7
I pralstune pral i Israelitarja anenn kutch koowa o Debleskro khereske
1 Un har o Mose o Debleskro plachteno kheer pre tchiwas, makas lo les o djeteha o Debleske. Ninna ko tselo koowa, hoi koi dren hi, ninna o Debleskri chatchepaskria un halauter, hoi pashel hi, makas job o djeteha o Debleske.
2 Koi wan kol pralstune pral i Israelitarja un anan kutch koowa o Debleske. Hakeno his o pralstuno pral jek kol deesh-te-dui bare familjendar, kai wan kol deesh-te-dui Jakobeskre tchawendar. Un jon his kolla, kai tchinan i laba kolendar pre, kai an lengre familje hi. 3 Un jon anan ko kutch koowa glan o baro Debleste: shob sorele wurdja un deesh-te-dui grumja. Dui pralstune khetne anan jek wurdin, un hakeno lendar anas jek grumni. Un jon anan len glan o Debleskro kheer.
4 Un o baro Dewel rakras o Moseha un penas: 5 “Le kowa lendar un de les kol Levitarjen, te nai krenn jon pengri budi ap o Debleskro kheer un nai hidjrenn pengre kotja!”
6 Koi las o Mose kol wurdja un grumja un das kowa kol Levitarjen. 7 Dui wurdja un star grumja das job kolen, kai wan pal o Gershon, te nai hidjrenn le pengre kotja. 8 Un star wurdja un ochta grumja das job kolen, kai wan pal o Merari, te nai hidjrenn jon pengre kotja. Un o Itamar, ko tchawo o rashajestar Aron, das garda ap halauter. 9 Kolen, kai wan pal o Kohat, das job tchi. Lengri budi his, te hidjrenn le o Debleskro koowa, hoi an leskro kheer his. Kowa hunte hidjrenn le ap pengre phika.
10 Un kol pralstune dan kutch koowa o Debleske un anan kowa glan o Debleskri chatchepaskrib ap ko diwes, kai was koi chatchepaskri o djeteha dre-maklo. 11 Un o baro Dewel penas ap o Moseste: “Muk hako diwes jekes kol pralstunendar te well, te anell job peskro koowa. Kowa te djal jaake deesh-te-dui diwessa, te well koi chatchepaskri mange koi.”
12-83 Un jaake anan le pengro koowa:
Ap o ersto diwes was o Nachshon, – leskro dad hi o Amminadab – dran o kheer Juda.
Ap o duito diwes was o Netanel, – leskro dad hi o Zuar – dran o kheer Issachar.
Ap o triinto diwes was o Eliab, – leskro dad hi o Helon – dran o kheer Sebulon.
Ap o starto diwes was o Elizur, – leskro dad hi o Shedehur – dran o kheer Ruben.
Ap o pantchto diwes was o Shelumijel, – leskro dad hi o Zurishaddai – dran o kheer Simeon.
Ap o shobto diwes was o Eljasaf, – leskro dad hi o Deguel – dran o kheer Gad.
Ap o eftato diwes was o Elishama, – leskro dad hi o Ammihud – dran o kheer Efrajim.
Ap o ochtato diwes was o Gamalijel, – leskro dad hi o Pedazur – dran o kheer Manasse.
Ap o enjato diwes was o Abidan, – leskro dad hi o Gidoni – dran o kheer Benjamin.
Ap o deshto diwes was o Ahijeser, – leskro dad hi o Ammishaddai – dran o kheer Dan.
Ap o deesh-te-jekto diwes was o Pagijel, – leskro dad hi o Ochran – dran o kheer Asser.
Ap o deesh-te-duito diwes was o Ahira, – leskro dad hi o Enan – dran o kheer Naftali.
Hakeno anas o emligo koowa: Jek baro rupeno tcharo, jek-te-paash kilogramme pharo, jek wawar tikneder rupeno tcharo, ochta-sheel (800) gramme pharo. Jek grammi his jaake bud, har jek grammi an o Debleskro kheer his. Hake dui tchare his pherdo jarro, kai djet dren hi. Ko chapen dan le o Debleste, te well kowa leske chatchedo.
Koi pashel anas hakeno jek tikno sonakaskro tcharo, sheel-te-biish gramme pharo, pherdo sungepaskro koowa, hoi o Debleske chatchedo wella; jek terno gurum, jek mursh bakro, i wawar jek-bersheskro bakro chatchepaske o Debleske; jek mursh busni, hoi well chatchedo, te well i doosh krik lino. Ninna anas hakeno dui grumja, pantch mursh bakre, pantch mursh busja un pantch jek-bershengre bakre, te chan le len khetne glan o Debleste.
84 Lauter khetne his kowa, hoi kol deesh-te-dui pralstune pral o Israel o Debleske anan, ap ko tsiro, kai was o Debleskri chatchepaskri o djeteha dre-maklo:
deesh-te-dui bare rupene tchare,
deesh-te-dui tikneder rupene tchare,
deesh-te-dui tikne sonakangre tchare.
85 Hako baro rupeno tcharo his jek-te-paash kilogramme pharo, un hako tikneder rupeno tcharo 800 (ochta-sheel) gramme pharo. Ko tselo rup his khetne 27.600 gramme (biish-te-efta kilogramme un shob-sheel gramme) pharo. Jek grammi his jaake pharo har jek grammi an o Debleskro kheer pharo his.
86 Hako tikno sonakaskro tcharo his 120 (sheel-te-biish) gramme pharo. Khetne his kowa 1.440 gramme (jek kilogramme un star-sheel-te-star-desha gramme) sonakai. Jek grammi his jaake pharo har jek grammi an o Debleskro kheer pharo his. Kol sonakangre tchare his pherdo sungepaskro koowa, hoi chatchedo wella.
87 I tsele vieche, kai anan le, te wenn le tseles chatchedo o Debleske his khetne: deesh-te-dui terne gurmac, deesh-te-dui mursh bakre, deesh-te-dui jek-bershengre bakre, un ko chapen, hoi well pashel dino, ninna deesh-te-dui mursh busja, chatchepaske o Debleske, te well i doosh krik lino.
88 I tsele vieche, hoi dan le o Debleste, te chan le len khetne glan leste, his khetne: biish-te-star terne gurma, shob-deesh mursh bakre, shob-deesh mursh busja, shob-deesh jek-bershengre bakre.
Kowa halauter was o Debleske anlo, har was o Debleskri chatchepaskri o djeteha dre-maklo.
89 Un har o Mose an o Debleskro kheer djas, te rakrell job leha, koi shunas job leskro rakepen, hoi was kotar, kai o sonakaskro mochton hi, an leste o Debleskre deesh laba hi. Ko rakepen was mashkral kol dui bolepangred win, kai ap o pralstuno kotar hi, hoi ap ko mochton hi, un hoi sikrella, kai o Dewel peskre menshenge latcho hi. Un job rakras leha.