3
I Israelitarja kurenn pen i menshentsa dran Moab
1 O Ahabeskro tchawo, o Joram, was o baro rai pral o them Israel, har o Josafat 18 (deesh-te-ochta) bersha o baro rai pral o them Juda his. O Joram djiwas an o foro Samaria, un his 12 (deesh-te-dui) bersha baro rai pral o them Israel. 2-3 Un job kras, hoi glan o baro Debleskre jaka djungeles his, un kras sawo koowa har o Jerobeam kras, koleskro dad o Nebat his. Kowa anas i Israelitarjen o Debleskro dromestar tele, te mangan le wawar deblen an. Ninna te mukas o Joram len kowa ninna te krell, his lo gar jaake tchilatcho har peskro dad un peskri dai. Job las kol pre-tchidde barra krik, hoi leskro dad o debleske Baal kras.
4 O Mesha, ko baro rai pral i Moabarja, koles his bud bakre un hunte das ko baro rajes pral Israel sheel serja terne bakre un o bakrengro bal sheel serja mursh bakrendar. 5 Har o Ahab meras, peras o baro rai pral kol Moabarja tele o baro rajestar pral Israel. 6 Un sik djas ko baro rai Joram dran Samaria win un las peskre tsele lurden dran Israel khetne, 7 un bitchras lurden pash o Josafat, ko baro rajeste an o them Juda un mukas leske te penell: “Ko baro rai pral kol Moabarja peras tele mandar. Am mantsa, te djas mer khetne ap lende pre!”
O baro rai pral o them Juda penas: “Me kamau te well. Me hom har tu. Un mire menshe hi har tire menshe. Un mire graja hi har tire graja.”
8 O Joram penas: “Hawo drom djas mer?”
“Ko drom wergel o nango them Edom”, penas o Josafat.
9 Jaake djan kol dui bare raja pral Israel un pral Juda win pengre lurdentsa. Ninna o baro rai pral Edom peskre lurdentsa djas lentsa. Har jon efta diwessa dur djan, his kol lurden un ko viechen, kai pash lende his, kek pani. 10 Koi penas ko baro rai pral Israel: “Hawi bibacht! O baro Dewel das men triin rajen kate gole, te dell lo men an i wasta kol menshendar Moab!”
11 O Josafat penas: “Hi kek baro Debleskro rakepaskro kai, te putchell kowa menge o baro Deblestar?”
Koi penas jek kol murshendar ko baro rajestar pral Israel un penas: “Kate hi o Elisa, koleskro dad o Shafat hi. Job budras o Elijeske, tchoras leske o pani ap i wasta.” 12 O Josafat penas: “Palle nai penell lo menge, hoi o baro Dewel mendar kamell.”
Un o Josafat djas pash leste kol dui wawar bare rajentsa, ko baro rai pral Israel un o baro rai pral Edom.
13 O Elisa penas ap o baro rai pral Israel: “Hoi djah tu man an? Dja pash kol Debleskre rakepangre, kolendar tiro dad un tiri dai i lab putchan!”
“Na-a”, penas o baro rai pral Israel ap leste, “o baro Dewel das men triin rajen kai gole, te dell lo men an kol wasta i menshendar Moab.”
14 O Elisa penas: “Me dau man sowel pash o baro Debleste, ko rajeste pral o bolepen un i phub, koleske budrau, kowa hi tchatcho, te sharoms me gar o baro rajes pral Juda, o Josafates, dikoms gar ap tute pre. 15 Kanna, anenn mange i bashepaskro!”
Un har ko bashepaskro ap i dorjengri bashepaskri bashras, was o baro Debleskri soor ap o Elisa, 16 un job penas: “Kowa penell o baro Dewel: ‘Hadenn phub win kate un kote an kai tala!’ 17 Ninna te shunenn tumer kek ducho un dikenn kek brishin, well kai tala pherdo pani. Un tumer un tumare vieche nai pijenna. 18 Kowa hi kek baro koowa o baro Debleske. Job dell ninna kol Moabarja an tumare wasta. 19 Lengre tsele sorele un kutch forja lenn tumer dren. Un kol tsele latche ruka denn tumer trujel, un krenn pandlo i tsele brunne, kai nashell pani win, un tchiwenn barra ap lengri hachetikri phub, jaake kai nai well tchi bares pre.”
20 O wawar diwes taissarlakro, an ko tsiro, kai chatchran le chapen o Debleske, was pani i berge Edom tele. Un ko them was pherdo pani.
21 Har i Moabarja shunan, kai kol triin bare raja pengre lurdentsa pre wan, te kurenn le pen lentsa, dan jon i tsele murshen khetne gole, kai phuro doha his, kai nai djan an o kurepen, un anan len pash i themeskri rig, kai o them Israel well. 22 Un har jon taissarlakro pre stan, un o kham pre djas pral o pani, dikas kowa i lurdenge dran Moab dural jaake win, har te well ko pani lolo har rat. 23 Un jon penan: “Kowa hi rat. Kol bare raja maran pen o chareha, un jek maras kol wawares. Kanna, Moab dja koi un le tuke, hoi kameh!”
24 Un har jon pash koi platsa wan, kai i Israelitarja his, wan kolla win, un dan kol Moabarjen. Un jon nashan krik lendar. Un i Israelitarja lan len palla un dan len. 25 Lengre forja kran le paash, un jon witsran barra ap haki latchi hachetikri phub, jaake kai koi phub i barrendar tchakedo was. Un kol brunna kran le pherdo tchik, un hako latcho ruk dan le trujel. Kokres i pre-tchidde barra trul o foro Kir-Heres atchan tardo. Trul o tselo foro his witsepangre tardo un witsran barra ap leste.
26 Har ko baro rai pral kol Moabarja dikas, kai nashrell lo o kurepen, las job 700 (efta-sheel) lurden peha, kai kurenn pen nai o chareha, un kamas lentsa te nashell kote, kai o baro rai pral Edom peskre lurdentsa tardo hi. Kowa djas lenge gar.
27 Koi las job peskro phureder tchawes, kai wals pal leste baro rai, maras les, un chatchras les ap kol pre-tchidde barra, hoi trul o foro hi. Koi was i bari choli pral o Israel, jaake kai tserdan jon pen pale, un djan pale an pengro them.