25
O Samueleskro merepen
1 Un o Samuel meras, un o tselo Israel was khetne un rowas kote pral leste. Un palle paskran le les an o foro Rama, kai lo khere his. Pal kowa djas o David an o mulo them Paran.
O David un i Abigajil
2 Kote his i mursh an o foro Maon. Koles his i baro brawlepen. Les his 3.000 (triin-serja) bakre un 1.000 (jek seri) busja. Leskri phub un leskre vieche his pash o foro Karmel. Un kote his job, har o bakrengro bal tchinlo was. 3 Un ko mursh kharas Nabal un was i menshendar Kaleb. Job his jalo un tchilatcho an lauter, hoi job kras. Leskri romni kharas Abigajil. Joi his i gosewi un shukar djuwel.
4 Un o David shunas an o mulo them, te mukell o Nabal o bal peskre bakrendar te tchinell. 5 Kote bitchras o David deesh peskre murshendar an o foro Karmel un penas ap lende: “Djan pre an o foro Karmel! Un te wenn pash o Nabal, palle putchenn lestar an miro lab, har leske djal, 6 un penenn: ‘Te djiwess i shukar djipen! I bacht well tuha un tire menshentsa, un ap lauter, hoi tuke hi! 7 Me shunom, te mukeh o bal tire bakrendar te tchinell. Un me kamau, te djiness, te his tire mursha, kai ap i bakre jak denna, mentsa khetne ap i berga Karmel. Un mer kram len tchi. Un ko tselo tsiro, kai le mentsa khetne his, nashran le kek vieches. 8 Putch tire budepangre, kolla penenn les tuke! Jaake ab latches ap kal murshende! Kau diwes hi i baro diwes tuke! De men, tire budepangren un tiro males David, hoi tut pash o wast hi!’”
9 Un har o Davideskre mursha kote wan, rakran le o Nabaleha kal tsele laba an o Davideskro lab, un atchan palle koi tardo, te dikenn le, hoi well. 10 O Nabal penas ap lende: “O David, koon hi lo? Koleskro dad o Isai hi? Koon hi kowa? Kau diwes denna bud budepangre, kai penge nashan pengro rajestar! 11 Lap me miro maro un miro pani, un ko mass kol viechendar, kai marom kol murshenge, kai o bakrengro bal tchinenn? Un dap kowa kal murshende, kolendar me gar djinau, kai le wenna?”
12 Un kol mursha kran pen pale ap o drom. Un har le pale pash o Davideste wan, penan le leske lauter, hoi o Nabal penas. 13 Kote penas o David ap peskre murshende: “Hakeno pandell peskro charo trul peste!” Un jaake kran le. Un o David tchiwas peskro charo ninna trujel. Un jon djan pal o Davideste: jaake 400 (star-sheel) mursha. Un 200 (dui-sheel) atchan pale ap i platsa, te denn le pre jak.
14 Jek kol murshendar, kai budrenn o Nabaleske, was pash koleskri romjate, i Abigajil, un penas lake: “Shunal tu? O David bitchras murshen dran o mulo them, te parkrenn le maro rajes, un job tchingras ap lende. 15 Djiness, o Davideskre mursha his latches ap mende an ko tsiro, har mer lentsa khetne trujel djam. Un jon kran men tchi, un mer nashram kek vieches an ko tselo tsiro, kai mer lentsa khetne hams. 16 Jon dan jak ap mende, an i rati un pral o diwes, un kowa o tselo tsiro, kai hams pash lende un dam jak ap i bakre. 17 Un kanna dik, hoi tu gomme nai kreh! Te well tchi kerdo, palle well i bibacht pral maro rajeste un leskro tselo kheer. Ko patsau soreles. Job hi sau tchilatcho mensho, te nai rakrell jek leha gar.”
18 Kote djas i Abigajil sik un las 200 (dui-sheel) mare, un dui moljakre gone pherdi mool, pantch pekle bakre un jek gono pherdo peklo djob, jek sheel tikne gone pherde drake, hoi truk kerdo wan, ninna 200 (dui-sheel) faigetikre merklia. Un kowa lauter mukas li ap burike te tchiwell. 19 Un penas ap i budepangre: “Djan glan! Me djau pal tumende.” Peskro romeske penas li tchi kolestar.
20 Un har joi ap i burika i berga tele klissas, un o drom trul i berga trujel djas, was ap jek kopo o David peskre murshentsa i wawar rigjatar. Un jon tapran pen.
21 An o Davideskro dji his choli un job penas peske: “Tchatchepah dom ko tselo tsiro tchitcheske jak ap ko tselo koowa, hoi ko murshes hi an o mulo them, jaake te was kek viecho lestar krik. Un job dell man tchilatchepen pale, koleske, hoi leske latches krom. 22 O Dewel mu dell man i phagi, te mukau jek murshes djido leskre tsele murshendar, bis te djal o kham taissarlakro pre.”
