24
O Josua mukell i Israelitarjen win te rodell, koon lengro Dewel te well
1 Un o Josua mukas menshen dran haki bari familja, kai wan kol deesh-te-dui tchawendar o Jakobestar pash peste an o foro Sichem khetne gole te dell, i phureden, i pralstunen pral i bare familje, i tchatchepangre murshen, un wawar pralstunen. Un jon wan khetne glan o Debleste. 2 Un o Josua penas ap i tsele menshende: “Kawa penell o baro Dewel, kai o Israeleskro Dewel hi: Glan rah tsiro djiwan tumare phure ap i wawar rig ko lengsto panjestar Eufrat un mangan wawar deblen an. Jek lendar his o Terach, koleskre tchawe o Abraham un o Nahor his. 3 Un me lom tumaro dades Abraham dran ko them ap i wawar rig o panjestar Eufrat, un anom les an o them Kanaan, un mukom les kote trujel te djal, un mukom leskri familja bares te well. Un dom les o Isaak. 4 Un o Isaakeste dom o Jakob un o Esau. Un i menshenge dran o kheer Esau dom i berge Seir, te djiwenn le kote. O Jakob un leskre tchawe djan tele an o them Egiptia. 5 Pal bud tsiro bitchrom o Mose un o Aron pash lende, un anom bari bibacht pral o them Egiptia koweha, hoi krom kote. Pal kowa lom tumare phuren dran o them Egiptia win. 6 Un har anom len win, lan len i Egiptarja palla pengre kurepaskre wurdjentsa un grajentsa. Un har tumare phure pash o Baro Lolo Pani wan, 7 kote dan le gole ap mande, o baro Debleste. Un me tchiwom rati mashkral lende un i Egiptarjen. Un mukom o baro pani pral i Egiptarjen te well. Un o pani tchakras len. Un tumare phure dikan pengre jakentsa, hoi me ap i Egiptarjen krom.
Un tumer djiwan i rah tsiro an o mulo them. 8 Palle anom me tumen an o them ap i wawar rig o panjestar Jordan, kai i Amorarja djiwan. Un jon kuran pen tumentsa. Un me dom len an tumaro wast. Un tumer lan lengro them dren. Un me tradom len glan tumende win, bis te kek lendar pral atchas. 9 Ninna o baro rai pral o them Moab, o Balak, koleskro dad o Zippor his, kamas pes tumentsa te kurell. Un job bitchras pal o Bileam, koleskro dad o Beor his, te well lo, un te rakrell lo bibacht pral tumende win. 10 Me kamom gar te krell, hoi o Bileam mandar kamas. Un job hunte rakras bacht pral tumende win. Jaake lom me tumen dran o wast o rajestar Balak win. 11 Tumer djan pral o Jordan wergel, un wan pash o foro Jericho. Kote kuran pen i mursha dran Jericho tumentsa. Un me dom len an tumare wasta, un ninna kol wawar menshen, kai an kau them djiwan: i Amorarja, i Perisarja, i Kanaanitarja, i Hetarja, Girgasharja, i Hiwarja un i Jebusarja. 12 Me krom, te lan le bari traash tumendar. Jaake tradom len glan tumende win, har tradom glan kowa ninna kol dui rajen pral i Amorarjen glan tumende win. Tumare chare un boge kran kowa gar. 13 Un me dom tumen i them, koleske tumer tumen gar tele maran, un forja, hoi tumer gar pre tchiwan. Kanna djiwenn tumer an kal forja un chan kol drake fun i drakengre ruka un djeteskre ruka, hoi tumer gar an i phub tchiwan.”
14 Un o Josua penas dureder: “Pash halauter, hoi krenn, rikrenn tumenge o baro Debles glan i jaka! Mangenn les an i djudjo un tchatcho djijeha! Tchiwenn i chochene deblen krik, kolen tumare phure an-mangan, har his le ap i wawar rig o panjestar Eufrat un an o them Egiptia. Mangenn kokres o baro Debles an! 15 Hi tumenge gar mishto an tumare jaka, te mangenn o baro Debles an, palle rodenn kau diwes kate win, kones tumer kamenn an-te-mangell: Kol deblen, kolen tumare phure an-mangan, har jon gomme ap i wawar rig o lengsto panjestar his, oder kol chochene deblen, kolen i Amorarja an-mangenn, an kolengro them tumer kanna djiwenn. Me un miro kheer, mer kamah o baro Debles an-te-mangell.”
