4
I viecho, hoi well maredo, te well i doosh krik lino
1 O baro Dewel rakras ap o Mose un penas: 2 Rake i Israelentsa un pen lenge: Te kras jek tchomone, hoi hunte krals lo gar, anas lo doosh ap peste, ninna te djinas job gar, te penas o baro Dewel: ‘Ma kre kowa!’
3 Te hi kowa o pralstuno rashai, kai rikras pes gar ap o Debleskro lab, un anas jaake doosh ap i tsele Israelitarjen, palle lell lo i terno gurum, hoi gar nasselo hi, un anell les o baro Debleske, te well leskri doosh, hoi lo ap peste anas, krik lino. 4 Un job anell ko gurum glan o baro Debleste, pash o wudar glan o Debleskro kheer, un tchiwell peskro wast ap o viecheskro shero un marell les kote glan o baro Debleste. 5 Un o pralstuno rashai lell o ratestar un hidjrell les an o plachteno kheer. 6 Job tchiwell peskro gushto an ko rat, un witsrell efta kope ko ratestar glan o laintikro kotar than, hoi hi glan o Debleskri kutch isema. 7 Ninna makell lo ko ratestar ap i shinga, hoi ap i star ekke o bobestar hi, kai o sungepaskro koowa chatchedo well. Ko bob hi tardo an o Debleskro plachteno kheer. O tselo wawar rat tchorell lo win tella pash koi chatchepaskri, kai i vieche chatchedo wenna. Koi chatchepaskri hi tardo win glan o wudar o Debleskro plachteno kherestar.
8 Palle tchinell lo o tselo thulepen dran ko viecho win: ko thulepen hoi ap un pral i buke hi, 9 kol dui niere un ko thulepen, hoi ap lende hi, ninna ko thullo kotar, hoi ap i lebra hi. Pash i niere hunte tchinell lo les tele. 10 Kawa well jaake kerdo har kowa kerdo well pash ko viecheste, hoi jek glan o Debleste anell, te chan le les khetne. Un ko rashai chatchrell kal kotja ap o Debleskri chatchepaskri. 11 Kol tsele wawar kotja ko gurumestar, leskri hauta, leskro tselo mass, leskro shero, leskre herja, leskre buke un hoi koi dren hi, 12 kowa lauter hidjrell lo win, krik dran koi platsa, kai i menshe hi. Un anell kowa ap i djudji platsa, kote kai i jagakri tchik win tchoredo well. Kote chatchrell lo lauter an i jag dran kasht.
13 Te kran i tsele Israelitarja tchomone, hoi gar tchatcho his glan o Debleskre jaka, anan le doosh ap pende, ninna te djinan le gar, te penas o baro Dewel, te krenn le kowa gar. 14 Te haiwenn le pal i tsiro, kai kowa, hoi jon kran, gar tchatcho his glan o Debleskre jaka, palle hunte anenn le i terno gurum o baro Debleske, te well lengri doosh krik lino. Jon hunte anenn les glan o wudar o Debleskro plachteno kherestar. 15 Un i phureder lendar tchiwenn pengre wasta ap o viecheskro shero un marenn les kote glan o baro Debleste. 16 Un o pralstuno rashai lell o ratestar un hidjrell les an o Debleskro plachteno kheer. 17 Job tchiwell peskro gushto an ko rat, un witsrell efta kope ko ratestar glan o laintikro kotar than, hoi hi glan o Debleskri kutch isema, kai o baro Dewel djiwell. 18 Ninna makell lo ko ratestar ap i shinga, hoi ap i star ekke o bobestar hi, kai o sungepaskro koowa chatchedo well. Ko bob hi tardo glan o baro Debleste an leskro plachteno kheer. O tselo wawar rat tchorell lo win tella pash koi chatchepaskri, kai i vieche chatchedo wenna. Koi chatchepaskri hi tardo win glan o wudar o Debleskro plachteno kherestar.
