26
O David mukell o Saules o duito kopo djides
1 Un i mursha dran Sif djan an o foro Gibea pash o Saul un penan ap leste: “O David hi khatedo ap koi tikni berga Hachila, hoi ap i wawar rig o forestar Jeshimon hi.”
2 Kote kras pes o Saul ap o drom un djas tele an o mulo them Sif. Un khetne leha djan 3.000 (triin-serja) wi-rodede mursha dran Israel, te rodenn le o Davides. 3 Un o Saul atchas lentsa pash o drom ap koi berga Hachila, hoi ap i wawar rig o forestar Jeshimon hi. Un o David his an o mulo them. Un har job shunas, te was o Saul leske an o mulo them palla, 4 bitchras lo murshen win, te hatsenn le budeder win. Un kolla wan pale un penan leske, te was o Saul tchatchepah an o mulo them. 5 Un o David kras pes ap o drom, un was kote, kai o Saul peskre lurdentsa hi. Un o David dikas koi platsa, kai o Saul pes tele tchiwas, te sowell lo. Un pash o Saul his o pralstuno pral i lurdende tchiddo. Leskro lab hi Abner, koleskro dad hi o Ner. Kol dui his mashkral ap i platsa tchiddo, un i tsele lurde his trul lende tchidde.
6 O David penas ap o Ahimelech, ko Hetari, un ap o Abishai, koleskri dai i Zeruja hi, un koleskro phraal o Joab hi: “Koon kamell mantsa tele ap i platsa pash o Saul te djal?”
Un o Abishai penas: “Me djau tuha tele!”
7 Un an i rat djan le tele un wan ap kolengri platsa. Un o Saul his mashkral tchiddo un sowas. Un leskro witsepaskro tchuri his pash leskro shero an i phub dino. Un o Abner un i tsele lurde his trul lende tchidde. 8 Un o Abishai penas ap o David: “Kau diwes das o Dewel tut koles an tiro wast, kai kamell tut te marell. Jaake muk man leskro witsepaskro tchuri te lell, un les an i phub te dell. Jek dap hi doha. I duito kopo hunte dap me gar buder tchurje.”
9 O David penas: “Na-a, ma de les mulo! Koon hadell o wast pre ap koleste, koles o baro Dewel peske win rodas, kowa lell peskri phagi.” 10 Palle penas lo: “Me dau man sowel pash o djido Debleste: Job kokres marell les, nai well ap leskro tsiro, kai hunte merell lo, nai well an o marepen. 11 O baro Dewel mu rikrell man pale, te taprap me koles an, kones job peske win rodas. Le kanna leskro witsepaskro tchuri, hoi pash leskro shero an i phub dino hi, un leskro panjeskro khoro, te djas mer menge!”
12 Jaake las o David ko witsepaskro tchuri un o panjeskro khoro, hoi pal o Sauleskro shero tardo his. Un jon djan pale pale. Un kek dikas len, un kek haiwas tchomone, un kek djangras pre. Lauter sowan soreles. O baro Dewel mukas i pharo sopen ap lende te perell.
13 Un o David djas ap i wawar rig, un dureder pral ap i berga, jaake te his lo dur doha lendar krik. 14 Un kotar das lo gole ap kol tsele lurdende un ap o Abner, koleskro dad o Ner hi, un penas: “Abner, shuneh tu man gar?”
Un o Abner putchas: “Koon hal tu, kai kate jaake ap o baro rajeste gole dell?”
15 O David rakras ap o Abner: “Hal tu gar i tchatcho mursh? Un koon hi an o tselo them Israel har tu? Hoske dal tu gar jak ap tiro rajeste, ko baro rajeste pral o Israel? Glan i tikno tsiro djas jek dren ap i platsa, te marell lo tiro rajes. 16 Kowa his gar mishto, hoi tu kral! Me dau man sowel pash o djido Debleste: Tumer hunte wans maredo! Tumer dan gar jak ap tumaro rajeste, koles o baro Dewel peske win rodas! Dik! Kai hi o baro rajeskro witsepaskro tchuri un o panjeskro khoro, hoi pash leskro shero tardo his?”
17 Un o Saul shunas un haiwas, te hi o David, koon kote gole das, un penas: “Hal tu kowa, miro tchawo David?”
O David penas: “Awa, me hom les, miro rai un pralstuno!”
18 Un job rakras dureder: “Hoske lell miro rai man, peskro budepaskres, palla? Hoi krom me? Hawo tchilatchepen hi ap mande? 19 Un kanna, miro rai un pralstuno, shun ap i laba, hoi me, tiro budepaskro, rakrau. Te anas o baro Dewel tut ap mande pre, palle well leske i chapen chatchedo, te djal leskri choli krik. Te anan tut menshe ap mande pre, mu well o Debleskri bibacht ap lende! Jon tradenn man win dran o baro Debleskro them. Kowa hi jaake har te penans le: ‘Dja an i wawar them, un mange wawar deblen an!’ 20 Ma muk, te merap dur krik o baro Deblestar! Hoske djal o baro rai pral o Israel win, te marell lo i pushum har me? Hoske tradell lo man har jek i diwji kachni palla lell ap i berge?”
21 Un o Saul penas: “Me lom doosh ap mande, miro tchawo. Am pale pale! Me kamau tuke buder kek tchilatchepen te krell. Dikau, miro djipen his kau diwes kutch an tire jaka! Kowa hoi me krom, his dineles, un anom bari doosh ap mande!”
22 Un o David penas: “Dik, kate hi o baro rajeskro witsepaskro tchuri! Bitche jekes kol terne murshendar kai wergel, te anell lo les tuke! 23 O baro Dewel dell latchepen hakeneste, kai ap leste rikrella, un an o tchatchepen djiwella. Kau diwes das lo tut an miro wast, un me kamom tut gar te dukrell – tut, ko wi-rodedes o baro Deblestar. 24 Dik, jaake har tiro djipen an mire jaka bud moldo his, jaake well miro djipen an o baro Debleskre jaka bud moldo. Un job lell man win dran halauter, hoi miro djipen phares krell.”
25 Un o Saul penas ap o David: “Debleskri bacht well ap tute, miro tchawo David! Tuke djal lauter mishto, hoi kreh!”
Un o David djas peskro drom. Un o Saul djas pale khere.