20
Pani well dran i baro bar
1 Un kol tsele Israelitarja wan an o mulo tato them Zin, an o ersto tchon. Un i menshe tchiwan pengre plachtene khera pre pash o foro Kadesh. Un i Mirjam meras koi un was paskedo.
2 Un i tsele menshen his kek pani, un wan khetne pash o Moseste un o Aroneste. 3 Un jon tchingran ap o Mose un penan: “Ach, te merams mer an ko tsiro, har mare menshe meran glan o baro Debleste! 4 Hoske anan tumer o baro Debleskre menshen an kau mulo tato them, te meras mer kate mare viechentsa? 5 Un hoske anan men dran o them Egiptia ap koi tchilatchi platsa, kai nai tchiwah tchi an i phub, hoi well baro, kai kek faige, kek drake, un kek phabja hi, un witar kek pani pipaske koi hi?”
6 Koi djas o Mose un o Aron i tsele menshendar krik, pash o wudar glan o Debleskro kheer, un jon witsran pen ap pengro mui. Un o Debleskro railepen mukas pes lendar te dikell.
7 Un o baro Dewel rakras o Moseha un penas: 8 “Le ko lengsto kasht un le i tsele menshen khetne, tu un tiro phraal, o Aron, un rakrenn ap ko baro bar glan lengre jaka! Kowa dell tumen pani. Jaake aness tu lenge pani dran ko baro bar, un dess i tsele menshende te pijell un lengre viechen ninna.”
9 Koi las o Mose ko lengsto kasht, kai glan o baro Debleste tchiddo his, jaake har job kowa leske penas. 10 Un o Mose un o Aron lan kol tsele menshen khetne glan ko baro bar. Un o Mose penas ap lende: “Shunenn, tumer kai djan hako tsiro pal tumaro shero! Nai lah mer tumenge pani dran kau baro bar?”
11 Un o Mose hadas peskro wast, un das ko lengsto kashteha dui kope ap ko baro bar. Koi was jaake bud pani dran win, kai pijan i tsele menshe un lengre vieche.
12 O baro Dewel penas ap o Moseste un ap o Aroneste: “Tumer patsan gar, hoi penom, un sharan man gar glan kol Israelitarja. Doleske anenn tumer gar kol menshen an ko them, hoi me len dau.”
13 Kau pani kharan le ‘Meriba’a. Kate tchingran i Israelitarja ap o baro Debleste. Un kate sikras lo lende, kai job tchatchepah o baro un sorelo Dewel hi.
I Edomarja mukenn i Israelitarjen gar mank pengro them te djal
14 Har hi le an o foro Kadesh, bitchras o Mose jekes pash o baro rajeste pral kol Edomarja, un mukas leske te penell: “Kowa mukell tuke tiro phraal Israel te penell: Tu djineh, hawo pharo tsiro ap mende was, 15 kai mare phure an o them Egiptia djan, un mer i rah tsiro an o them Egiptia djiwam, un kai kol Egiptarja menge un mare phurenge o djipen phares kran. 16 Un mer dam pal o baro Debleste gole. Kowa shunas men un bitchras i bolepaskres. Un job anas men dran o them Egiptia win. Kanna ham an Kadesh, i foro gar dur tiro themestar. 17 Muk men mank tiro them te djal ap i wawar rig! Mer kamah ap o drom te atchell un gar ap i hachetikri phub un an i drakengre themma te djal. Kamah witar gar pani dran i brunne te pijell. Na-a, mer djah gar tchatches, witar gar serwes, bis te wam ap i wawar rig.”
18 O baro rai pral o Edom penas ap lende: “Tu djas gar mank miro them! Te weh, wau me pash tute o chareha.”
19 I Israelitarja penan ap leste: “Mer kamah ap ko shukar drom te djal. Un te pijah mer tiro pani, mer un mare vieche, kamah mer kowa plaissrell. Mer kamah tchi har te djas mare herjentsa koi wergel.”
20 O baro rai penas: “Tu djas gar koi wergel.”
Un kol Edomarja djan win ap ko drom pash lende bud sorele lurdentsa. 21 Jaake kran kol Edomarja, te djan kol Israelitarja gar mank lengro them. Un o Israel djas i wawar drom.
O Aron merell
22 Un i tsele Israelitarja djan dran o foro Kadesh dureder, un wan pash koi berga Hor. 23 Un o baro Dewel rakras o Moseha un o Aroneha pash koi berga Hor, hoi gar dur o themestar Edom hi, un penas: 24 “O Aroneskro tsiro nashas tele, un job well gar an ko them, kai dom i Israelitarjen. Tumer shunan gar ap kowa, hoi penom pash o pani ‘Meriba’. 25 Le o Arones un leskro tchawes Eleasar, un an len ap koi berga Hor, 26 un rib o Aroneske peskre rashajeskre koola win, un rib len leskro tchaweste Eleasar an! Un o Aron merella kote.”
27 Koi kras o Mose jaake har o baro Dewel leske penas. Un jon djan ap koi berga Hor glan kol tsele menshende Israel. 28 Un o Mose riwas o Aroneske i rashajeskre koola win, un riwas len leskro tchaweste Eleasar an. Un o Aron meras koi, pre ap i berga. Un o Mose un o Eleasar djan i berga tele. 29 Un har kol tsele menshe dikan, kai o Aron mulo hi, rowas o tselo kheer Israel pral leste 30 (trijanda) diwessa.