3
O Salomo mangell goswepen o Deblestar
1 Un o Salomo romedineras i tchai o baro rajestar pral o them Egiptia. Kowa his o Farao. Un o Salomo anas lat an ko kotar o forestar Jerusalem, hoi kharell ‘Davideskro foro’, te djiwell li kote jaake rah har budran i budepangre ap o Salomeskro kheer un ap o baro Debleskro kheer un ap i massuri trul Jerusalem. 2 An ko tsiro his o baro Debleske gomme kek kheer kerdo. Doleske anan i menshe viechen un wawar koowa i chochene deblenge an ko them. 3 O Salomo kamas o baro Debles o djijestar, un djiwas pal kol laba, hoi leskro dad, o David, leske penas. Jek koowa kras lo, hoi gar mishto his: Job maras ninna viechen i wawar deblenge un chatchras lenge sungepaskro koowa.
4 I diwes was, kai djas o baro rai Salomo an o foro Gibeon, te marell lo kote viechen o Debleske. Koi platsa his i feteder platsa, kai chatchran le viechen o Debleske. An o tselo tsiro his jaake jek sero viechen, hoi o Salomo kote ap koi chatchepaskri o Debleske chatchras.
5 Kote an o foro Gibeon mukas pes o baro Dewel o Salomeske an i suni te dikell an i rati. Un o Dewel penas: “Tu nai putcheh man, hoi kameh mandar.”
6 Kote penas o Salomo: “Baro latchepen kral tu miro dadeske, o Davideske, kai tuke koi his, un ap tute rikras, un djiwas an tiro tchatchepen peskro tselo djijeha glan tute. Un mukal tiro latchepen pral leste te well, un dal les i tchawo. Kowa hi kanna ap leskri beshepaskri beshdo pal leste. 7 Un kanna, miro baro Dewel, kral tu, miro rai, te wom me baro rai pal miro dadeste, o Davideste. Un dik, me hom i terno mursh un djinau gar, har te krap sawi budi. 8 Un mange dal tu kol tsele menshen an o wast, kol menshen, kai tu tuke win rodal. Jon hi jaake bud te nai djinell kek, kitse jon hi. 9 Doleske mangau tut, de man i dji, hoi shunella, hoi tu peneh, te nai rakrap o tchatchepen win pral i menshende, un te haiwap, hoi mishto un hoi gar mishto hi. Har nai dap hakeneste tire bud menshendar peskro tchatchepen, tu te deh kowa mande gar?”
10 Un his mishto an i jaka o Deblestar, kai o Salomo kowa lestar mangas. 11 Un o Dewel penas ap leste: “Tu nai mangals mandar i lengsto djipen un brawlepen un o merepen kolendar, kai kurenn pen tuha. Kowa kral gar. Tu mangal mandar goswepen, te rakress o tchatchepen win pral i menshende. 12 Doleske krau jaake har tu kowa mandar mangal. Me dau tut i gosewo dji, te haiwess halauter, hoi glan tute wella. Jaake his pash kekeste glan tute. Un pal tute well witar kek, har tu hal. 13 Koi pashel dau tut, hoi tu gar mandar mangal, brawlepen un railepen, jaake te well kek baro rai har tu an tiro tsiro. 14 Un te djah tu an mire dromma, jaake har tiro dad, o David, un rikreh mire laba un kreh, hoi tutar kamau, palle kamau me tuke i lengsto djipen te dell.”
15 Un har o Salomo pre djangras, haiwas lo, kai job i suni das. Un job was an o foro Jerusalem, un atchas glan o mochton tardo, kai o Debleskre deesh laba dren his. Un job mukas viechen te marell. Bud lendar wan tseles chatchedo o Debleske. Un wawarendar chatchran le o thulepen un kotja mass, te parkrenn le pen pash o Debleste. Ko wawar mass chan le khetne. Un o Salomo kras i baro chapen un mukas i tsele pralstunen, kai leske budran, te well.
Dui djuwja un jek ternepen
16 An ko tsiro wan dui lubja glan o baro rajeste pengro tchingepah. 17 Un jek kol dujendar penas: “Miro rai, me un kai djuwel kate, djiwah an jek kheer. Un me anom i tchawes ap i phub an o kheer. Joi his koi pashel. 18 Un pal triin diwessa anas joi ninna i ternepen ap i phub. Un mer dui hams khetne, un kek wawar his mentsa an ko kheer. 19 Un ko tchawo kai djuwjatar meras an i rati. Joi his an o sopen ap ko ternepen tchiddo. 20 Un joi stas pre an i rati un las miro tchawes, kai pash mande tchiddo hi, un tchiwas les an lakri mussi, un lakro tchawo, kowa, kai meras, tchiwas li an miri mussi. Un me, miro rai, sowom un haiwom tchi. 21 Un taissarlakro, har me pre stom, te dap miro tchawes te pijell, kote his lo mulo. Un me dikom ap leste, un haiwom, kai ko mulo ternepen gar miro ternepen hi.”
22 Kote penas koi wawar djuwel: “Ko hi gar tchatcho. Miro tchawo djiwella, tiro ternepen meras.”
Kote penas koi ersti djuwel pale pale: “Na-a, tiro tchawo meras, un miro tchawo djiwella.” Un jaake tchingran jon pen glan o baro rajeste.
23 Un o baro rai penas: “Kaja penella: ‘Miro tchawo djiwella, un tiro tchawo meras.’ Koi wawar penella: ‘Na-a, tiro tchawo meras, un miro tchawo djiwella.’ 24 Anenn mange i charo!”
Un jon anan leske i charo. 25 Un job penas: “Marenn ko djido ternepen, un krenn dui kotja dran leste, un denn haki djuwjat o paash ternepen!”
26 Un koi djuwjake, kai lakro ternepen djiwas, chatchras lakro dji peskro tchaweske, un joi das gole ap o baro rajeste: “Miro rai, mangau tut, de lat ko ternepen djides, un mare les gar!”
Koi wawar penas: “Na-a, job te well gar miro, witar gar tiro. Tchinenn les an dui kotja!” 27 Kote penas o baro rai: “Ma marenn les! Denn kolat o ternepen djides, kai penas: ‘Ma mare les!’ Joi hi leskri dai!”
28 Un an o tselo them Israel shunan le ko tchatcho lab, hoi o baro rai hatsas. Un jon dikan pre ap o baro rajeste, un jon haiwan, kai o goswepen o Deblestar an leste his, te nai dell lo i menshenge lengro tchatchepen.