3
O baro Dewel rakrell o Moseha
1 O Moseskri romjakro dad his o Jetro, ko rashai an o them Midian. Koles his bakre un busja. Un o Mose das jak ap lende, un anas len pral o tato mulo them, un was pash o Debleskri berga, hoi kharella Horeb. 2 Un kote mukas pes o baro Debleskro bolepaskro lestar te dikell, an i jag an i burra. O Mose dikas, kai i burra chatchan un chatchran gar pre. 3 Un job penas ap peste: “Kowa haiwau me gar. Me djau kote un kamau te dikell, hoske chatchrenna gar i burra pre.”
4 Un o baro Dewel dikas, har well o Mose, te dikell lo feteder. Un o Dewel das ap leste gole dran i burra: “Mose! Mose!”
Un o Mose penas: “Kate hom.”
5 Penas o Dewel: “Ma dja dureder! Rib tire kircha win! Kai tu tardo hal, hi o Debleskri phub.”
6 Un pale penas lo ap o Moseste: “Me hom tiro dadeskro Dewel, un o Abrahameskro Dewel, un o Isaakeskro Dewel un o Jakobeskro Dewel.”
Un o Mose tchiwas i diklo glan peskre jaka. Job daras, te dikell lo ap o Debleste.
7 Un o baro Dewel penas: “Me dikom har djungelo mire menshenge djala an o them Egiptia. Me shunom lengri gole, har dan i pralstune chale len dawa. Me prindjrau lengre duka. 8 Me wom tele, te lap len dran o wast kol menshendar an o them Egiptia win, un anau len dran kau them win un dau len i latcho un baro them, kai hi bud thud un gwin. An ko them djiwenn kanna i Kanaanitarja, i Hetarja, i Amorarja, i Perisarja, i Hiwarja un i Jebusarja.
9 Me shunom i Israelengri gole un dikom, hoi i Egiptarja ap lende krenna. Jon phagenn len, fothe denn le len dawa. 10 Kanna dja pash o Farao! Me bitchrau tut, te less mire menshen, i Israelitarja, win dran o them Egiptia.”
11 Koi penas o Mose ap o Debleste: “Me, koon hom me, te djap me pash o Farao, un anap i tsele Israelitarja dran o them Egiptia win?”
12 Koi penas o Dewel: “Me hom pash tute. Te anal tu mire menshen dran o them Egiptia win, palle djan tumer pash kai berga un marenn kate viechen mange. Kowa hi i sikepen, te bitchrom me tut.”
13 O Mose penas ap o Debleste: “Dik, me te djau pash i Israelitarja un penau lenge: ‘O Dewel, koles tumare phure an-mangan, kowa bitchras man pash tumende.’ Hoi te penap lenge, te putchenn le mandar, hawo lab tut hi?”
14-15 O Dewel penas ap o Moseste: “Me hom, koon me hom. Rake ap i Israelitarja: ‘O baro Dewel, kai kharella Me-Hom bitchras man pash tumende. Job hi o baro Dewel, kones tumare phure dada, o Abraham, o Isaak un o Jakob an-mangan.’ ‘Baro Dewel’ hi miro lab i tsele tsirja. Un jaake hunte kharenn man tire menshe, kai wenna pal tute.
16 Dja kanna an o them Egiptia, un de i phureden i menshendar Israel khetne gole, un pen ap lende: ‘O baro Dewel, ko Dewel tumare phure dadendar, mukas pes te dikell glan mande. Job hi o Dewel, koles o Abraham, o Isaak un o Jakob an-mangan. Un job penas ap mande: Me dom ap lauter jak, hoi jon tumentsa an o them Egiptia kran. 17 Me dau miro wast pre: Kau djungelo djipen herell pes pre. Me, o baro Dewel, lau tumen dran o them Egiptia win, un anau tumen an ko them, kai djiwenna i Kanaanitarja, i Hetarja un i Amorarja, i Perisarja, un i Hiwarja un i Jebusarja. Un kowa hi jek them, kai hi bud thud un gwina.’
18 Un i phureder shunenna ap tiro lab. Palle dja lentsa pash o baro rajeste pral o them Egiptia. Un penenn ap leste: ‘O baro Dewel, koles i Hebrearja an-mangenna, was pash mende. Kanna muk men triin diwessa dur an o mulo tato them te djal, te maras viechen maro Debleske.’”
19 Un palle penas o baro Dewel: “Me djinau, o baro rai pral o them Egiptia, te well lo gar phagedo, mukell lo tumen gar dran o them win te djal. 20 Doleske tchiwau bari bibacht ap i Egiptarja, un krau baro koowa mank lende, hoi sikrella miri soor. Pal kowa mukenn le tumen te djal. 21 Un darjatar krenn le pengre djia tumenge pre un denn tumen bud latcho koowa peha. 22 Tumare djuwja djan pash kolende, kai langs lende khere hi un mangenn lendar sonakai un rup, un shukar ripja. Kawa lauter lenn lendar un denn les tumare tchawende, te hidjrenn le les.”