5
O Salomeskro goswepen un brawlepen
1 Un jaake his o Salomo o baro rai pral i tsele themma, hoi hi tchiddo mank o pani Eufrat un ko them, kai i Filistarja djiwan, un tele bis pash o them Egiptia. Pral kolende his les penepaske, un jon plaissran leske rup un sonakai, jaake rah har job djiwas. 2 Un o chapaske o Salomeske un kol menshenge an peskro baro kheer hunte was leske hako diwes anlo: trijanda gone latcho jarro un shob-deesh gone wawar jarro, 3 deesh pesse grumja un biish grumja, kai win djiwan, un sheel bakre. Koi pashel wan tserfe, wesheskre grumja un wesheskre busja, un i pesse papjaa.
4 Un les his penepaske pral i tsele themma, kai hi ap koi rig o panjestar Eufrat, kai o kham tele djal, o forestar Tifsach bis pash o foro Gaza. Job his o baro rai pral i tsele raja kal themendar. Un les his kek kurepen kol tsele thementsa, kai trul leste his. 5 Jaake nai djiwan i menshe kek darjah an o them Israel un an o them Juda. Hakeno nai beshas tel peskro drakengro ruk un peskro faigetikro ruk. Kowa his jaake an o tselo them, o themestar Dan bis tel pash o foro Beersheba, jaake rah har o Salomo djiwas.
6 Un o Salomes his star-serja stanjeb i grajenge, kai tserdan leskre kurepangre wurdja, un deesh-te-dui serja mursha, kai klissan ap i grajac. 7 Un kol pralstune pral o chapen dan o baro rajeste Salomo halauter, hoi leske un kolenge an leskro kheer hunte well chapaske, hakeno an peskro tchon. Jaake his len doha halauterestar. 8 Ninna djob un phuss i grajenge anan jon kote, kai i graja tarde his, jaake har hakeneske penlo was.
9 Un o baro Dewel das o Salomes baro goswepen un i latcho shero. Job djinas budeder koowa har i santa pash o baro pani hi. 10 Leskro goswepen his bareder har ko tselo goswepen halauterendar khetne, kai djiwan an o them, kai o kham pre djal, un ninna har ko goswepen fun i Egiptarja. 11 Un job his gosweder har i tsele menshe, ninna gosweder har o Etan dran Esra, un gosweder har o Heman, o Kalkol un o Darda, kolengro dad o Mahol hi. Un o Salomo his an-diklo mank i menshende an i tsele themma trul leste. 12 Un job tchinas 3.000 (triin-serja) gosewe laba pre un 1.005 (jek-seri-te-pantch) gilja. 13 Job rakras pral i ruka, kol bare zedertikre rukendar, kai hi ap o Libanon tardo, bis pash o tikno bur, o Ysop, hoi well dran i massuri win. Ninna rakras job pral i viechende ap o them: pral i tchirkle, un pral i tikne vieche, hoi djan pral i phub, un pral i matche.
14 Un dran i tsele themma wan i menshe, te shunenn le ko gosewo rakepen o Salomestar. Ninna bud bare raja i tseli phubjatar bitchran bitchepangre pash leste, te shunenn le les.
15 Un o Hiram, ko baro rai o forestar Tirus – job his hako tsiro i latcho maal o Davidestar – job shunas, kai was o Salomo o baro rai pal leskro dadeste, o David. Un job bitchras peskre bitchepangre pash o Salomo.
16 Un o Salomo mukas o Hirameske te penell: 17 “Tu djineh, miro dad nai kras kek kheer leskro baro Debleske. Job hunte djas pale te pale an o kurepen trul leste trujel, bis ap ko diwes, kai tchiwas o baro Dewel kolen, kai leha kuran, tel leskre pire. 18 Kanna an kau tsiro kras miro baro Dewel, te hi man kek kurepen kol thementsa trul mende. Kek kamell pes te kurell mentsa. Men hunte well kek daar, te djal jek ap mende pre. 19 Doleske was mange an miro dji, te krap i kheer miro baro Debleske, te mangas les kote an, jaake har o baro Dewel ap miro dadeste, o David, penas: ‘Tiro tchawo, kai well pal tute o baro rai, job te krell mange o kheer, kai wau an-mangedo.’
20 Kanna mangau tut, pen ap tire budepangre, te denn le mange zedertikre ruka tele ap i berga Libanon. Mire budepangre te wenn lenge pash o wast. Un kol lowe koi tseli budjake plaissrau me, halauter jaake har tu mange peneh. Tu djineh, pash mende hi kek, kai haiwell jaake mishto kasht te dell, har tire budepangre dran o foro Sidon.”
21 Har o Hiram o Salomeskre laba shunas, sanas leskro dji, un job penas: “Sharau o baro Dewel kau diwes! Job das o Davideske i gosewo tchawes, kai was o baro rai pral kal bud menshende, kai djiwenn an peskro them.”
22 Un o Hiram mukas o Salomeske te penell: “Me shunom, hoi tu mange mukal te penell. Un me kamau halauter jaake te krell, har tu les peneh: Ko tselo kasht well pash tute anlo. 23 Mire mursha mu te anenn ko kasht i berga Libanon tele un pash o baro pani. Un me mukau ko tselo kasht khetne te pandell, un pral o baro pani kote te anell, kai tu mange peneh. Un kote nai pandenn le ko kasht pale pre. Un tire budepangre nai lenn penge ko kasht kote. Un tutar kamau, te dess man ko chapen, hoi i menshen an miro kheer hunte well.”
24 Jaake das o Hiram o Salomes ko tselo zedertikro kasht un zipresstikro kasht, har les o Salomo penas un kamas. 25 Un o Salomo das o rajes Hiram biish-serja gone jarro, te well les un leskro kheer maro chapaske, un das les biish-serja bare pirja latcho djet. Kowa das o Salomo hako bersh o rajes Hiram. 26 Un o baro Dewel das o Salomo goswepen, har job leske penas. Un an ko tsiro his kek kurepen mashkral o Hiram un o Salomo. Un jon kran win, te atchenn le mala.
27 Un o Salomo mukas trijanda-serja budepangre dran o tselo them Israel te kharell, kai hunte budrenn leske. 28 Un job bitchras len ap i berga Libanon, hako tchond deesh-serja, jaake his le jek tchon ap o Libanon un budran. Un dui tchonna his le khere. Un o Adoniram his lengro pralstuno. 29 Un o Salomes his 70.000 (efta-deesh-serja) hidjepangre, un 80.000 (ochta-deesh-serja), kai phagan i barra win an i berge. 30 Koi pashel his gar kol pralstune, kai dan garda ap halauter. Kolla his triin serja un triin-sheel mursha. Jon penan, hoi hunte well kerdo.
31 Un o baro rai penas, te wenn bare un latche barra win dino dran i berge, un lengre rigja shukar tele dino, te well ap lende o Debleskro kheer pre tchiddo. 32 Un o Salomeskre budepangre un o Hirameskre budepangre un kol budepangre dran o foro Gebal budran khetne. Jon dan i barra un tchinan o kasht jaake har mishto hi, te nai well o Debleskro kheer pre-tchiddo.