16 Kote penan i Israelitarja pale: “An kek tsiro kamah o baro Debles te mukell un wawar deblen an-te-mangell. 17 O baro Dewel hi maro Dewel, un job his kowa, kai las men un mare phuren dran o them Egiptia win, kai pandle hams. Un glan mare jaka kras job kau tselo baro koowa an peskri soor. Un das ap mende jak, o tselo drom, har djam an i tsele themma, kai kol wawar menshe djiwan. 18 Un job tradas kol wawar menshen glan mende win, ninna kol Amorarja, kolla kai an kau them djiwan. Doleske, kamah mer ninna o baro Debles an-te-mangell. Job hi maro Dewel.”
19 Kote penas o Josua ap i tsele menshende: “Kowa nai wals tumenge phares, o baro Debleske koi te well. Kek wawar dewel hi har job hi. Un job kamell tumendar, te mangenn les kokres an. Te djan tumer leskro dromestar tele un hadenn tumen pral leste, bistrell lo kowa gar. 20 Te mukenn tumer o baro Debles, un mangenn wawar deblen an, palle dikell lo buder gar latches ap tumende un sikrell tumenge o dumo, un anell bibacht pral tumende, bis te buder kek tumendar koi hi.”
21 Un i tsele menshe penan pale ap o Josua: “Tchatchepah, o baro Dewel hi kowa, koles kamah an-te-mangell.”
22 Kote penas o Josua ap i tsele menshende: “Tumer han kolla, kai dikan un shunan, har tumer penan: Mer rodam o baro Debles win, te mangas les an.”
Un jon penan: “Awa, jaake hi kowa.”
23 Koi penas o Josua: “Jaake tchiwenn kanna kol chochene deblen krik, hoi mank tumende hi. Un rissrenn tumare djia pash o baro Debleste, kai o Israeleskro Dewel hi.”
24 Un i tsele menshe penan ap o Josua: “O baro Debles, kai maro Dewel hi, koles kamah an-te-mangell. Un ap kowa, hoi job penella, kamah mer te shunell.”
25 Jaake kras o Josua, te dan i Israelitarja o baro Debleske pengro lab, te hi job lengro Dewel. Un kote an o foro Sichem, das lo len kol tchatchepaskre laba un kol wawar laba, hoi sikrenn, hoi o Dewel lendar kamell. 26 Un o Josua tchinas kal tsele laba an o liil, hoi sikrell o Debleskro drom. Un job las i baro bar un tchiwas les koi tardo, tel ko baro ruk, hoi pash o baro Debleskro plachteno kheer tardo his.
27 Un o Josua penas ap i tsele menshende: “Dikenn kau bar! Kawa shunas hako lab, hoi o baro Dewel mentsa rakras. Kau bar hi kate tardo, te dell lo tumen trad, te mukenn gar tumaro Debles.”
28 Un o Josua mukas i tsele menshen khere te djal, hakenes an ko them, hoi les dino was.
O Josua merell
29 Un pal kowa meras o baro Debleskro budepaskro, o Josua, koleskro dad o Nun his. O Josua was 110 (jek-sheel-deesh) bersha. 30 Un job was paskedo ap peskro kotar phub, hoi leske dino was, an o foro Timnat-Serach, hoi ap i berge Efrajim tchiddo hi, ap i nordetikri rig i bergatar Gaash. 31 Un i Israelitarja mangan o baro Debles an, jaake rah har o Josua djiwas, un jaake rah, har pal leste kol phureder djiwan, kai ko tselo koowa dikan, hoi o baro Dewel i Israelenge kras.
32 Un o Josefeskre kokale, hoi i Israelitarja pentsa lan dran o them Egiptia, paskran le an o foro Sichem ap ko kotar phub, hoi o Jakob ginas kol tchawendar o murshestar Hamor, koleskro dad o Sichem his. O Jakob plaissras ko kotar phub 100 (sheel) rupene kotja. Kau kotar them was o Josefeskre tchawenge dino.
33 Ninna o Eleasar, koleskro dad o Aron his, meras un was paskedo an o foro Gibea. Kowa his ko foro, hoi leskro tchaweske, o Pinhas, dino was ap i berge Efrajim.