13
O kurepen i Filistarentsa
1 Un o Saul his a... bersha phuro, har was lo baro rai. Un job his ... duib bersha rai pral o Israel.
2 Un o Saul rodas peske 3.000 (triin-serja) murshen win. 2.000 (dui-serja) lendar his pash leste an o foro Michmas un ap i berge pash Betel. Un 1.000 (jek sero) mursha his peskro tchaweha, o Jonatan, pash o foro Gibea an o them Benjamin. Kol tsele wawar bitchras lo khere.
3 His i diwes, koi maras o Jonatan kol lurden i Filistarendar, kai an Gibea his un koi jak dan. Un har i Filistarja kowa shunan, mukas o Saul an i phurdepangre te phurdell un penas: “I tsele Hebrearja hunte shunenn kawa!”
4 Un i tsele Israelenge was penlo: “O Saul maras kol lurden i Filistarendar, kai jak dan. Un kanna hi len choli ap o tselo Israel.” Un i tsele Israelengre lurde wan khetne gole dino, te djan le an Gilgal pash o Saul.
5 Ninna i Filistarja wan khetne, te djan le an o kurepen i Israelentsa: 3.000 (trijanda-serja) wurdja, un 6.000 (shob-serja) murshentsa koi pre, ninna bud lurde, kai nashenn, jaake bud har i santa pash o baro pani hi. Kolentsa djan le pre un tchiwan pen pash o foro Michmas tardo ap koi rig o forestar Bet-Awen, kai o kham pre djal!
6 Har i Israelitarja dikan, har sorelo i Filistarja hi, tapras len i daar, un jon khatran pen an i phub, pal subjengre burra, mank bare barra, an grufte un panjengre chebja. 7 His ninna sawe, kai nashan pral o Jordan an i themma Gad un Gilead.
Un o Saul his gomme an Gilgal un kol lurden, kai pash leste his, his bari daar. 8 O Samuel penas leske, te atchell lo efta diwessa koi. Palle kamell job ninna pash leste te well. Kol efta diwessa his trujel, un o Samuel his gomme gar koi. Un i lurde, jek pal o wawar nashan penge o Saulestar krik. 9 Kote penas o Saul: “Anenn mange i viechen, hoi o Debleske chatchedo wenn un kolen, hoi chah khetne.” Un job maras kol viechen, hoi o Debleske chatchedo wenn. 10 Un har chatchras lo len, was o Samuel. Un o Saul djas pash leste un penas: “Latcho diwes.”
11 “Hoi kral tu?” putchas o Samuel lestar.
Un o Saul penas: “Me dikom, te nashenn penge i lurde, un tu wal gar ko tsireske, hoi tu penal. Un i Filistarja wan an Michmas khetne. 12 Kote patsom, te wenn i Filistarja tele pash mande kai an Gilgal, un me anom o baro Debleske gomme gar i vieches, te well lo ap miri rig. Doleske lom man khetne, un chatchrom leske i vieches.”
13 O Samuel penas ap o Saul: “Tu kral dinelo koowa, un kral gar pal ko lab, hoi penal tuke o baro Dewel, kai tiro Dewel hi. Te krals tu pal ko lab, tchiwals lo tut hako tsireske pral o Israel, te atchals lengro baro rai. 14 Kanna kral tu gar pal leskro lab. Doleske atcheh gar baro rai. O baro Dewel rodas peske i wawar murshes win, jekes pal peskro dji. Koles krell lo rai pral peskre menshende.”
15 Un o Samuel djas dureder un mukas Gilgal pal peste. Kol wawar menshe djan pal o Sauleste, har djas job pash peskre lurdende ap o drom dran Gilgal pre an o foro Gibea an o them Benjamin. Un o Saul dikas peske kol lurden an, kai pash leste hi. Kolla his jaake shob-sheel (600) mursha.
16 Un o Saul un peskro tchawo, o Jonatan, un i lurde, kai pash lende hi, atchan an Geba an o them Benjamin. Un i Filistarjen his lengri platsa pash Michmas. 17 Kotar djan i Filistarja ap triin rigja win, te randenn le un denn o them paash. Ap jek rig djan le ap o drom, hoi djal an Ofra an o them Shual. 18 Ap i wawar rig djan le ap o drom, hoi djal pash Bet-Horon, un pale ap i wawar rig djan le ap o drom an o them pal i tala Zebojim, kai o mulo tato them well.
19 An ko tsiro his kek mursh an o tselo them Israel, kai haiwas mishto sasterne koola te krell. I Filistarja daran, te krenn pen i Israelitarja chare un witsepaskre tchurja. Doleske mukan le kekes, kai kowa haiwas, peskri budi te krell. 20 Un jaake hunte djas hako Israelitari tele pash i Filistarja, te kaman peskre hachetikre koola un peskro tower buder gar te tchinell. Un i Filistarja kran, te tchinenn le pale. 21 Kai budjake hunte plaissrenn i Israelitarja lowe: dui tikne rupene beme koi budjake ap i sasterne koola, kolentsa budran le an i phub, un jek tikni rupeni bema koi budjake ap i tower.
22 Har was o diwes, kai hunte djan le an o kurepen, his kek charo un kek witsepaskro tchuri an i wasta kol Israelengre lurdendar. Kokres o Saules un peskro tchawes Jonatan his pengre chare un marepaskre koola.
23 Un i Filistarja bitchran pengre murshen win, te denn le jak, te djal kek ap ko tikno drom, hoi djal ap i berga pash Michmas.