8
O Israel kamell i baro rajes pral peste
1 Un har o Samuel phuro was, tchiwas job peskre mursh tchawen an pengri budi dren, te wenn le tchatchepangre raja pral o Israel. 2 Leskro phureder tchawo his o Joel, un o duito o Abija. Un jon djiwan an Beersheba, un kote rakran le o tchatchepen win. 3 Jon djan gar o drom har lengro dad, un rodan kowa, hoi lenge o feteder his, un lan tchorchanes lowe, un phagan o tchatchepen.
4 Kote wan i tsele phureder dran o them Israel khetne un djan pash o Samuel an Rama. 5 Un jon penan ap leste: “Dik, tu wal phuro, un tire tchawe djan gar o drom jaake har tu les djal. Rode tu i baro rajes win, koles tu pral mende tchiweh! Un kowa well maro tchatchepaskro rai, jaake har an i wawar themma ninna hi.”
6 Kolla his djungele laba glan o Samueleste, te penan le: ‘De men i baro rai, kai o tchatchepen pral mende win rakrella.’ Un o Samuel rakras o baro Debleha koi pral.
7 Un o baro Dewel penas ap o Samuel: “Shun ap i Israelitarja, an lauter, hoi jon ap tute penan. Jon tchiwan gar tut ap i rig, na-a man tchiwan le ap i rig, te wap me buder gar o baro rai pral lende. 8 Kanna krenn le tuha jaake har jon les mantsa kran. Jaake rah har anom len win dran o them Egiptia, bis kau diwes, mukan le man pale te pale, un mangan wawar deblen an. 9 Un kanna kre, hoi le tutar kamenn. Pen lenge ninna soreles, hoi nai krenn lengre bare raja lentsa, te hi len penepaske pral lende.”
10 Un o Samuel penas kal tsele laba o baro Deblestar kol menshenge, kai lestar i baro rai kaman! 11 “Kowa hi, hoi tumaro baro rai tumentsa krella”, penas o Samuel: “Tumare mursh tchawen lell lo tumendar, te wenn le leskre lurde, kai beshenn ap leskro wurdin un ap leskre graja, un te nashenn le glan leskro wurdin. 12 Hi sawe mank lende, kolendar krell lo pralstune pral peskre lurdende: pral jek sero (1.000) un ninna pral paash-sheel (50). Tumare mursh tchawe hunte budrenn ap leskro kotar phub un anenn leskro djob dren, hoi bares was. Ninna hunte krenn le leskre chare, un kol kotja, kai leskre wurdja dran kerdo wenna.
13 Un tumare tchen lell lo peske, te krenn le sungepaskro koowa, kerenn chapen, un pekenn maro un merklia. 14 Tumare feteder kotja phub lell lo tumendar, ninna ko feteder them, kai tumare drakengre ruka un djeteskre ruka tardo hi. Kowa lauter lell lo un dell les peskre pralstune budepangrende. 15 Ninna lell lo o deshto kotar tumaro djobestar un tumare drakendar un plaissrell kolentsa kolen, kai budrenn an leskro kheer, ninna wawar pralstune budepangren. 16 Un tumare budepangre, mursha un djuwja, lell lo tumendar, ninna tumare feteder grumja un esle, te budrenn le leske. 17 Tumare bakrendar lell lo hako deshto, un tumer hunte wenn leskre budepangre. 18 Palle te well ko diwes, kai denn tumer gole pral tumaro baro rajeste, koles tumenge win rodan, palle shunell tumen o baro Dewel gar an kol diwessa.”
19 I menshe kaman gar ap o Samueleste te shunell, un penan: “Na-a, mer kamah, te well i baro rai pral mende, 20 te was mer jaake har i menshe an wawar themma ninna. Un maro baro rai te rakrell o tchatchepen pral mende win un djal menge glan win an o kurepen.”
21 Un o Samuel shunas lengre tsele laba, un penas len o baro Debleske. 22 Un o baro Dewel penas ap o Samuel: “Shun ap lende un tchip i baro rajes pral lende!”
Pal kowa penas o Samuel ap i Israeleskre murshen: “Djan khere, hakeno an peskro foro!”