31
O Saul merell
1 I Filistarja maran pen i Israelentsa. Un i Israelitarja nashan glan lende, un bud lendar wan ap i berga Gilboa mulo dino. 2 Un i Filistarja lan o Saules palla, un dan leskre mursh tchawen, o Jonatan, o Abinadab un o Malkishua mulo. 3 Un o marepen trul o Saul was sorleder un sorleder. Un i kurepangre, kai denn i failentsa karje, hatsan les un dukran les phares. 4 Un job penas ap koleste, kai leskro kurepaskro koowa hidjrell: “Le tiro charo un de man mulo, jaake te wenn gar kalla pash mande, kai gar tchinle hi ap pengro mass, un denn man mulo, un krenn mantsa, hoi jon kamenn!”
Un ko lurdo, kai leskro kurepaskro koowa hidjrell, kamas gar. Les his bari daar. Kote las o Saul o charo, un mukas pes an leste perell. 5 Un har ko hidjepaskro lurdo dikas, te hi o Saul mulo, mukas job pes ninna an peskro charo te perell un meras o Sauleha. 6 Jaake meras o Saul un leskre triin tchawe, un leskro hidjepaskro lurdo, un kol tsele mursha, kai pash leste his, ap ko jek diwes.
7 Har shunan kol Israelitarja, kai djiwan wergel i tala Jesreel un wergel o pani Jordan, te nashan penge i Israelengre lurde, un kai meras o Saul un leskre tchawe, kote nashan jon dran pengre forja un nashan penge ninna. Un i Filistarja wan koi un djiwan an kol forja.
8 Un ap ko diwes pal o kurepen wan i Filistarja, te randenn le lauter kolendar, kai kote mulo tchiddo hi. Un koi pashel hatsan le o Saules un leskre triin tchawen mules ap koi berga Gilboa tchiddo. 9 Un jon dan leske o shero tele, un lan leske leskro sasterno ripen, un bitchran murshen koleha lautereha an o tselo them Filistia trujel, te sikrenn le i menshende un lengre chochene deblen, hoi djas. 10 Un jon tchiwan leskro charo un leskro witsepaskro tchuri an o kheer, kai lengri debletsa, i Astarte, his. Un o mulo Saul dan le sasterentsa ap i massuri, hoi hi trul o foro Bet-Shean.
11 Har shunan kolla, kai djiwenn an o foro Jabesh an o them Gilead, hoi i Filistarja o Sauleha kran, 12 kran pen i tsele tchatche mursha ap o drom, un djan i tseli rat un wan an Bet-Shean, un lan o mulo Saules un leskre mule tchawen koi massuri tele, un anan len an o foro Jabesh pale. Un kote chatchran le len. 13 Un jon lan lengre kokale un paskran len tel ko baro ruk an o foro Jabesh. Un jon chan efta diwessa tchi.