12
O Samuel tchiwell peskri budi tele
1 Un o Samuel penas ap i tsele Israelitarja: “Me shunom ap lauter, hoi tumer mange penan, un tchiwom i baro rajes pral tumende. 2 Kanna djal job glan tumende. Me wom phuro un mire balla wan parno. Un mire mursh tchawe hi pash tumende. Fun tiknes pre djom glan tumende bis ap kau diwes. 3 Doleske hom kanna glan tumende tardo: Stenn pre un rakrenn kate glan o baro Debleste un glan o baro rajeste, kones job win rodas: Koneskri grumni lom me? Koneskri esla? Kones chochrom me? Konestar lom i sorjah, hoi leske his? Konestar mukom man te plaissrell, te pandap mire jaka glan leskro tchilatcho koowa. Me te krom kowa, palle kamau les me pale te dell.”
4 Jon penan: “Tu chochral men gar, un lal tuke tchi i sorjah, un lal kekestar tchomone an, te pandess tire jaka glan leskro tchilatcho koowa.”
5 Job penas ap lende: “O baro Dewel un tumaro baro rai, koles job wi-rodas, kolla dui dikenn un shunenn kau diwes, te hatsan tumer tchi an miro wast.”
“Awa, jaake hi kowa”, penan le.
6 Un o Samuel penas ap i Israelitarja: O baro Dewel hi kowa, kai o Moses un o Arones pral tumende tchiwas, un tumare phuren dran o them Egiptia win anas! 7 Kanna stakrenn glan, te krap o tchatchepen win mank o baro Debleste un tumende; un penap o tselo latchepen, hoi o baro Dewel tumenge un tumare phurenge kras. 8 Har o Jakob an o them Egiptia was, un i Egiptarja tumare phurenge o djipen phares kran, dan jon gole ap o baro Debleste, te well lo ap lengri rig. Un o baro Dewel bitchras o Moses un o Arones. Un jon anan tumare phuren dran o them Egiptia win, un mukan len kate an kau them te djiwell. 9 Jon bistran pengro baro Debles. Un job das len an i wasta kolendar, kai kuran pen lentsa: o Sisera, ko pralstuno lurdo o forestar Hazor, i Filistarja, un o rai pral o them Moab. 10 Koi dan le gole ap o baro Debleste, te well lo ap lengri rig, un penan: “Mer lam doosh ap mende, te djam krik tutar, baro Deblestar, un mangam kol deblen an, kai kharenna Baal un Astarte. Kanna le men win dran i wasta kolendar, kai men tele rikrenn. Palle wess tu kokres maro Dewel.”
11 Kote bitchras o baro Dewel o Jerub-Baala, o Bedanb, o Jefta un o Samuel, un las tumen win dran i wasta kolendar, kai tumen tele rikran, jaake te nai djiwan kek darjah.
12 Har tumer dikan, te djal o rai pral i Ammonarja, o Nahash win, te kurell lo pes tumentsa, penan tumer mange: “Mer kamah i baro rajes pral mende”, har te wals o baro Dewel gar tumaro baro rai. 13 Kanna dikenn: “Kate hi tumaro baro rai, koles tumenge win rodan un mandar mangan. O baro Dewel tchiwas les pral tumende. 14 Har kamoms, te sharenn tumer o baro Deblestar, kai tumaro Dewel hi, un mangenn les kokres an, un shunenn ap leste un krenn, hoi job tumenge penella! Har kamoms, te djan tumer un tumaro baro rai, kai pral tumende hi, o Debleskro drom!
15 Tumer te shunenn gar ap o baro Debleste un krenn gar, hoi lo tumenge penell, palle krell o baro Dewel, te djal tumenge djungeles, jaake har ninna tumare phurenge djas.
16 Kanna dikenn, hawo baro koowa o baro Dewel glan tumare jaka krella! 17 Kanna hi o tsiro, kai o djob dren anlo well. Tumer djinenn, kowa hi gar o tsiro, kai dell brishin. Un me dau kanna ap o baro Debleste gole, te bitchrell job brishin un mukell o bolepen gole te dell. Palle haiwenn tumer, te his kowa, hoi kran, i baro tchilatchepen glan o baro Debleste, har mangan mandar i baro rajes pral tumende.”
18 Un o Samuel das ap o baro Debleste gole, un o baro Dewel bitchras brishin ko diwes, un mukas o bolepen gole te dell. Koi lan i tsele menshe bari daar glan o baro Debleste un glan o Samuel. 19 Un jon penan ap o Samuel: “Mer ham tire budepangre. Mang menge o baro Debles, kai tiro Dewel hi, jaake te hunte meras mer gar. Ap mende hi bud doosh tchiddo. Un kanna kram ninna ko tchilatcho koowa, te mangam menge i baro rajes pral mende.”
20 O Samuel penas ap lende: “Ma darenn! Hi tchatcho, te kran tumer kau tselo tchilatchepen; kanna shunenn ap o baro Debleste un djan leskro drom tumaro tselo djijeha! 21 Ma nashenn kol chochene deblenge palla, hoi tchi molenna, un hoi tumen gar win nai lenna dran o merepen. Jon hi tchi.
22 O baro Debleske his shukar, te wan tumer leskre menshe. Un job das peskro wast koi pre un mukell tumen gar. 23 Un me ninna, kamau gar i doosh ap mande te anell glan o baro Debleste, te mangap les gar tumenge. Me kamau te sikrap tumende o latcho un tchatcho drom. 24 Tumer hunte darenn o baro Debles un mangenn les kokres an tumaro tselo djijeha! Ma bistrenn, hawo baro koowa job tumenge kras. 25 Tumer te atchenn ap tumaro tchilatcho drom, palle djan tumer un tumaro rai nashedo.”