18
Har i rashaja un i Levitarja hunte krenn pengri budi
1 Un o baro Dewel penas ap o Aron: Tu un tire tchawe, un tire menshe, i tsele Levitarja, tumer hunte hidjrenn koi doosh, te krell jek tchomone, hoi gar tchatcho hi pash peskri budi an o Debleskro kheer.
Te was tchomone kerdo, hoi gar tchatcho hi pash i rashajeskri budi, hunte less tu kokres tire mursh tchawentsa koi doosh ap tute.
2 I Levitarja hi tire phrala, kolen less tu pash tute, te atchenn jon pash tute un budrenn tuke. Tu kokres tire tchawentsa han mire rashaja un budrenn glan o Debleskro kheer, kai o Debleskre deesh laba dren hi. 3 Un kol wawar Levitarja hunte budrenn tuke, un krenn koi budi ap o tselo Debleskro kheer. O Debleskri chatchepaskria un ko tselo Debleskro koowa, koleha budreh tu an o Debleskro kheer, kowa taprenn le gar an, te merenn jon gar, un tumer lentsa.
4 I Levitarja hunte wenn tumenge pash o wast pash i tseli budi ap o Debleskro kheer. Mukenn kek wawares tumenge pash o wast te well! 5 Jaake har kanna penom, krenn koi budi an o Debleskro kheer, un koi budi ap o Debleskri chatchepaskri, te well buder gar miri choli pral kol Israelitarja! 6 Un me lom tumare phralen, i Levitarja, dran i wawar Israelitarja win, te dap len tumende, te wenn le mange koi, o baro Debleske, un krenn koi budi ap o Debleskro plachteno kheer.
7 Tu un tire tchawe, tumer han mire rashaja, te krenn tumari budi pash o Debleskri chatchepaskri un dren an o kutch isema, hoi pal o wudar dran o kutch kotar than hi. Kai budi dom me tumen. Te well jek wawar pash o Debleskro koowa, hoi koi dren hi, hunte merell lo.
8 Un o baro Dewel penas ap o Aroneste: Shun, tu budreh mange. Doleske dau me tut un tire tchawen i kotar lauterestar, hoi i Israelitarja mange anenna. Kowa te well jaake hako tsireske. 9 Tuke hi kol tsele kotja, hoi wenn gar pre-chatchedo kol tsele viechendar, hoi denn le mande, te well lengri doosh krik lino un te well lauter pale mishto, ninna ko tselo chapen, hoi denn le pashel. Kowa halauter hi mange kutch, un me dau les tute un tire tchawende. 10 Ko chapen hi i Debleskro chapen. Doleske chan kowa ap i Debleskri platsa! Un kokres i mursha un mursh tchawe nai chan les.
11 Ninna ko wawar koowa, hoi i Israelitarja mange anenn, dau me tute un tire tchawende un tchende, hako tsireske. Koon gar pale-tchiddo hi an tiro kheer nai chal kolestar. 12-13 Ko tselo latcheder djet, un ko latcheder mool un djob, ninna lauterestar hoi glanstunes bares was ap i hachetikri phub, kowa halauter, hoi jon o baro Debles dan, dau me tumende. Koon gar pale-tchiddo hi an tiro kheer nai chal kolestar. 14 Lauter, hoi i Israelitarja an mire wasta dan, hi tumenge. 15 Hako mursh, kai o phureder tchawo peskri datar hi, – pash i menshende, ninna pash i viechende, – koles jon o baro Debleske anenna, hi tumenge. I menshes dess tu pale un less lowe leske. Ninna i viecho, hoi pale-tchiddo hi, dess tu pale un less lowe leske.
16 I mursh tchaweske less tu pantch rupene kotja ap ko tsiro, kai hi lo jek tchon phuro. Jek kotar rup hi deesh-te-dui gramme pharo. Jek grammi hi jaake bud har jek grammi an o Debleskro kheer hi. 17 I grumni, i bakro un i busni dess tu gar pale un less kek lowe lenge. Jon wenn mange. Lengro rat tchoress tu ap o Debleskri chatchepaskrib. Un lengro thulepen chatchress tu o baro Debleske, te sungell o sungepen, hoi pre djala, mishto o Debleske. 18 Lengro mass hi tuke, jaake har ko betch un koi tchatchi heri, te chan tumer kowa khetne glan mande.
19 Ko tselo koowa, hoi i Israelitarja o baro Debleske anenna, dau me tuke un tire tchawenge un tire tchenge. Un tumenge hi kowa hako tsireske. Ap ko lab dau me miro wast. Kek nai lell ko lab krik, hoi dom tut un tire tchawende, kai pal tute wenna.
20 Un o baro Dewel penas ap o Aroneste: Ap ko tsiro, kai wenn i Israelitarja an lengro them, leh tu kek kotar phub, hoi djal o dadestar ap o tchaweste dureder, jaake har kowa i wawar Israelitarja lenna. Me hom tiro, un hom tiro brawlepen. 21 Kol Levitarjen dau me ko deshto kotar lauterestar, hoi an o them Israel bares wella. Jon budrenn ap miro kheer. Doleske lenn jon kowa.
22-23 Kanna un an ko tsiro, hoi wella, hunte djan kokres i Levitarja pash o Debleskro kheer, un gar i wawar Israelitarja, te lenn jon kek doosh ap pende un merenna. Kol Levitarja hunte krenn koi budi ap o Debleskro kheer. Un jon hunte hidjrenn i doosh ap pende, te well tchomone kerdo, hoi gar tchatcho hi. Kowa hunte well jaake hako tsireske pash kolende, kai pal tumende wenna. Un len hunte well kek kotar phub, hoi djal dureder o dadestar ap o tchaweste, har kowa i wawar Israelitarja lenna. 24 Kowa, hoi i Israelitarja mange anenna, ko deshto kotar lauterestar, hoi ap lengre phub bares was, kowa dau me kol Levitarjen. Kowa hi lengro brawlepen. Doleske penom me ap lende, te well len kek kotar phub, har kol wawar Israelitarja lenna.
25 Un o baro Dewel rakras o Moseha un penas: 26 Pen ap i Levitarja: Te anenn tumen i Israelitarja o deshto kotar kolestar, hoi ap lengre hachetikri phub bares was, – kowa hi, hoi dau tumenge, – palle hunte denn tumer kolestar mande ninna o deshto kotar. 27 Un kawa, hoi tumer mande denna, hi jaake, har te dans tumer djob un mool. 28 Jaake har hako wawar Israelitari della, jaake hunte denn ninna tumer man, o baro Debles, o deshto kotar lauterestar, hoi denn tumen kol Israelitarja. Tumaro kotar hunte denn kol rashajeste, o Aroneste. 29 Lauterestar, hoi denn le tumende, hunte denn tumer o baro Debles o feteder kotar. 30 Te kran kowa, palle nai rikrenn tumenge, hoi pral atchell, jaake har o hacho rikrell o djob un i mool, hoi pral atchell. 31 Tumer nai chan kowa ap haki platsa, tumer un tumare tchawe. Kowa hi o plaissepen tumari budjake ap o Debleskro plachteno kheer. 32 Tumer anenn koi pashel kek doosh ap tumende, jaake rah har dan tumer ko feteder kotar o baro Debleste. Kowa, hoi i Israelitarja anenna hi mange, o baro Debleske un hunte atchell mange. Doleske denn jak, te denn man glanstunes o feteder kotar, un palle nai chan tumer. Te krenn kowa gar, hunte merenn!