36
I laba kol menshendar, kai wan pal o Esau
1 Kowa hi ko liil, kai tchinlo hi pral o Esau peskre tchawentsa. Job kharell ninna Edom. 2 O Esau las peske dui romjen dran o them Kanaan: i Ada, lakro dad hi o Elon, ko Hetari; un i Oholibama, lakro dad hi o Ana. Koleskro dad hi o Zibeon, ko Hiwari. 3 Leskri triinti romni his i Basmat, lakro dad hi o Ismael. Lakro phraal hi o Nebajot.
4 I Ada anas o Elifas ap i phub. I Basmat anas o Reguel ap i phub. 5 I Oholibama anas o Jehush ap i phub, ninna o Jalam un o Korach. Kolla hi i tchawe, kai o Esaeske bolde wan an o them Kanaan.
6 Un o Esau las peskre romjen un peskre tchawen un tchen un i tsele menshen, kai an leskro kheer his, ninna peskre bakren un peskre tsele viechen un halauter, hoi les was an o them Kanaan, un djas peske an i wawar them, un mukas peskro phrales Jakob. 7 Kowa, hoi kol dujen his, his jaake bud, kai nashte djiwenn le gar an jek them. An ko them his gar doha chapaske lengre bud viechenge. 8 Un o Esau, djiwas ap o pralstuno them, hoi kharella Seir. O Esau hi o Edom.
9 Kolla hi i laba kol menshendar, kai wenna pal o Esau. Jon hi i Edomarja, kai djiwan ap o pralstuno them Seir: 10 Kolla hi i laba o Esaeskre tchawendar:
Elifas, ko tchawo leskri romjatar Ada;
Reguel, ko tchawo leskri romjatar Basmat.
11 O Elifas las tchawe. Kolla his: o Teman, o Omar, o Zefo un o Gatam un o Kenas. 12 O Elifas, les his i duiti romni. Lakro lab hi Timna. Joi anas o Amalek ap i phub. Kolendar lauterendar hi o Esaeskri romni Ada i mami.
13 Ninna o Reguel las tchawe: Kolla his: o Nahat un o Serach, o Shamma un o Missa. Lengri mami hi o Esaeskri romni Basmat.
14 Un kolla hi i tchawe o Esaeskri romjatar Oholibama: o Jehush, o Jalam, o Korach. I Oholibama hi i tchai ko murshestar Ana, leskro dad hi o Zibeon.
15-16 Un kolla hi i raja, kai wenna o Esaeskre tchawendar: Leskro phureder tchawestar, o Elifas, wenna o rai Teman, o rai Omar, o rai Zefo, o rai Kenas, o rai Korach, o rai Gatam, o rai Amalek. Kolla hi i raja, kai wenna pal o Elifas an o them Edom. Lengri mami hi i Ada.
17 Un kolla hi i raja, kai wenna o Esaeskro tchawestar Reguel: o rai Nahat, o rai Serach, o rai Shamma, o rai Missa. Kolla hi i raja, kai wenna pal o Reguel an o them Edom. Lengri mami hi o Esaeskri romni Basmat.
18 Un kolla hi i tchawe o Esaeskri romjatar Oholibama: o rai Jehush, o rai Jalam un o rai Korach. Kolla hi i raja, kolengri dai o Esaeskri romni Oholibama hi, kolakro dad o Ana hi.
19 Kol tsele menshe un lengre raja wenna pal o Esau. Jon khetne hi i Edomarja.
I menshe, kai djiwan glan o Esau an o them Seir
20-21 Har was o Esau peskre tchawentsa un lengre familje an ko them Edom, djiwan kote i Horarja. Lengro phuro dad his o Seir. Leskre tchawe his i raja pral i Horarja: o Lotan, o Shobal, o Zibon, o Ana, o Dishon, o Ezer un o Dishan.
22 O Lotan his o dad dui tchawendar: o Hori un o Hemam. O Lotanes his i pheen. Koja his i Timna.
23 O Shobal his o dad pantch tchawendar: o Alwan un o Manahat un o Ebal, o Shefi un o Onam.
24 O Zibon his o dad dui tchawendar: o Aja un o Ana. Kowa hi ko Ana, kai hatsas o tato pani an o mulo them, har das lo jak ap i burike peskro dadestar Zibon.
25 O Ana his o dad i tchawestar un i tchatar. Leskro tchawo his o Dishon un leskri tchai his i Oholibama.
26 O Dishon his o dad star tchawendar: o Hemdan un o Eshban un o Jitran un o Keran. 27 O Ezer his o dad triin tchawendar: o Bilhan un o Saawan un o Akan.
28 O Dishan his o dad dui tchawendar: o Uz un o Aran.
29-30 Kolla hi i raja pral i Horarja an o them Seir: o rai Lotan, o rai Shobal, o rai Zibon, o rai Ana, o rai Dishon, o rai Ezer, o rai Dishan. Pal lende wan lengre menshe kharedo.
I bare raja pral i Edomarja
31 Un kolla hi i bare raja an o them Edom glan ko tsiro, har was i baro rai pral o them Israel: 32 O Bela his o baro rai pral o Edom. Leskro dad his o Beor. Un ko lab leskro forestar his Dinhaba. 33 Har o Bela meras, was o Jobab dran o foro Bozra o baro rai. Leskro dad his o Serach. 34 Har o Jobab meras, was o Husham o baro rai. Job his dran o them Teman. 35 Har o Husham meras, was o Hadad o baro rai. Leskro dad his o Bedad. Kowa kuras pes i Midianarja an o them Moab un das len. Un ko lab o forestar, kai o Hadad djiwas, his Awit.
36 Har o Hadad meras, was o Samla dran Masreka o baro rai.
37 Har o Samla meras, was o Shaul o baro rai. Job his dran Rechobot pash o lengsto pani Eufrat. 38 Har o Shaul meras, was o Baal-Hanan o baro rai. Leskro dad his o Akbor. 39 Har meras o Baal-Hanan, koleskro dad o Akbor his, was o Hadar o baro rai. Un ko lab peskro forestar his Pagu. Un ko lab peskri romjatar his Mehetabel. Lakri dai his i Matred, kolakro dad o Mesahab his.
I raja pral i bare familje, kai wenna pal o Esau
40-43 Un kolla hi i laba kol rajendar, kai wenna pal o Esau. Pal lende wan pengre menshe kharedo. Ninna kol forja, kai djiwan le, lan lengro lab: o rai Timna, o rai Alwa, o rai Jetet, o rai Oholibama, o rai Ela, o rai Pinon, o rai Kenas, o rai Teman, o rai Mibzar, o rai Magdijel, o rai Iram. Kolla hi i raja pral i Edomarja an lengre forja an o them, kai lengro his. Lengro phuro dad hi o Esau. Lestar wenna i Edomarja.