18
I menshe dran i wawar efta khera lenn pengro them
1 Un i tsele Israelitarja wan khetne an o foro Shilo, un tchiwan kote o Debleskro plachteno kheer pre. Ninna te his o them an lengro wast un jon his rai pral leste, 2 his gomme i Israelitarja dran efta khera, kolenge pengro kotar them gomme gar dino was. 3 Kote penas o Josua ap i Israelitarja: “Har rah kamenn tumer kate beshdo atchenn, un djan gar win, te lenn o them dren, hoi das tumen o baro Dewel, kai o Dewel tumare phurendar hi? 4 Rodenn tumenge triin murshen win dran hakeno kol efta kherendar, kai pengro them gomme gar lan! Kolen bitchrau me palle, te dikenn le pen trujel an ko them, hoi tumer gomme gar dren lan, un tchinenn i forja un kotja them an i liil, un wenn palle pash mande pale. 5 Un jon krenn efta kotja dran ko them, te lell hako kheer jek kotar. Un o kheer Juda atchell ap peskro kotar them, hoi ap koi rig hi, kai o kham pralstunes tardo hi. Un o kheer Josef atchell ap peskro kotar them, kote, kai norden hi. 6 Tumer tchinenn an i liil, fun kai bis kai kol efta kotja them djana. Un te kran kowa, palle anenn mange, hoi pre tchinan! Un me witsrau glan maro baro Debleste i barra, hoi sikrenn, koon hoi lella. 7 I Levitarja lenn kek kotar them mashkral tumende. Lengro kotar hi, te nai wenn le rashaja o baro Debleske. Un i familje Gad un Ruben un i paash familja Manasse lan pengro kotar them ap i wawar rig o panjestar Jordan, ap koi rig, kai o kham pre djala. Kowa das len o Mose, koles o baro Debleskro wast his.”
8 Un kol wi-rodede mursha kran pen ap o drom. Un har le win djan, penas o Josua ap lende: “Djan an o tselo them trujel, un tchinenn les pre, un palle wenn pale pash mande! Un kate an o foro Shilo witsrau palle i barra glan o baro Debleste tumenge.”
9 Jaake djan kol mursha koi, un djan an o tselo them trujel, tchinan i tsele forja an i liil, un kran efta kotja kau themestar. Un palle wan le pale pash o Josua ap koi platsa, kai i Israelitarja his pash o foro Shilo. 10 Un o Josua witsras kol barra glan o baro Debleste an o foro Shilo. Un jaake har i barra peran, das o Josua i Israelende dran kol efta khera pengro them, haki bari familjake peskro kotar.
O them i menshenge dran o kheer Benjamin
11 Un i barra peran o Benjamineske un leskre familjenge. Un jon lan o them mashkral o them Juda un o them, hoi o Josefeskre tchawe lan. 12 Un i nordetikri rig fun o Benjamineskro them djas fun o pani Jordan dureder pre ap i berge, hoi ap i nordetikri rig o forestar Jericho hi, un dureder pre – kote kai o kham tele djal – an o pralstuno them, jaake dur bis pash o mulo them Bet-Awen. 13 Un ko drom, hoi sikras, har dur o them djal, djas fun kotar dureder, wergel i berga ap koi rig o forestar Lus, kai o kham pralstunes hi – o foro Lus hi ninna kharedo Betel – un dureder tele pash o foro Atarot-Addar pash koi berga, hoi ap koi rig o telstuno forestar Bet-Horon tchiddo hi, kai o kham pralstunes tardo hi. 14 Fun kai berga, ap lakri rig, kai o kham tele djal, djas o drom kote dureder, kai o kham pralstunes tardo hi, bis glan o foro Kirjat-Baal, hoi kharell ninna Kirjat-Jearim. Kau foro hi tchiddo an o them Juda. Jaake dur djas o them kote, kai o kham tele djal.
15 Un ap koi rig, kai o kham pralstunes tardo hi, djas o drom, hoi sikras har dur o them djal, fun o foro Kirjat-Jearim dureder bis pash o pani, hoi kharell Me-Neftoach. 16 Un kotar djas o drom tele glan i berga, hoi hadell pes glan i tala Hinnom. Kai berga hi tchiddo ap i nordetikri rig ko telstuno themestar, hoi kharell Refajim. Palle djas o drom tele an i tala Hinnom un dureder an i tala langs koi berga, kai ko foro tchiddo hi, kai i Jebusarja djiwan, ap koi rig i bergatar, kai o kham pralstunes hi. Fun kotar djal lo tele bis pash o pani En-Rogel, 17 un dureder ap koi rig, kai norden hi, bis pash o pani En-Shemesh un dureder pash Gelilot, hoi ap i wawar rig o dromestar tchiddo hi, hoi djal an i berga Adummim. Un palle djas o drom tele pash o bar Bohan, hoi kharedo hi pal o tchaweste o murshestar Ruben. 18 Un fun kotar djas o drom bis pash i berga, kai ap i nordetikri rig fun koi tala hi, kai o pani Jordan nashell. Un palle djas lo tele an kai tala, 19 un dureder pash i berga, hoi ap i nordetikri rig o forestar Bet-Hogla tchiddo hi, un palle dureder bis pash o Londo Baro Pani, kote kai o Jordan dren nashell. Jaake dur djas o them kote, kai o kham pralstunes tardo hi.
20 Ap koi rig, kai o kham pre djal, djas o them bis pash o pani Jordan. Un kawa his ko kotar them, hoi lan i familje dran o kheer Benjamin.
21 Un kalla hi i forja, hoi i familje dran o kheer Benjamin lan: Jericho, Bet-Hogla, Emek-Keziz, 22 Bet-Araba, Zemarajim, Betel, 23 Awim, Para, Ofra, 24 Kefar-Ammoni, Ofni un Geba. Kolla his deesh-te-dui forja un lengre gaba.
25 Ninna kol forja: Gibeon, Rama, Beerot, 26 Mizpe, Kefira, Moza, 27 Rekem, Jirpeel, Tarala, 28 Zela, Elef, un ko foro, kai djiwan i Jebusarja, hoi hi kanna Jerusalem, ninna i forja Gibea un Kirjat-Jearim. Kolla hi khetne 14 (deesh-te-star) forja un lengre gaba. Kawa hi o them, hoi lan i familje dran o kheer Benjamin.