16
O Korach peskre murshentsa hadell pes ap o Moseste un merell
1-2 Un o Korach, – leskro dad his o Jizhar, – i Levitari kolendar, kai wan pal o Kohat, ko Korach was chojedo ap o Moseste. Khetne leha his mursha, kai wan dran o kheer Ruben: o Datan un o Abiram, kolengro dad o Eliab his, un o On, koleskro dad o Pelet his. Pash lende his ninna 250 (dui-sheel-te-paash-sheel) wawar Israelitarja, kai pralstune his mank i Israelitarja, wi-rodede un an-dikle mursha. 3 Un jon halauter wan khetne pash o Mose un o Aron, tchingran ap lende un penan: “Tumer krenn, har te wans bareder har mer wawar! O tselo kheer Israel hi o Debleskre menshe. Un o baro Dewel hi mashkral lende. Hoske hadenn tumer tumen pral o baro Debleskre menshende?”
4 Har o Mose kowa shunas, witsras lo pes ap peskro mui, 5 un penas ap o Korach un ap kolende, kai pash leste his: “Taissar penell o baro Dewel, koon leskre menshe hi, kones job peske wi-rodas, un koon nai well pash leste. Un kones job win rodella, kowa nai well pash leste. 6 Taissarlakro lenn tumenge pirja, tu o Korach un kol tsele mursha, kai pash tute hi! 7 Un krenn jag koi dren, un tchiwenn sungepaskro koowa koi pre, un anenn kowa glan o baro Debleste! Kones koi o baro Dewel wi-rodella, kowa hi leskro. Tumer, i Levitarja, han kolla, kai krenn, har te wans i bareder!”
8 Un o Mose penas ap o Korach: “Shunenn, tumer Levitarja! 9 Hi kowa tumenge gar doha, kai o Israeleskro Dewel tumen win rodas dran i tsele Israelitarja, te wenn pash leste, te krenn tumari budi ap o Debleskro kheer? Tumer nai wenn i tsele menshenge Israel koi. 10 Job mukas tut, o Korach, un tire tsele phralen, kol Levitarja, pash leste te well. Un tumer kamenn kanna ninna rashai te well! 11 Tu un tire tsele menshe tchiwan tumen khetne, te hadenn tumen pral o baro Debleste. Kowa hi gar o Aron, pral koleste hadan tumen.”
12 Un o Mose mukas kol dui murshen, o Datan un o Abiram, pash peste te kharell. Kolengro dad hi o Eliab. Jon penan: “Mer wah gar. 13 Hi kowa tuke gar doha, kai lal men dran ko them, kai hi bud thud un gwina, un mukeh men te merell an o mulo tato them? Kameh tu ninna rai pral mende te well? 14 Hi kawa them i them, kai hi bud thud un gwin? Un dal tu men i hachetikri phub un drakengre themma, kai menge hi? Ma pande kol menshen i jaka! Mer wah gar.”
15 Koi was o Mose chojedo, un penas ap o baro Debleste: “Ma dik latches ap kowa, hoi jon tut denna! Me lom gar i burikab lendar, un krom len kek tchilatchepen.”
16 Un o Mose penas ap o Korach: “Tu un tire tsele menshe hunte wenn taissar glan o baro Debleste, tu un jon un o Aron! 17 Un hakeno lell peskri piri, un tchiwell sungepaskro koowa dren, un well glan o baro Debleste, hakeno peskri pirjah, dui-sheel un paash-sheel pirja, – ninna tu un o Aron, hakeno peskri pirjah.”
18 Un hakeno las peskri piri, un tchiwas jag koi dren, un ko sungepaskro koowa koi pre. Un jon djan pash o wudar glan o Debleskro kheer, ninna o Mose un o Aron. 19 Un o Korach las i tsele menshen khetne ap peskri rig, un was lentsa glan o Debleskro kheer pash o wudar.
Koi was o baro Debleskro railepen glan i tsele menshende. 20 Un o baro Dewel rakras o Moseha un o Aroneha, un penas: 21 “Djan kol menshendar krik, te marap len sik.”
22 Kol dui mukan pen ap pengro mui te perell, un penan: “Ach Dewel, tu hal o Dewel, kai das hakenes o djipen! Te kras jek mursh i tchilatcho koowa, kameh tu doleske tiri choli pral i tsele menshende te tchiwell?”
23 Un o baro Dewel rakras o Moseha, un penas: 24 “Pen ap i tsele menshende: Djan halauter krik, kai djiwenn trul koi platsa, kai djiwell o Korach, o Datan, un o Abiram!”
25 O Mose stas pre, un djas pash o Datan un o Abiram, un kol phureder mank i Israelitarja djan leske palla. 26 Un job penas ap i tsele menshende: “Djan krik kol plachtene kherendar kol menshendar, kai shunenn gar ap o Debleste! Un taprenn ap tchi, hoi len hi, te merenn tumer gar ap ko tselo tchilatcho koowa, hoi jon kran!”
27 Un jon djan penge un mukan koi platsa, kai djiwas o Korach un o Datan un o Abiram. O Datan un o Abiram djan win dran lengre plachtene khera un his tardo glan o wudar pengre djuwjentsa, tchawentsa, un tchawengre tchawentsa.
28 Un o Mose penas: “Koi pre hunte dikenn tumer, kai bitchras man o baro Dewel, te krap ko tselo koowa, un kai me kowa gar mandar krau. 29 Jon te merenna jaake har i tsele menshe merenna, palle bitchras man o baro Dewel gar. 30 Te krell o baro Dewel tchomone newes, kai i phub krell peskro mui pre, un tserdell len dren lauterentsa, hoi len hi, jaake te djan jon djides tele an o mulengro them, palle djinenn tumer, kai kalla mursha pral o baro Debleste djungeles rakran.”
31 Un pal kowa, har job kol tsele laba penas, djas koi phub tel lende pre, 32 un kras peskro mui pre, un tserdas len tele pengre familjentsa un kol tsele menshentsa, kai pash o Korach his, ninna halauter, hoi len hi. 33 Un jon djan djides tele an o mulengro them lauterentsa, hoi len hi. Un i phub tchakras len. Un jon meran mashkral win dran kol tsele menshende.
34 Har i wawar Israelitarja, kai trul lende his, shunan, har jon gole dan, nashan le penge. Jon trashan, te chal len i phub ninna pre.
O baro Dewel bitchrell i jag
35 Un o baro Dewel bitchras jag, kai chas kol 250 (dui-sheel-te-paash-sheel) murshen pre, kai anan ko sungepaskro koowa o Debleske.