9
O Aron marell viechen o baro Debleske
1 Har o ochtato diwes was, kharas o Mose o Arones un leskre mursh tchawen un i phureder dran Israel pash peste, 2 un penas ap o Aron: “Le tuke i terno guruma un i mursh bakro, ko gurum, te well lo maredo, te well i doosh krik lino, un ko bakro, te well lo maredo, un leskro tselo mass o baro Debleske chatchedo. Kal dui hunte wenn sasto. Kolla an glan o baro Debleste: 3 Un rake i Israelentsa un pen lenge: Anenn jek mursh busni, hoi well maredo, te well i doosh krik lino, ninna i terno gurum un i terno bakro, hoi jek bersh phuro hi, te well lengro mass tseles chatchedo o Debleske. Kol dui hunte wenn sasto. 4 Anenn ninna i gurum un i mursh bakro, te maras mer len glan o baro Debleste, un chan len kote khetne. Koi pashel anenn jarro, kai djet dren hi, te chatchras mer les o baro Debleske. Kau diwes hi ko diwes, kai o baro Dewel pes tumenge sikrell.”
5 Jon anan kowa, hoi o Mose penas, glan o wudar o baro Debleskro plachteno kherestar. Un i tsele Israelitarja wan kote khetne glan o baro Debleste. 6 un o Mose penas: “O baro Dewel penas, te krenn tumer kawa, te sikrell lo pes tumenge an peskro railepen.”
7 Un o Mose penas ap o Aron: “Ab glan o Debleskri chatchepaskri, un an leske ko vieches, koleha tiri doosh krik lino well, un mare ninna tuke ko vieches, koleskro tselo mass o Debleske chatchedo well. Palle kre kowa kol viechentsa, hoi i Israelitarja anan, te well lengri doosh krik lino. Jaake penas kowa o baro Dewel.”
8 O Aron was glan i chatchepaskri un maras ko terno gurum, hoi job anas, te well peskri doosh krik lino. 9 Un leskre mursh tchawe anan leske o rat. Un job tchiwas peskro gushto an o rat, un makas tchomone ko ratestar ap i shingab, hoi ap i star ekke pral ap i chatchepaskri hi. Un o wawar rat tchoras lo tella pash i chatchepaskri. 10 O thulepen un i niere un ko thullo kotar ap i lebra chatchras lo ap i chatchepaskri, jaake har o baro Dewel kowa o Moseske penas. 11 O mass un i hauta chatchras lo win glan koi platsa, kai i menshe his.
12 Palle maras lo ko vieches, koleskro tselo mass o baro Debleske chatchedo well. Un leskre tchawe anan leske o rat. Un job tchoras les trul o Debleskri chatchepaskri ap leskre star rigja. 13 Un jon anan leske kol kotja mass, ninna o shero. Un job chatchras len ap i chatchepaskri. 14 Job thowas i buke, un i palstune herja, un tchiwas len pral ap ko wawar mass ap i chatchepaskri, un chatchras len.
15 Pal kowa anas lo glan o baro Debleste kol viechen, hoi i Israelitarja anan. Job maras koi mursh busni, te well i doosh i Israelendar krik lino, un kras kau viecheha jaake, har lo glan kowa koleha kras, hoi lo peskri doshake maras. 16 Palle maras lo ko viecho, koleskro tselo mass chatchedo well, un kras leha har o baro Dewel penas. 17 Ninna anas lo ko jarro, kai djet dren hi, las i wast pherdo un chatchras les ap i chatchepaskri, jaake har kras lo ap i tsalla, har lo o vieches o Debleske anas, koleskro tselo mass chatchedo was.
18 Palle maras lo ko gurum un ko bakro ko chapaske, hoi i menshe khetne chan glan o baro Debleste. Leskre tchawe anan leske o rat. Un o Aron las ko rat un tchoras les trul i chatchepaskri ap leskre star rigja. 19 Ko thulepen kol dui viechendar, koi thulli pori un o thulepen ap i buke, un i niere un o thullo kotar, hoi ap i lebra hi, 20 kau tselo thulepen tchiwas lo ap i betcheskre kotja. Un o Aron chatchras ko thulepen. 21 Kol betcheskre kotja un i tchatche palstune herja hadas o Aron glan o baro Debleste pre, te sikrell lo, kai kal tsele vieche o baro Debleske his. Jaake penas kowa o baro Dewel o Moseske.
22 Har anas o Aron kal tsele viechen o Debleske, hadas lo peskre wasta pre pral i tsele menshende, un rakras o Debleskri bacht pral lende win. Palle djas lo koi treppa tele fun koi chatchepaskri. 23 Un o Mose un o Aron djan pale an o Debleskro plachteno kheer. Un har le pale win wan, rakran le o Debleskri bacht win pral i tsele menshende. Kote sikras pes o baro Debleskro railepen glan i tsele menshende. 24 I jag djas win o baro Deblestar, un chatchras ko mass pre kol viechendar, koleskro tselo mass chatchedo well, ninna kol thulle kotja, hoi ap o Debleskri chatchepaskri tchiddo his. Har kowa i tsele menshe dikan, dan le i bachtjatar gole, un tchiwan pen tele glan o baro Debleste ap i phub.