19
O kurepen i Ammonentsa
1 Pal ko tsiro meras o Nahash, ko baro rai pral kol Ammonarja. Un leskro tchawo, o Hanun, was baro rai pal leste. 2 Koi penas peske o David: “Me kamau o tchaweha o Nahashestar, o Hanun, maal te well, jaake har leskro dad miro maal his.”
Un o David bitchras murshen koi, un mukas leske kamle laba te penell pral leskro dadeste, te well leske gar buder ropaske.
Har kanna kolla, kai o David bitchras, an ko them Ammon wan pash o Hanun, te penenn le leske kamle laba, 3 koi penan kol pralstune pral kol Ammonarja ap o Hanun: “Patseh tu tchatchepah, kai bitchras o David murshen, te sharenn le tiro dades glan tire jaka, un te penenn le tuke kamle laba pral leste? Patseh tu gar, kai job doleske murshen pash tute bitchras, te dikenn le pal, har sorelo maro them hi, un hoi koi glan djala, te lell lo les dren?”
4 Koi tapras o Hanun kolen, kai o David bitchras, un mukas lenge i balla un i tchor tele te tchinell, un i koola paash tele tchinell, bis pral i herja, un mukas len te djal.
5 Un jon djan penge. Kowa, hoi lentsa kerdo was, his i bari ladj kol murshenge. Har o Davideske kowa penlo was, bitchras job murshen pash lende, un mukas lenge te penell: “Atchenn an o foro Jericho, bis te tumari tchor pale bares was! Koi pal awenn pale!”
6 Har o Hanun un kol Ammonarja dikan, kai kran le o Davides mulo chojedo, lan le jek sero zentnari rup, un bitchran kau rupeha murshen an i themma Mesopotamia un Syria, un kote an i tikne themma Maacha un Zoba, te ginenn le kote lurden un kurepangre wurdja un klissepangre. 7 Un jon lan penge 32.000 kurepangre wurdja, un o baro rajes dran Maacha un leskre lurden. Kolla wan un tchiwan pengre plachtene khera pre glan o foro Medeba. Un i Ammonarja wan ninna dran pengre forja un wan khetne kurepaske.
8 Har kowa o David shunas, bitchras job o Joabes pash lende peskre tsele sorele lurdentsa. 9 Un kol Ammonarja djan win an o kurepen, un atchan tardo pash ko baro wudar lengro forestar. Kol raja dran Syria his kokres penge tardo ap i kotar phub.
10 Un o Joab dikas, kai kolla kaman pen leha te kurell, un wan fun glan un pal. Koi rodas job peskre feteder murshen win, te kurenn pen kolla kol lurdentsa dran o them Syria. 11 Kol wawar lurden tchiwas job tel o wast peskro phralestar Abishai, te kurenn pen kolla kol Ammonentsa. 12 Un penas ap leste: “Te hi kol Syrarja sorleder har me, weh tu ap mari rig. Te hi kol Ammonarja sorleder har tu, wau me ap tiri rig. 13 Ma dare, las men khetne te kuras kek darjah mare menshenge un kol forjenge maro Deblestar! O baro Dewel krella, hoi mishto hi an leskre jaka.”
14 O Joab was kol lurdentsa, kai pash leste hi, te kurenn le pen kolentsa dran Syria. Kolla nashan penge lendar. 15 Har kol Ammonarja dikan, kai kol Syrarja nashan, nashan jon ninna glan o Abishai, un tserdan pen pale an o foro dren. Un o Joab was pale pale an o foro Jerusalem.
16 Har i Syrarja dikan, kai jon i Israelendar dino his, bitchran le murshen pash i Syrarja, kai djiwenn wergel o pani Eufrat, un mukan len gole te dell, te djan jon ninna an o kurepen. Un o Shobach, ko pralstuno lurdo ko baro rajestar Hadad-Eser, djas glan lende. 17 Un o Davideske was kowa penlo. Un job las o tsele Israelitarjen khetne un djas pral o pani Jordan. Un har job pash lende was, tchiwas lo peskre lurden wergel lendar pre. Un i Syrarja kuran pen leha. 18 Un kol Syrarja hunte nashan penge i Israelendar. Un o David maras lendar 7.000 (efta-serja) murshen, kai ap i kurepangre wurdja his, un 40.000 (star-deesh-serja) lurden. Un o Shobach, ko pralstuno lurdo o baro rajestar Hadad-Eser, koles maras lo ninna. 19 Un kol tsele raja, kolengro pralstuno o Hadad-Eser hi, dikan, kai i Israelitarja i sorleder hi pral lende. Koi mukan le tele, te kurenn le pen o Davideha. Un les was penepaske pral lende. Un kol Syrarja kaman buder gar i lurdenge dran Ammon ap i rig te well.