10
O Josua penell ap o kham: Atch tardo!
1 Un o baro rai pral o foro Jerusalem, o Adoni-Zedek, shunas, te las o Josua o foro Ai dren, un das lauteren mulo, kai kote djiwan. Ninna was leske penlo, te kras o Josua ko foreha Ai un leskro baro rajeha jaake, har lo ninna o foreha Jericho un leskro baro rajeha kras. Ninna shunas lo, te kran kolla, kai an o foro Gibeon djiwenn, i Israelentsa win, te well kek kurepen mashkral lende dujende, un te djiwenn le mashkral lende. 2 Kote tapran i menshe an o foro Jerusalem bari daar. O foro Gibeon his i baro foro, jaake baro har kol forja, kolen i baro rai his, un his bareder har o foro Ai his. Un lengre tsele mursha his tchatche kurepangre.
3 Un o Adoni-Zedek, ko rai pral Jerusalem, bitchras murshen pash i bare rajende pral star wawar forja:
pash o Hoham, ko rai pral Hebron,
un pash o Piram, ko rai pral Jarmut,
un pash o Jafia, ko rai pral Lakish,
un pash o Debir, ko rai pral Eglon.
Un job mukas lenge te penell: 4 “Me mangau tumen, awenn pre pash mande, un wenn ap miri rig, te nai maras mer o foro Gibeon! Leskre menshe kran o Josueha un i Israelentsa win, te well kek kurepen mank lende.”
5 Koi wan kol pantch bare raja pral i Amorarja khetne: kol bare raja pral i forja Jerusalem, Hebron, Jarmut, Lakish, un Eglon. Un lengre tsele lurde wan lentsa. Un jon djan khetne un tchiwan pen trul o foro Gibeon, te lenn le les dren un kuran pen lentsa.
6 Koi bitchran i Gibeonarja murshen pash o Josua ap koi platsa pash Gilgal, kai i Israelitarja hi, un mukan leske te penell: “Ma muk men kokres! Mer ham tire budepangre! Ab jaake sik har djala pash mende pre, un ab ap mari rig, te meras gar! I tsele bare raja pral i Amorarja, kai an o pralstuno them djiwenn, tchiwan pen khetne te kurenn le pen mentsa.”
7 Kote djas o Josua dran o foro Gilgal win. Un leskre tsele lurde, ninna i tsele tchatche kurepangre djan leha. 8 Un o baro Dewel penas ap o Josua: “Ma traash lendar! An tiro wast dom me len. Kek mursh lendar nai atchell glan tute tardo.”
9 Un o Josua djas peskre murshentsa dran Gilgal i tseli rat, un was jaake sik pral i Amorarja, te nai haiwas kowa kek lendar. 10 Un o baro Dewel kras len jaake dareno, te nai maran len i Israelitarja phares pash o foro Gibeon. Un jon lan len palla ap ko drom tele pash o foro Bet-Horon, un maran len bis pash i forja Aseka un Makkeda.
11 Un har i Amorarja glan i Israelitarja nashan ap o drom, hoi djal tele pash Bet-Horon, kote mukas o baro Dewel brishineskre barra dran o bolepen ap lende te perell ap o tselo drom bis pash Aseka, jaake te wan le i barrendar mulo dino. Un kol brishineskre barra maran budeder lendar har i Israelitarja o chareha mulo dan.
12 Ap ko diwes, kai o baro Dewel i Amorarjen an o Israeleskro wast das, rakras o Josua o baro Debleha un kharas win glan i Israelitarja: “Kham, atch tardo pral o foro Gibeon! Un tu, tchona atch tardo an i tala Ajalon!” 13 Kote djas o kham gar dureder un o tchon atchas tardo, jaake rah bis te i Israelitarja kolen lauteren maran, kai kuran pen lentsa. Un kawa hi tchinlo an o liil ‘Jashar’.
Un o kham atchas mashkral o bolepen tardo, un djas gar sik tele, un atchas jaake tardo jek tselo diwes. 14 Un sawo diwes har kowa diwes das gar glan ko diwes un ninna buder gar pal ko diwes, kai shunas o baro Dewel jaake ap o rakepen jek menshestar. O baro Dewel kras kowa i menshenge Israel!
15 Pal kowa djas o Josua peskre tsele lurdentsa pale pash lengre platsa an Gilgal.
O Josua taprell un marell i pantch bare rajen pral i Amorarja
16 Har kol pantch bare raja penge nashan, khatran le pen an i grotta pash o foro Makkeda. 17 Koi wan mursha pash o Josua un penan leske: “Mer hatsam kol pantch bare rajen khatedo an i grotta pash Makkeda.”
18 Koi penas o Josua: “Tchiwenn bare barra glan i grotta, te nai djal kek win. Un tchiwenn murshen glan late tardo, hoi ap late jak denn. 19 Tumer wawar, atchenn gar tardo! Lenn i Amorarjen palla, kai gomme ap o naashepen hi, taprenn len, un mukenn len gar an pengre forja te well! O baro Dewel hi tumaro Dewel un das len an tumaro wast.”
