro Debleskro drom. Un i tsele Israelitarja kran kowa leske palla. 2 Har o Rehabeam an o pantchto bersh o baro rai his, was o Shishak, ko baro rai pral o them Egiptia, peskre lurdentsa, te lell lo o foro Jerusalem dren. Kowa was pral i Israelitarja doleske, kai djan le o baro Debleskro dromestar tele. 3 Pash o Shishak his 1.200 (jek-sero-dui-sheel) kurepangre wurdja un 60.000 (shob-deesh-serja) klissepangre. Un kol lurde, kai khetne leha wan dran o them Egiptia, his jaake bud, te hatsas kek win, kitse jon hi. Kolla his Libjarja, Sukkijarja un sawe dran o them Kusha. 4 Un job las kol tsele sorele forja dren, kai an o them Juda his, un was bis glan o foro Jerusalem.
5 Un o Debleskro rakepaskro, o Shemaja was pash o Rehabeam un pash kol pralstunende pral o them Juda. Kolla wan halauter khetne an o foro Jerusalem, har shunan le, kai well o Shishak. Un o Shemaja penas ap lende: “Kawa penell o baro Dewel: Tumer mukan man; doleske mukom me tumen ninna, un dom tumen an o wast o rajestar Shishak.” 6 Har shunan kol pralstune un o baro rai kal laba, khaitas len ko tchilatchepen, hoi le kran, un penan: “O baro Dewel hi an o tchatchepen.”
7 Har o baro Dewel dikas, kai khaitell len, hoi le kran, penas lo ap o Shemaja: “Len khaitell, kai mukan le man. Doleske mukau len gar te marell. An i tikno tsiro lau len win dran lengri bibacht. Me mukau miri choli gar jaake pral o foro Jerusalem te well, te krap, te dell o Shishak peskre lurdentsa i menshen an o foro mulo. 8 Tel leskro wast hunte atchenn le, te haiwenn le, har kowa hi, te hi i wawar them o rai pral lende un gar me.”
9 Un o Shishak, ko baro rai dran Egiptia, was an Jerusalem, un las ko tselo brawlepen dran o baro Debleskro kheer un dran o baro rajeskro kheer, halauter las lo peha. Ninna las lo kol sonakangre shilte peha, kolla, kai mukas o Salomo te krell. 10 Doleske mukas o baro rai Rehabeam peske shilte te krell dran lolo saster, un das len i pralstunende pral kol lurdende, kai dan garda pash o baro wudar glan leskro kheer. 11 Un hako kopo, kai djas o baro rai an o baro Debleskro kheer, wan i lurde un hidjran kal shilte. Un palle anan le len pale pale an lengri isema. 12 Un har khaitas o Rehabeameske kowa, hoi lo kras, djas i choli o baro Deblestar lestar krik. Un job un leskri familja wan gar maredo. Ninna his an o them Juda gar halauter tchilatcho.
O djipen un o merepen o baro rajestar Rehabeam
13 Un o Rehabeam was pale i sorelo rai an o foro Jerusalem, un atchas o baro rai pral o them Juda. Leskri dai his i Naama, dran o them Ammon.
Har was lo baro rai, his lo 41 (star-deesh-te-jek) bersha. Un 17 (deesh-te-efta) bersha his lo baro rai, un djiwas an ko tsiro an o foro Jerusalem, ko foro, hoi rodas pes o baro Dewel win dran i tsele forja an Israel, te well lo kote an-mangedo. 14 Un o Rehabeam kras, hoi tchilatcho his, un putchas gar pal kowa, hoi o baro Dewel kamas.
15 Ko tselo wawar koowa, hoi pral o Rehabeam penepaske hi, kowa hi tchinlo an o liil, hoi tchinan o Debleskro rakepaskro, o Shemaja un o dikepaskro, o Iddo. Kau liil hi tchinlo har i familjakro liil. Mashkral o Rehabeam un o Jerobeam his kurepen jaake rah har jon djiwan. 16 Un o Rehabeam meras un was paskedo an o Davideskro foro. Un leskro tchawo, o Abija, was o baro rai pal leste.