23
Ab an o tchatchepen tardo!
1 Tu rakress kek koowa dureder, hoi tu shunal, un tu gar djineh, te hi kowa tchatcho! Ma choche i wawareske, kai anas doosh ap peste! 2 Ma rike pash kolende, hoi djan ap i tchilatcho drom, ninna te hi jon bud! Te putchenn tutar i tchatchepangre, ma pen tchomone wawares har o tchatchepen, ninna te chochenn i tsele wawar. 3 Pen o tchatchepen, ninna te hi kowa i tchorwelo, kai chochras.
4 Te dikeh tu i grumni, i burikaa, hoi nashedo hi, hunte aness ko viecho pale pash koleste, koles ko viecho hi, ninna te hal tu leha an o tchingepen. 5 Te phagas i burika khetne tel ko kowa, hoi ap late tchiddo was, dja koi un dja koleske pash o wast, koleske i burika hi, ninna te hal tu leha an o tchingepen, un dik, te well koi burika pale ap i herja!
Tchatche laba, ap kolende i tchatchepangre hunte rikrenn pen
6 Te hal tu i tchatchepaskro, hunte dess tu koles peskro tchatchepen, koon an o tchatchepen hi, ninna te hi lo tchorwelo.
7 Ma shun ap kolende, hoi anenn chochepen pre ap i wawareste!
Ma pen, te well kowa temerl dino, kai kek tchilatcho koowa kras un kai an o tchatchepen tardo hi. Miri phagi well ap koleste, kai sawo tchilatcho koowa krella.
8 Te hi jek an o tchingepen i wawareha un kamell tut te ginell, te dess les tchatchepen, ma le kowa, hoi job kamell tut dell! Koon sau koowa an-lell, well korelo o tchatchepaske un dikell buder gar, koon an o tchatchepen hi.
9 Ma krenn kolenge o djipen phares, kai wi-themarja hi! Tumer djinenn, har kowa hi! Tumer hans wi-themarja an o them Egiptia.
O Debleskro bersh
10 Shob bersha witsress tu o djob ap tiri phub win. Un te was ko djob bares, aness les dren. 11 An o eftato bersh ma witse tiri djob ap tiri phub win! Un ko djob, hoi an ko bersh pre djal un bares well, kowa muk i tchorwelenge tardo! Un kowa, hoi i tchorwele pral mukenn, kowa muk i diwje viechenge tardo! An ko eftato bersh muk ninna i molengre drake un i olivtikre drake ap i ruka i tchorwelenge. Un kowa, hoi jon pral mukenn, well i diwje viechenge.
Rike o Debleskre diwessa!
12 Shob diwessa budress tu! Ap o eftato diwes budress tu gar! Ninna tire grumja, tiri burikab, tire budepangre un i wi-themarja, hoi pash tute hi, budrenn ap ko diwes gar, jaake te nai lenn le pale newi soor.
13 Denn jak un rikrenn ap lauter, hoi me tumenge penom! Ma mangenn wawar deblen an! Lengre laba hunte wenn gar dran tumare muja win!
14 Triin kope an o bersh rikress tu mange bare diwessa dren:
15 kol bare diwessa, kai chah tu efta diwessa ko maro, an koleste kek shutlo jarro dren hic. Kol diwessa rikress tu an o tchon Abib. Kowa kress tu, te bistress gar, te nashal an ko tchon dran o them Egiptia. Un ab gar an o Debleskro kheer, te hi tchi an tiro wast, hoi tu leske aneh!
16 Rikrenn ninna bare diwessa mange an ko tsiro, kai anenn o newo djob drend.
Un bare diwessa rikrenn mange ninna an ko tsiro pal i nijal, te anan i drake dren, un lauter, hoi bares was ap i ruka un ap tiri phub.
17 An kal bare diwessa, triin kope an o bersh, hunte wenn i tsele mursha glan o baro Debleste, pengro rajeste an leskro kheer.
18 Te mareh tu i viecho o Debleske, palle dess tu kek maro pashel, hoi shutlo jarro dren hi. Un o thulepen o viechestar, hoi maral tu o Debleske, hunte well ko diwes chatchedo un atchell gar pral i rat tchiddo.
19 Tu aness o feteder halauterestar, hoi ap tiri phub bares was tiro baro Debleske an leskro kheer.
Tu keress gar i terni busnie an i thud peskri datar.
O baro Dewel djal peskre menshentsa
20 Me bitchrau i bolepaskro glan tumende, koon dell jak ap tumende ap o drom, hoi tumer djan. Un kowa anell tumen an ko them, hoi me tumenge wi-rodom. 21 Denn jak, te shunenn ap kowa, hoi job tumenge penell! Me bitchrom les. Te shunenn tumer gar ap leste, bistrell lo tumari doosh gar. 22 Te shunenn tumer ap leste un krenn halauter, hoi me tumenge penau, palle djau me ap kolende, hoi ap tumende djan. Un kolla, hoi tumenge o djipen phares krenn, kolenge krau me les ninna phares.
23 Awa, miro bolepaskro djal glan tute un anell tut an o them, kai djiwenna i Amorarja, i Hetarja, i Perisarja, i Kanaanitarja, i Hiwarja un i Jebusarja. Un me dau len temerl. 24 Ma mangenn lengre deblen an! Ma anenn viechen, te chatchrenn len lenge! Ma krenn jaake har kolla, kai an ko them djiwenna! Denn lengre tsele deblen paash, un phagenn kol bare barra, hoi jon lenge pre-tchiwan!
25 Mangenn man, tumaro baro Debles, kokres an! Palle krau, te hi tumen doha maro un bud pani. Un me lau hako nasslepen, hoi mashkral tumende hi, tumendar krik. 26 Kek romni, hoi wawartchandes hi, nashrell peskro ternepen. Un haki romni nai lell i ternepen. Hakeno well phuro.
27 An hako them, kai tu djah, krau me i menshenge sawi daar glan tute, te nashenn le i darjatar penge. 28 I Hiwarja, i Kanaanitarja un i Hetarja nashenn i darjatar glan tute penge, te weh tu pash lende. 29 Hi jaake: Gar an jek bersh tradau len tutar krik. Te kroms kowa jaake, wals o them diwjo un anals buder kek chapen win. Un i diwje vieche wans budeder un budeder. Un kowa wals gar mishto tumenge. 30 Dran jek them pal o wawar tradau len glan tute win. Jaake dau i tsiro te wenn tumer jaake bud, te nai lenn o tselo them tumenge dren.
31 Un me penau, har bares tiro them wella. Job djal fun ko Baro Lolo Pani bis pash ko baro pani, kai i Filistarja djiwenn, un fun o mulo tato them bis pash o lengsto pani Eufrat. Kolla, hoi kote djiwenna, dau an tiro wast, te tradenn tumer len dran o them win. 32 Ma awenn lengre mala! Ma mangenn tchomone lengre deblendar! 33 Mukenn len gar tumentsa khetne an tumaro them te djiwell! Te krans le kowa, nai anans le tumen jaake dur, te mangenn tumer lengre deblen an un shunenn buder gar ap mande. Un kowa wals tumaro merepen.