20 Un o Josua peskre murshentsa maran len jaake phares khetne, te atchan lendar buder gar bud. Un kolla, kai nashan nai penge, nashan an kol forja, kai pre-tchidde barra trul lende his.
21 Pal kowa djan i tsele Israeleskre lurde pale pale pash o Josua ap lengre platsa pash Makkeda. Un kek lendar his dukedo. Un kek mensho an o tselo them kras buder o mui pre, te rakrell lo djungeles pral o Israel.
22 Un o Josua penas: “Lenn i barra krik glan koi grotta, un lenn kol pantch bare rajen win un anenn len pash mande!”
23 Un jon kran kowa, un anan kol pantch rajen dran i grotta pash leste: O rai pral Jerusalem, o rai pral Hebron, o rai pral Jarmut, o rai pral Lakish un o rai pral Eglon.
24 Un har le kol rajen pash o Josua anan, mukas job i tsele Israeleskre murshen khetne gole te dell, un penas ap i pralstunende pral i lurdende: “Awenn kate un tchiwenn tumare pire ap lengre meen!” Un jon wan un kran kowa.
25 Un o Josua penas ap i pralstunende: “Ma darenn kekestar un tchi! Awenn soreles un ma trashenn! Jaake har kate dikenn, krell o baro Dewel lauterentsa, kai kurenn pen tumentsa.”
26 Un pal kowa mukas o Josua kol pantch rajen mulo te dell, un ap pantch ruka pre te bladellb. Un jon atchan koi bis ap i rat. 27 Un har o kham tele djas, penas o Josua, te lenn le len pale kol rukendar tele. Un jon witsran len an koi grotta, kai khatran le pen. Un tchiwan bare barra koi glan. Un kol barra hi gomme kau diwes koi.
O Josua lell wawar forja dren
28 Un ko diwes las o Josua ninna o foro Makkeda dren. Un o baro rajes un lauteren, kai an ko foro djiwan, das lo mulo, un mukas kekes djido. Un o baro rajeha pral o foro Makkeda, kras lo jaake har lo les ninna o baro rajeha pral o foro Jericho kras.
29 Un palle djas o Josua un i tsele Israeleskre lurde dran Makkeda win un wan pash o foro Libna un kuran pen kolentsa, kai kote djiwan. 30 Un o baro Dewel das ninna kolen un lengro baro rajes an o Israeleskro wast. Un i Israelitarja dan len o chareha. Lauteren, kai an ko foro djiwan, dan le mulo, un mukan kekes krik te nashell. Un ko baro rajeha kran le jaake har o baro rajeha pral o foro Jericho.
31 Un pal kowa djas o Josua un i tsele Israelitarja dran o foro Libna dureder un wan pash o foro Lakish. Un jon tchiwan pen trul o foro, un kuran pen kolentsa, kai kote djiwan. 32 Un o baro Dewel das o foro Lakish an o Israeleskro wast. Un ap o wawar diwes lan le o foro dren, un dan lauteren o chareha mulo, kai kote djiwan. Jaake har kran le an o foro Libna, kran le kate ninna.
33 An kau tsiro djas o baro rai pral o foro Geser, o Horam pre, te well lo ap i rig kolendar, kai djiwenn an o foro Lakish. Ninna les un leskre lurden maras o Josua jaake, te nai atchas kek lendar.
34 Palle djas o Josua un i tsele Israelitarja dran o foro Lakish win un dureder pash o foro Eglon. Un jon tchiwan pen trul o foro un kuran pen kolentsa, kai kote djiwan. 35 Un jon lan ko foro gomme kau diwes dren. Un dan les o chareha. Un lauteren, kai dren djiwan, das lo mulo. Jaake har lo kowa o foreha Lakish kras, kras lo kate ninna.
36 Palle mukas o Josua o foro Eglon pal peste un djas pash o foro Hebron. Un i tsele Israelitarja djan leha. Un jon kuran pen kolentsa kai kote djiwan, 37 un lan o foro dren, un dan o baro rajes un i tsele menshen o chareha mulo, ninna kolen, kai an i forja koi trujel djiwan. Un jon mukan kekes te nashell. Jaake har lo kowa an o foro Eglon kras, kras lo kate ninna.
38 Un kote rissras o Josua trujel un djas pash o foro Debir. Un i tsele Israelitarja djan leha un kuran pen kolentsa, kai kote djiwan, 39 un lan o foro dren, ninna kol forja, hoi trul o foro Debir his. Un jon dan lengro baro rajes un i tsele menshen o chareha mulo, un mukan kekes te nashell. Jaake har lo kowa o foreha Hebron un o foreha Libna un leskro baro rajeha kras, kras lo ninna o foreha Debir un leskro baro rajeha.
40-41 Jaake las o Josua o tselo them dren: o pralstuno them, un o them, kai o kham pralstunes hi, ninna o telstuno them un o them ap i berge, – ko tselo them mank Kadesh-Barnea un Gaza, un mank Gosen un Gibeon. O Josua das i tsele bare rajen mulo, ninna lengre tsele menshen. Un job mukas kekes ap o djipen te atchell, jaake har penas leske o baro Dewel, – o Dewel pral o Israel.