23 Un har i Abigajil o Davides dikas, stas li sik i burikatar tele, un witsras pes glan o Davideste tele o mujeha ap i phub, 24 un atchas glan leskre herja tchiddo, un penas: “Ap mande kokres mu perell i tseli doosh, miro rai! Muk man, tiri budepaskretsat, te rakrell glan tire kanda! Shun mire laba! 25 Miro rai, ma choje tut pral o Nabal, ko tchi-moldo! Har leskro lab, jaake hi lo ninna! Nabal kharell lo, un i narwelo hi lo. Me, tiri budepaskretsa, dikom kol murshen gar, kai bitchral. 26 Un kanna, miro rai, me dau man sowel glan o djido Debleste un glan tute: O baro Dewel rikras tut pale, te aness tu rat ap tute un dess tiro wasteha pale, hoi o Nabal ap tute kras. Kamau, te djal lauterenge, kai kamenn tut tchilatchepen, jaake har o Nabaleske!
27 Jaake mangau tut, miro rai, le kau koowa an, hoi me, tiri budepaskretsa, tuke anom, te well lauter kol murshende dureder dino, kai pash tute hi. 28 Biste mange, te hadom me man un rakrom ap tute! Me djinau, o baro Dewel dell tut i kheer, hoi atchella. Tu hal kowa, kai djal o baro Debleske an o kurepen. Kek tchilatchepen mu well hatslo ap tute, jaake rah har tu djiweh! 29 Un te hadell pes i mensho, te lell lo tut palla, un kamell tut te marell, palle rikrell o baro Dewel peskre wasta pral tiro djipen, jaake har jek i kutch bar an peskri possita khatrell. Kolla, kai kamenn tut te marell, lengro djipen well krik witsedo, har jek i bar krik witsrella! 30 Un ap ko tsiro, kai das tut o baro Dewel ko tselo latchepen, hoi job tut peskro lab pre das, un kras, te wal o baro rai pral o Israel, 31 palle hi tiro dji djudjo. Un tu hunte witsress tuke gar glan, te lals tchitcheske rat ap tute, un tiro wasteha o tchilatchepen pale dal, hoi ap tute kerdo was. Ma biste man, tiri budepaskretsa, ap ko diwes, kai krell o baro Dewel tuke, miro rajeske, latchepen!”
32 Un o David penas ap i Abigajil: “Sharedo well o baro Dewel, o Dewel pral o Israel, kowa kai tut kau diwes pash mande bitchras! 33 Un sharedo well tiro goswepen, te rikral tu man kau diwes pale, te anap rat ap mande, un dap miro wasteha pale! 34 Me dau man sowel pash o baro Debleste, ko Debleste pral o Israel, kai rikras man kau diwes pale, te krap tut tchilatchepen: Tu te wals gar sik pash mande, atchals kek i murshendar o Nabalestar djido, te djal o kham pre taissarlakro!”
35 Un o David las lauter dran lakro wast, hoi joi leske anas, un penas ap late: “Dja pale khere un ma dare! Kowa, hoi tu mandar mangal, krau me jaake.”
O Nabal merell, un o David romedinerell i Abigajil
36 Un har i Abigajil khere was, his o Nabal koi beshdo pash i baro chapen har i baro rajeske. Un leskro dji bashras, un job his bud mato. Un i Abigajil penas leske tchi, kek lab. 37 Taissarlakro, har o matepen dran o Nabal djas, kote penas leskri romni leske lauter. Kote meras leskro dji an leskro betch, un job was har i bar. 38 Un pal deesh diwessa, kote das o baro Dewel o Nabales, un job meras.
39 Un har o David shunas, te meras o Nabal, penas lo: “Sharedo well o baro Dewel, kai i ladj, hoi o Nabal ap mande anas, ap leste pale anas. Un man, peskro budepaskres, rikras lo pale, te krap i tchilatcho koowa. Un ko tchilatcho koowa, hoi o Nabal kras, mukas o baro Dewel ap leskro shero pale te perell.”
Un o David bitchras murshen pash i Abigajil, un mukas lake te penell, te kamell lo lat te romedinerell. 40 Un har o Davideskre budepangre pash i Abigajil an Karmel wan, penan le ap late: “O David bitchras men pash tute, te las tut: job kamell tut romedinerell.”
41 Kote stas li pre, un witsras pes tele ap peskro mui ap i phub un penas: “Me hom leskri budepaskretsa un kamau te thowap i herja i budepangrendar miro rajestar.” 42 Un i Abigajil las sik lauter khetne, un beshas pes ap i burika. Un lakre pantch budepangre djuwja djan lah. Un joi djas kol murshenge palla, kolen o David bitchras, un was o Davideskri romni.