4
O baro Dewel dell peskri soor o Moseste
1 O Mose putchas o baro Deblestar: “Hoi hi, te patsenn i Israelitarja gar, hoi me lenge penau, un jon shunenn gar ap mande? Nai well, jon penenna ap mande: ‘O baro Dewel mukas pes gar glan tute te dikell.’”
2 Penell o baro Dewel ap o Mose: “Hoi hi tut kote an o wast?”
“Jek kotar kasht”, penell o Mose.
3 “Witse o kasht ap i phub”, penell leske o baro Dewel. Un o Mose witsras o kasht ap i phub. Koi was o kasht jek djido sap. Un i darjatar nashas o Mose peske.
4 Koi penas o baro Dewel ap o Mose: “Tchip tiro wast win! Un tape o sap ap i pori!” Un o Mose tapras o sap. Un har his o sap an leskro wast, was o sap pale i kasht.
5 Un o baro Dewel penas: “Mose, kre kawa glan i Israelitarja! Palle patsenn le ap tute, te mukom man me, o baro Dewel, glan tute te dikell. Palle djinenn le, te hom me o Dewel, koles lengre phure, o Abraham, o Isaak un o Jakob an-mangan.”
6 Un pale rakras o baro Dewel ap o Moseste: “Tchip tiro wast tel tiri plaashka!” Un o Mose tchiwas peskro wast tel peskri plaashka. Un har las lo les pale win, his leskro wast nasselo un parno har gib.
7 Un o baro Dewel penas ap leste: “Tchip tiro wast pale tel i plaashka!” Un job tchiwas peskro wast pale tel i plaashka! Un har las lo les pale win, his o wast pale sasto.
8 Un o baro Dewel penas: “Te dikenn le ko baro koowa, hoi me tiro kashteha krom, un jon patsenn tut gar, palle patsenn le, te sikreh tu len kau duito baro koowa. 9 Un te patsenn le tut pale gar, ninna te dikan le ko baro koowa, hoi krom o kashteha un o wasteha, un shunenn gar koi pre, hoi tu lenge peneh, palle le pani dran o Nil, un tchore o pani ap i phub! Palle well ko pani rat.”
10 Un o Mose penas ap o baro Debleste: “Miro Rai, me haiwau gar mishto te rakrell, ninna kanna kai rakreh mantsa, hi mange phares te rakrap.”
11 Pale penas o baro Dewel ap o Moseste: “Koon krell, te nai rakrenn i menshe? Un koon krell kowa, te nai rakrell un shunell jek gar? Koon krell kowa, te nai dikenn le? Un koon krell, te nai dikell jek gar? Hom kowa gar me? 12 Un kanna dja pash lende! Me kamau tiro mui te well, un kamau tuke lauter sikrell, hoi tu lenge te peness!”
13 Koi penas o Mose: “Miro rai, mangau tut, bitche jek wawares!”
14 Un har penas o Mose kowa, las o baro Dewel choli ap o Moseste, un job penas ap leste: “Tiro phraal, o Levitari Aron, me djinau, te haiwell lo mishto te rakrell. Shun, job wella pash tute. Un te dikell job tut, palle hi les baro shukapen an peskro dji. 15 Un pen tiro phraleske halauter, hoi job hunte rakrell! Un me, tumaro Dewel, tchiwau mire laba an tiro mui un leskro mui un sikrau tumen halauter, hoi hunte krenn. 16 O Aron rakrell tuke ap i Israelitarja, un lauter, hoi tu leske peneh, kowa penell lo! Job hi har tiro mui. Un tu hal leske har i dewel, kai leske i laba an o mui tchiwell. 17 Un kau kasht le an tiro wast! Koleha kress tu ko baro koowa.”
O Mose well pale an o them Egiptia
18 Un palle djas o Mose pash peskro romjakro dadeste, o Jetro, pale, un penas leske: “Me kamau pale an o them Egiptia pash mire menshende te djal, te dikap, te hi le djido!”
Un o Jetro penas ap o Moseste: “Dja o Debleha!”
19 Un o baro Dewel penas ap o Moseste an o them Midian: “Dja an o them Egiptia palpale! Kol tsele mursha, kai kaman tut te marell, djiwenn buder gar.”
20 Kote las o Mose peskri romjat un peskre tchawen, un tchiwas len ap i burikaa. Un jon djan an o them Egiptia. Un o Debleskro kasht las job peha.
21 Un o baro Dewel rakras ap o Moseste: “Te hal an o them Egiptia, palle kre ko tselo baro koowa, hoi me tut an tiro wast dom, glan o Farao! Un me kamau leskro dji har i bar te krell, te mukell job gar tire menshen dran i Egiptia win. 22 Un rake ap leste: Jaake rakrella o baro Dewel: ‘O Israel hi miro phureder tchawo. 23 Un me penau tuke: Muk miro tchawes te djal, te mangell lo man an! Un te mukeh les gar te djal, palle marau me tiro phureder tchawo.’”
24 Un har his o Mose ap o drom, djas lo an i kheer, kote atchas lo pral i rat. Ap jek kopo was o baro Dewel ap leste, un kamas les te marell. 25 Palle las i Zippora sik i tchuri, un tchinas peskro tchawes ap o mass, un tchiwas kowa, hoi joi tele tchinas, ap o Moseskre pire. Un joi penas: “Rat ratas, un tu hunte meress gar. Tiro djipen was tuke newes dino. Jaake wal i duito kopo miro rom.” 26 Kau lab penas li doleske, kai tchinas li peskro tchawes ap o mass. Palle mukas o baro Dewel o Moseske tele.
O Aron djal pash o Moseste
27 An ko tsiro penas o baro Dewel ap o Aron: “Dja pash o Moseste an o mulo tato them!”
Un o Aron djas koi. Un jon hatsan pen pash i Debleskri berga, un lan pen an i mussi un tchumran pen. 28 Un o Mose penas o Aroneske halauter, hoi o baro Dewel leske penas, ninna ko baro koowa, hoi job an o Debleskri soor krell.
29 Un khetne djan le an o them Egiptia un dan i phureden i menshendar Israel khetne gole. 30 Un o Aron penas lenge i tsele laba, hoi o baro Dewel ap o Moseste penas. Palle kras o Mose glan lengre jaka ko baro koowa an o Debleskri soor. 31 Un jon patsan len. Un har shunan i Israelitarja, te dikas o baro Dewel lengro pharo djipen, un kamell lenge latchepen te krell, koi witsran pen le ap i phub, un mangan o Debles an.