28
O Davideskro rakepen ap i pralstunende
1 O David mukas i tsele pralstunen khetne gole te dell an o foro Jerusalem: Kolla his:
i pralstune pral i deesh-te-dui bare familjende,
i pralstune pral i lurdende, kai his khetne lino, te wenn le jek tchon an o bersh o baro rajeske koi,
i pralstune pral jek sero lurdende un kolla pral jek sheel lurdende,
kol mursha, kai dan jak ap o brawlepen un ap i viechende o baro rajestar un leskre tchawendar,
i pralstune pral o baro rajeskro kheer,
i sorele kurepangre,
un i tsele an-dikle mursha.
2 Un o baro rai David stas pre un penas: “Mire phrala, murshale mire menshendar, shunenn, hoi penau tumenge! An miro dji his, te krap i kheer, kai well o mochton o deesh labentsa o baro Deblestar dren tchiddo, un kai nai atchell o mochton. Kowa hi har i tikno banko tel i pire maro Deblestar. Un me lom bud koowa khetne kau khereske, hoi kamom pre te tchiwell. 3 Koi mukas o Dewel mange te penell: ‘Tu hal i kurepaskro un maral menshen. Doleske hal gar tu, kai krell mange i kheer.’
4 Kanna hi jaake, te rodas man o baro Dewel win dran miro dadeskro tselo kheer. Job, o Israeleskro Dewel kamas, te wap me o rai pral Israel hako tsireske. Job rodas o Juda win, te well lo o pralstuno pral peskre phralende. Un dran o kheer Juda rodas lo miro dadeskro kheer win. Un miro dadeskre tchawendar hom me, ap koleste job latches dikas, te krell lo man rai pral o tselo Israel. 5 Un o baro Dewel das man bud tchawe. Mank lende rodas job miro tchawes, o Salomo win. Koleste das o baro Dewel peskro tchatcho wast, te well job baro rai pral Israel. 6 Un ap mande penas lo: ‘Tiro tchawo, o Salomo, krell mange i kheer un platse koi glan. Les rodom mange win, te well job miro tchawo, un me wau leskro dad. 7 Te djiwell lo pal mire laba un miro tchatchepen, jaake har lo kanna krell, krau me, te well hako tsiro jek leskre tchawendar, kai pal leste wenna, o baro rai.’
8 Kanna penau tumenge glan i jaka i tsele Israelendar – jon hi o baro Debleskro kheer – un glan i kanda maro Deblestar: Rikrenn tumen ap i tsele laba tumaro baro Deblestar, un djiwenn koi pal! Palle nai atchenn tumer an kau latcho them, un nai denn les dureder ap tumare tchawende, kai pal tumende wenna, hake tsirenge.
9 Un tu, miro tchawo Salomo, pats ap o Debleste tiro dadestar, te well job tiro Dewel. Kre tiro tselo djijeha, hoi lo tuke penell! Job dikell an i menshengre djia, un haiwell, hoi an lengre sherja trujel djal. Te rodeh les, hatseh les. Te mukeh les, tchiwell lo tut pale hako tsireske. 10 Doleske de tut jak, o baro Dewel rodas tut win, te kress i kheer leske. Ab sorelo, un kre tut ap i budi!”
I liil, hoi sikrell har o Debleskro kheer kerdo hunte well
11 Un o David das peskro tchawes, o Salomo, i liil, kai pre tardo hi, har te krell lo o Debleskro baro kheer: o wudareskri isema, kol glanstune halle, kol iseme, kai tchomone pre garedo well, kol pralstune iseme, ninna kol iseme, kai dren hi, un koi isema, kai o mochton o Debleskre deesh labentsa dren well. 12 Koi pashel das o David les kol lila, kai pre tchinlo hi, hoi leske an o shero trujel djas, har ko wawar koowa win dikell: kol glanstune platse un kol iseme, hoi trul o kheer wenn, kai well o brawlepen pre garedo, un ko kutch koowa, hoi i menshe o Debleske denna. 13 Ninna das o David o Salomes kol lila, kai tchinlo hi, hawe rashaja un hawe Levitarja khetne budrenn an o baro Debleskro kheer, un hawi budi jon krenn, un hawe tchare, pirja un khore hunte kerdo wenn kai budjake.
14 Un job penas har bud sonakai, rup un saster jon hunte lenn hakeneske lendar, 15 un har pharo hake sonakangre momelengre un lengre momlia hunte wenn, ninna har pharo hake rupene momelengre un lengre momlia hunte wenn. Kol momelengre his gar emligo baro. 16 Un job penas ninna har bud sonakai lino well, te krenn le kol chapangre, kai o Debleskre mare pre tchiddo wenn, un har bud rup lino well fer i rupene chapangre, 17 ninna har bud latcho sonakai fer i forshette, i tchare un i khore, un har bud rup i rupene khorenge, 18 un har bud sonakai o Debleskro sonakaskro bobeske, un o wurdineske, kai o Debleskro mochton pre tchiddo well. Ap leste his sonakangre bolepangre, kai hadenn pengre mussja pral o baro Debleskro mochton.
19 Kowa lauter hi pre tchinlo an i liil, jaake har sikras o baro Dewel o Davidestea, har kau kheer kerdo hunte well.
20 Un o David penas ap peskro tchaweste, o Salomo: “Ab sorelo, ma traash un kre tut ap i budi! Ma dare tchi un ma traash kekestar! O baro Dewel, maro rai, kai miro Dewel hi, hi pash tute un well tuke ap i rig. Un job mukell tut gar, bis te tu kai tseli budi ap o baro Debleskro kheer kral. 21 Dik, i rashaja un i Levitarja wan jaake khetne lino, har jon khetne budrenn an o Debleskro kheer. Haki budjake hi rashaja un Levitarja koi. Ninna koi tseli wawar budjake ap o kheer hi tut budepangre, kai gosewo hi, un haiwenn pengri budi mishto te krell. Koi pashel hi tut i pralstune mursha un menshe, te krenn le halauter, hoi tu lenge peneh.”