19 Palle tchinell lo o tselo thulepen dran ko viecho win un chatchrell les ap o Debleskri chatchepaskri. 20 Un job krell kau viecheha jaake har job kowa ko viecheha kras, hoi job peskri doshake maras. Jaake krell o rashai, te well lauter pale mishto mank i Israelitarja un o baro Debleste. Un o baro Dewel bistrell lengri doosh. 21 Kowa, hoi kau gurumestar pral atchas, anell job win, krik dran koi platsa, kai i menshe hi, un chatchrell les jaake har job kowa chatchras, hoi ko gurumestar pral atchas, hoi job peskri doshake maras. Jaake hunte well i gurumeha kerdo, hoi maredo well, te well i doosh i tsele Israelendar krik lino.
22 Te kras i pralstuno tchomone, hoi hunte krals lo gar, anas lo doosh ap peste, ninna te djinas job gar, te penas o baro Dewel: Ma kre kowa! 23 Te haiwell lo pal i tsiro, kai kowa, hoi lo kras, gar tchatcho hi glan o Debleskre jaka, palle hunte anell lo leske i mursh busni, hoi gar nasselo hi. 24 Un tchiwell peskro wast ap o viecheskro shero un marell les glan o baro Debleste, kote kai i vieche maredo wenn, hoi o Debleske chatchedo wenn. Jaake well i viecheha kerdo, hoi maredo well, te well i doosh krik lino. 25 Un o rashai lell peskro gushteha ko ratestar un makell les ap i shinga, hoi ap i star ekke pral ap koi chatchepaskri hi, kai i vieche chatchedo wenna. O tselo wawar rat tchorell lo win tella pash i chatchepaskri. 26 Un o tselo thulepen chatchrell lo ap i chatchepaskri jaake, har chatchrell lo o thulepen ko viechestar, hoi jek o Debleske anell, te chan le les khetne glan leste. Jaake krell o rashai, te well lauter pale mishto mank o pralstuneste un o baro Debleste. Un o baro Dewel bistrell leskri doosh.
27 Te kras jek i Israelendar tchomone, hoi hunte krals lo gar, anas lo doosh ap peste, ninna te djinas job gar, te penas o baro Dewel: Ma kre kowa! 28 Te haiwell lo pal i tsiro, kai kowa hoi lo kras, gar tchatcho hi glan o Debleskre jaka, palle hunte anell lo leske i busni, hoi gar nasselo hi. Kowa hunte krell lo, te well leskri doosh krik lino. 29 Un job hunte tchiwell peskro wast ap o viecheskro shero un marell les kote kai i vieche maredo wenn, hoi chatchedo wenn o Debleske. 30 Un o rashai lell peskro gushteha ko ratestar un makell les ap i shinga, hoi ap i star ekke pral ap koi chatchepaskri hi, kai i vieche chatchedo wenna. O tselo wawar rat tchorell lo win tella pash i chatchepaskri. 31 Un o tselo thulepen tchinell lo tele, jaake har tchinell lo o thulepen tele ko viechestar, hoi jek o Debleske anell, te chan le les khetne glan leste. Un ko rashai chatchrell kal thulle kotja ap o Debleskri chatchepaskri, te well i latcho sungepen win, hoi baro Debleske mishto sungella. Jaake krell o rashai, te well lauter pale mishto mank ko mensheste un o baro Debleste. Un o baro Dewel bistrell leskri doosh.
32 Te kamell jek i bakro o Debleske te anell, te well leskri doosh krik lino, palle anell lo i bakri, hoi gar nasselo hi, 33 un tchiwell peskro wast ap o viecheskro shero, un marell les kote, kai i vieche maredo wenn, hoi o Debleske chatchedo wenn. Kowa hunte krell lo, te well leskri doosh krik lino. 34 Un o rashai lell peskro gushteha ko ratestar un makell les ap i shinga, hoi ap i star ekke pral ap koi chatchepaskri hi, kai i vieche chatchedo wenna. O tselo wawar rat tchorell lo win tella pash i chatchepaskri. 35 Un o tselo thulepen tchinell lo tele jaake har tchinell lo o thulepen tele ko bakrestar, hoi jek o Debleske anell, te chan le les khetne glan leste. Un ko rashai chatchrell kal thulle kotja ap o Debleskri chatchepaskri khetne ko wawar masseha, hoi o baro Debleske chatchedo well. Jaake krell o rashai, te well lauter pale mishto mank o baro Debleste un ko mensheste, kai doosh ap peste anas. Un o baro Dewel bistrell leskri doosh.